سوال

السلام علیکم مفتی صاحب! میری والدہ صاحبہ اپنی حیات میں بخوشی اور دیگر ورثہ کی رضامندی سے اپنا موجودہ گھر جس میں بیٹوں کے ساتھ رہائش پذیر ہیں،اس گھر کو اپنی زندگی میں اپنے بیٹوں کے نام ہبہ کرنا چاہتی ہیں۔مکان  کی تفصیل کچھ یوں ہے کہ  آٹھ مرلہ  مکان ہے جس میں فی الحال حد بندی کرنا ،دیواریں کھڑی کرنا  اور ہر ایک بیٹے کے الگ حصہ متعین کرنا نا ممکن ہے۔ المختصر مشاع مال ہے اور ہم سب بیٹے رضامندی سے بعد از ہبہ قیمتا تقسیم کرنے کا ارادہ رکھتے ہیں،جو کہ جھگڑے کاسبب  نہ ہوگا، ان شاء اللہ۔برائے مہربانی یہ بتائیے کہ یہ ہبہ شرعا منعقد ہوجائے گا؟

اَلجَوَابْ بِاسْمِ مُلْہِمِ الصَّوَابْ

ایسی چیز  جو قابل تقسیم  نہ ہو  یا تقسیم کے بعد قابل انتفاع نہ ہو تو ایسی چیز کابغیر تقسیم کیے بھی  ہبہ کرنا درست ہوتا ہے،البتہ جب تک قبضہ نہیں  ہوگا ہبہ تام نہ ہوگا۔

لہٰذا صورت مسئولہ میں   اگر آپ کی والدہ حالت صحت میں آپ سب بھائیوں کو مشترک طور پر ہبہ کرتی ہیں اور آپ سب بھائی اس پر قبضہ کرلیتے ہیں  تو یہ ہبہ تام ہوجائے گا۔البتہ آپ کی والدہ کے لیے ضروری ہے کہ وہ گھر پر  اپنا تصرف مکمل طور پر ختم کردیں جس کا طریقہ یہ ہوسکتا ہے کہ وہ اپنا سامان وغیرہ جو گھر میں موجود ہو وہ پہلے  آپ کے پاس امانت رکھوادیں اور پھر  آپ سب بھائیوں کو مکان ہبہ کردیں  جس پر آپ سب بھائی خود یا ایک دوسرے کے وکیل کے طور پر قبضہ کرلیں، اس  طرح کرنے سے ہبہ تام ہوجائے  گا۔ پھر آپ  چاہیں تو والدہ کو اسی گھر میں رہنے کی اباحت کرسکتے ہیں ۔

حوالہ جات

قال العلامۃ الکاسانی رحمہ اللہ:وأما ما يرجع إلى الموهوب فأنواع: ومنها أن يكون محوزا فلا تجوز هبة المشاع فيما يقسم، وتجوز فيما لا يقسم ،كالعبد والحمام والدن ونحوها.

                             (بدائع الصنائع:6/119)

                                                                                                                                                وفی الھندیۃ: وهبة المشاع فيما لا يحتمل القسمة تجوز من الشريك ومن الأجنبي، كذا في                                                                                                 الفصول العمادية. . . .لا يثبت الملك للموهوب له إلا بالقبض هو المختار، هكذا في الفصول العمادية.

                                                                                                                                                                                                                                                                                                                                                                                                           (الفتاوی الھندیۃ:4/377)

و فی الھندیۃ:وتصح في محوز مفرغ عن أملاك الواهب وحقوقه ومشاع لا يقسم ولا يبقى منتفعا به بعد القسمة من جنس الانتفاع الذي كان قبل القسمة كالبيت الصغير والحمام الصغير ولا تصح في مشاع يقسم ويبقى منتفعا به قبل القسمة وبعدها، هكذا في الكافي.

       (الفتاوی الھندیۃ:4/376 )

                                                و فیہ ایضا:ولو وهب دارا فيها متاع الواهب ،وسلم الدار إليه أو سلمها مع المتاع لم تصح ،والحيلة فيه أن يودع المتاع أولا عند الموهوب له ويخلي بينه وبينه، ثم يسلم الدار إليه فتصح الهبة فيها.

                                                                                                                                                                                                                                                                                                                                                                                                (الفتاوی الھندیۃ:4/380)

   محمد عثمان یوسف

     دارالافتاءجامعۃ الرشید کراچی

    13 محرم الحرام1442ھ

واللہ سبحانہ وتعالی اعلم