اَہم ہدايات:

1:۔کسی مسلمان کو تکليف پہنچاناحرام ہے اَور اِستلام يعنی حجرِ اَسود کو بوسہ دينا ياہاتھ لگانا مسنون ہے۔ اگر ازدحام کی وجہ سے ايذاء مسلم کے بغير بوسہ دينے کا موقع نہ ہو تو بوسہ دينا جائز نہيں، رسو ل اﷲﷺنے اس سے سختی سے منع فرماياہے، اَيسے موقع پر دور سے اِستلام کا اِشاره کر کے ہاتھ چوم لينا کافی ہے، عموماً لوگ اس ميں بہت غفلت کرتے ہيں اور ثواب کی بجائے الٹا گناه کماتے ہيں۔ (بدائع الصنائع: ۳/  ۱۱۹)

2:۔ حجرِ اَسود، رُکن يمانی اَور ملتزم پر اکثر خوشبو لگی ہوتی ہے، اس لئے حالت ِاِحرام ميں ان کو ہاتھ نہ لگائيے ورنہ دَم وغيره کا خطره هے۔ (مناسک: صـ ۳۱۳)

طواف شروع:

اِستلام يا اشارۂ استلام کے بعد دائيں طرف مڑ کر طواف شروع کرديجئے، اب حجرِ اَسود آپ کے بائيں طرف هوگا۔(ردالمحتار: ۳/ ۵۷۸، دارالمعرفة)

دورانِ طواف دائيں بائيں ہر گز نہ مڑيں:

حجر اَسود کے اِستلام يا اِشاره کے سوا دَورانِ طواف خانہ کعبہ کی طرف سينہ يا پشت کرنا جائز نہیں، اس کا خصوصی خيال رکھيں۔ اگر کسی نے بيت الله کی طرف سينہ يا پشت کر کے کچھ طواف کر ليا تو اس کا اعاده لازم ہے۔(ردالمحتار: ۳/ ۵۷۹)

رَمل:

طواف کے کل سات چکر هوتے هيں،(بدائع الصنائع: ۳/ ۱۲۰)۔حجرِ اَسود کے بالکل سامنے سے شروع کرکے دوباره جب حجرِ اَسود کے بالکل سامنے پہنچیں گے تو ايک چکر ہوگا۔(ردالمحتار: ۳/ ۵۸۱، دارالمعرفة)

جس طواف کے بعد سعی بھی ہو اس کے پہلے تين چکروں ميں رَمل کيا جاتا ہے،(مناسک ملا علي قاري: صـ ۱۲۹) رَمل کا مطلب يہ ہے کہ اَکڑ کر شانے ہلاتے ہوئے قريب قريب قدم رکھ کرپہلوانوں کی طرح ذرا تيزی سے چلئے،(هداية: ۱/ ۲۶۱،۲۶۲)۔ باقی چار چکروں ميں حسب معمول عام رفتار سے چلئے۔ اس طواف کے بعد بھي چونکہ سعی ہے، اس لئے عمره کے اس طواف کے پہلے تين چکروں ميں بھی رَمل کیجئے۔يہ حکم مردوں کيلئے ہے، عورتيں رَمل نہ کريں، عام رفتارسے چليں۔(غنية: ۹۴، هداية: ۱/ ۱۵۵)

رُکن يمانی:

طواف کرتے ہوئے جب رُکن يمانی (بيت الله کا وه کونہ جو حجرِ اَسود کے بالمقابل الٹے ہاتھ کو ہے اَور طواف کرتے ہوئے حجرِ اَسود سے پہلے آخری نمبر پر یہی کونہ آتاہے)پر پہنچیں تو اگر دوسروں کو ايذاء پہنچائے بغير ممکن ہو تو اس پر دونوں ہاتھ يا داياں ہاتھ لگائيں اَور آگے بڑھ جائيں،دونوں ہاتھ يا داياں لگانے کا موقع نہ ہو تو باياں ہاتھ نہ لگائيں،نيز رُکن يمانی ياہاتھ کو چومنا ثابت نہیں، اس سے اِجتناب کريں۔(مناسک ملا علي القاري: ۱۳۷)

اِستلام يا اِشاره:

ہرچکر کے اختتام پر جب آپ حجرِ اَسود پر پہنچیں تو اپنے آپ کو اَور دوسروں کو ايذا ميں مبتلا کئے بغير اَگر ممکن ہو تو اِستلام کيجئے، يعنی حجرِ اَسود کو بوسہ ديجئے، ممکن نہ ہوتو دور ہی سے ہاتھوں کا اِشاره کر کے ہاتھ چوم ليجئے۔(هداية: ۱/ ۲۶۲) اس طرح طواف ميں کل آٹھ مرتبہ حجرِ اَسود کا اِستلام يا اِشاره ہوگا۔

کانوں تک ہاتھ صرف شروع ميں:

           طواف ميں کانوں تک ہاتھ صرف شروع ميں اٹھائے جاتے ہيں، بعض لوگ ہر چکر کے اختتام پر جب حجرِ اَسود کے سامنے پہنچتے ہیں تو کانوں تک ہاتھ اٹھاتے ہيں، اس بارے ميں اگرچہ دونوں قول ہيں، مگر راجح يہ ہے کہ صرف ابتداء ميں ہاتھ کانوں تک اٹھائے جائيں، ہر چکر ميں نہیں۔(مناسک ملا علي قاري: صـ ۱۳۳)

دورانِ طواف کوئی مخصوص دعا ضروری  نہیں:

طواف کے دَوران کوئی مخصوص دُعاء قطعاً ضروری نہیں، جو دُعاء يا د ہو اور جس ميں دِل لگے، مانگتے رہيں يا کوئی بھی ذکر کرتے رہيں، اَلبتہ حجرِاَسود کے اِستلام کے وَقت اور رُکن يمانی اور حجر اسود کے درميان جو دُعائيں حديث سے ثابت ہيں، وه ابتدا ميں ذکر کردی گئی ہيں، وه پڑھ سکتے ہيں۔ اگر کو ئی بالکل خاموش رہے تو بھی کوئی حرج نہیں۔(مناسک: صـ ۱۶۷، غنية: صـ ۱۲۱) معلّمين جو اجتماعی طو ر پر دُعاء پڑھواتے ہيں اور حاجی لوگ غلط سلط پڑھتے رہتے ہيں يا دعاؤں کے کتابچے ہاتھ ميں لئے جيسے تيسے پڑھتے رہتے ہيں، يہ طريقہ غلط اور واجب الترک ہے۔

طواف ختم:

ليجئے! آپ نے سات چکر پورے کرکے اور آخر ميں اِستلام يا اشارهٔ اِستلام کر کے طواف مکمل کرليا، اب اِضطباع (داياں کندھا کھلا رکھنا) ختم کرديجئے اَور دونوں کندھے ڈھک ليجئے۔(غنية الناسک: صـ ۱۰۶)

مقامِ اِبراہيم پر دوگانہ:

                                                اب مقامِ اِبراہيم (وه پتھر جس پر کھڑے ہوکر حضرت ابراہيم عليہ السلام نے بيت الله کی تعمير کی تھي) کے پيچھے،قريب ترين جگہ جہاں اطمينان سے نماز پڑھنا ممکن ہو، دو رکعت واجب طواف اَدا کيجئے(ردالمحتار: ۳/ ۵۸۵، دارالمعرفة)۔ اوردُعاء کيجئے،(مناسک ملاعلي قاري: صـ ۱۳۸)  اگر رش کی وجہ سے قريب جگہ نہ ملے تو مسجد حرام ميں کسی بھی جگہ پڑھ سکتے ہيں۔بہر حال اسی مقام پر نماز پڑھنے پر اصرار کرنا اور اپني نماز اور دوسروں کا طواف خراب کرنا بہت بری بات ہے،اس سے اِجتناب کيجئے، نيز يہ خيال رکھيے کہ مکروه وَقت نہ ہو۔

ملتزم پرجانا:

طواف سے فارغ ہوکردو رکعت پڑھنے کے بعد يا اس سے پہلے اَگر بسہولت ممکن ہوتو ملتزم (بيت الله کي ديوار کا وه حصہ جو حجرِ اَسود اَور بيت الله کے دروازے کے درميان ہے) پر آجايئے اور سينہ اور داياں گال ديوار کے ساتھ چپکا کر، ہتھیلیوں کو سر کے اوپر ديوار پر پھيلا کر خوب گڑ گڑا کر دُعاء کيجئے۔1(مناسک ملا علي قاري: صـ ۱۳۸ ۔ ۱۳۹)،يہ قبوليت ِدُعاء کا خاص مقام ہے۔

زَمزم پينا:

ملتزم پر دُعاء کرنے کے بعد زَمزم پر آيئے اور بيٹھ کر،بيٹھنے کا ہجوم کی وجہ سے موقع نہ ہوتو کھڑے ہوکر، بسم الله پڑھ کر تين سانس ميں خوب جی بھر کر زَمزم پیجئے، پينے سے پہلے يہ دُعاء مانگیے: (مناسک ملا علي قاري: صـ ۱۳۹)