ترجمہ: ’’ نبی کریم ﷺ سے یوم عرفہ کے روزے کے بارے میں عرض کیا گیا تو فرمایا: وہ گزشتہ ایک سال اور آئندہ ایک سال کے گناہوں کا کفارہ ہے‘‘۔

اہم تنبیہ:احادیث فضائل میں جہاں بھی کسی نیک عمل سے گناہوں کے معاف ہونے کا ذکر ہے ان سے صغیرہ گناہ مراد ہیں، کبیرہ گناہ بغیر توبہ و ندامت کے کسی عمل سے معاف نہیں ہوتے، مگر صغیرہ گناہوں کی معافی بھی کوئی معمولی نعمت نہیں ۔

تکبیرات ِتشریق ایک عظیم و مؤثر درس:

ذی الحجہ کے ان قیمتی ایام میں ایک عمل یہ بھی ہے کہ یوم عرفہ (نو ذی الحجہ) کی فجر سے تیرہ ذی الحجہ کی عصر تک ہر نماز کے بعد تکبیرات تشریق (ﷲ اکبر، ﷲ اکبر، لا الہ الا ﷲ وﷲ اکبر، ﷲ اکبر و للہ الحمد) کہی جاتی ہیں۔ ان ایام میں یہ تکبیرات کہنا واجب ہیں۔

 تکبیراتِ تشریق پانچ دن تک ہر نماز کے بعد کیوں کہی جاتی ہیں؟ اس لیےتا کہ ﷲ تعالیٰ کی بڑائی اور عظمت دلوں میں پختہ ہو، جس ذات کی دل میں عظمت ہوتی ہے آدمی اس کے کسی حکم سے سرتابی نہیں کرتا، ہر حکم کی تعمیل کرتا ہے، بلکہ اس کے اشاروں پر چلتا ہے، اس کی چاہت کو مد نظر رکھ کر عمل کرتا ہے۔ اس کے مقابلہ میں کسی کے حکم، کسی کے خوف و ملامت، کسی کی محبت کو خاطر میں نہیں لاتا اور دل میں جس کی عظمت نہیں ہوتی، آدمی اس کے بار بار کے حکم کی پروا نہیں کرتا۔

تکبیراتِ تشریق ہوں یا اذان و اقامت اور نماز کی تکبیرات، ان میں بار بار مسلمانوں کو جھنجھوڑا جا رہا ہے کہ ﷲ تعالیٰ کی عظمت کو دلوں میں بٹھاؤ، ﷲ تعالیٰ کے احکام کے مقابلے میں نفس و شیطان، اعزہ واقارب، دوست احباب کسی کی بات نہ مانو، عظمت و کبریائی صرف ﷲ کے لیے ہے، صرف اسی کی اطاعت کرو، اس کی اطاعت میں آنے والی ہر رکاوٹ کا مقابلہ کرو۔

یہ حقیقت پیش نظر رکھ کر یہ تکبیرات کہنی چاہئیں، پھر اپنا محاسبہ کرنا چاہیے کہ ﷲ تعالیٰ کی عظمت و محبت دل میں پیدا ہو رہی ہے یا محض طوطے کی طرح رٹے رٹائے بول بولے جا رہے ہیں؟ ﷲ تعالیٰ کی نا فرمانی چھوٹ رہی ہے اور آخرت کی فکر دل میں پیدا ہو رہی ہے یا دن بدن دنیا کی ہوس میں اضافہ ہو رہا ہے؟

یاد رکھئے! جسمانی امراض کے نسخوں سے کوئی فائدہ حاصل کرنے کی نیت و ارادہ نہ بھی کرے تو بھی فائدہ ہو جاتا ہے، مگر روحانی امراض کے جو نسخے ﷲ تعالیٰ اور رسول ﷲ صلی ﷲ علیہ وسلم نے بیان فرمائے ہیں، ان سے شفاء حاصل کرنے کا قصد و ارادہ ہو تو فائدہ ہوتا ہے، ورنہ نہیں ہوتا۔ عزم اور قصد ہو تو کوئی وجہ نہیں کہ بار بار ﷲ تعالیٰ کی کبریائی کا زبان سے اقرار کرنے کا دل پر اثر نہ ہو۔