سوال

کیا فرماتے ہیں علمائے کرام اس مسئلہ کے بارے میں کہ دس سال پہلے مجھے شاپنگ مال میں ایک اچھی دکان کرائے پر مل رہی تھی پر اس وقت میرے پاس دس لاکھ نہیں تھے، میرے دوست عبد المجید نے کہا کہ میں اپنے بھائی کو یہ دکان دلا دیتا ہوں وہ تمہیں قسطوں پر 12لاکھ کی بیچ دے گا پر مجھے اپنے بھائی کو راضی کرنے پر کیا ملے گا؟ اس پر میں نے کہا کہ اگر آپ یہ انتظام کردیں تو آپ میرے اس دکان کے زندگی بھر 50 فیصد کے پارٹنر ہوں گے، لیکن اس پر انہوں نے کہا کہ میں تنخواہ دار آدمی ہوں اگر دکان میں نقصان ہوگیا تو میں نہیں بھروں گا۔ اس پر یہ طے ہوا کہ جب تک یہ 12لاکھ ادا نہیں ہوجاتےہم دونوں میں سے کوئی نفع نہیں لے گا اور اگر خدانخواستہ دکان قرض ادا کرنے سے پہلے بند ہوگئی تو اس کی ادائیگی میرے ذمہ ہوگی،کہیں سے بھی ادا کروں گویا نقصان کی ساری ذمہ داری مجھ پر آگئی۔دس سال کے اس عرصے میں اس دکان سے کما کروہ 12 لاکھ بھی اتارے اور انہیں اپنی زبان کے مطابق 50فیصد نفع جو 40لاکھ بنتا ہے دے چکا ہوں۔اسی دوران ہم دونوں میں سے ہر ایک نے 6لاکھ ملائے اور 12 لاکھ کی ایک اور دکان خرید لی، ابتدا میں اس دکان کی پارٹنرشپ سے سابقہ دکان کا کوئی تعلق نہیں تھا لیکن حساب کتاب میں آسانی کے لیے اس کا حساب بھی ہم نے سابقہ دکان کے کھاتوں میں کرنا شروع کردیا۔ پھر اس نئی دکان میں نقصان ہونا شروع ہوا تو اس کو بھی بعض اوقات پہلی دکان سے پورا کیا جاتا جو تقریبا 5لاکھ بنتا ہے، نئی دکان ہماری نقصان میں گئی اور ہم نے وہ بند کردی اور 3لاکھ کا مال اس سے بچا جو ہم نے پہلی دکان میں ڈال دیاگویا جو پانچ لاکھ اس دکان سے گئے تھے اس میں سے تین لاکھ کی ریکوری ہوگئی اور وہ دکان ابھی تک الحمد للہ چل رہی ہے۔مجھے پہلے بھی کافی لوگوں نے کہا کہ آپ کی یہ پارٹنر شپ درست نہیں ہے اسے ختم کردیں، اصل مالک و ذمہ دار آپ ہی ہیں ان کا اس طرح نفع لینا درست نہیں۔

سوال:اگرچہ  میں نے انہیں زندگی بھر کا پارٹنر بنانے کا وعدہ کیا تھا اور اس وقت میرے ذہن میں کچھ نہیں تھا اور تحریری طور پر بھی کوئی معاہدہ نہیں ہوا بلکہ بس ایک زبانی وعدہ کیا تھا ۔ لیکن ہماری مارکیٹ جہان دکان ہے اس میں لائف ٹائم کا مطلب دس سال ہوتا ہے۔اس طور پر کہ ابتدا ء میں دکان داروں نے مال کی مینجمنٹ کو لائف ٹائم   منٹینس ((maintenanceکی فیس بھری اور اس وقت ان کے فارم میں کہیں اس بات کی وضاحت نہیں تھی کہ کتنی مدت تک اس کا اعتبار ہوگا بعد میں یہ اعلان کیا گیا کہ لائف ٹائم کا مطلب ہے دس سال لہذا دوبارہ فیس بھریں ، اس پر لوگ عدالت گئے لیکن فیصلہ انتظامیۃ کے حق میں ہوا ۔تو کیا میں اس بات کو دلیل بنا کر کہ  لائف ٹائم کا وعدہ  پورا ہوگیا آگے نفع میں شریک نہیں کرنا چاہوں تو میرے لیے شرعاً جائز ہے؟

اَلجَوَابْ بِاسْمِ مُلْہِمِ الصَّوَابْ

چونکہ وہ شرکت(پارٹنرشپ) قائم ہی نہیں ہوئی تھی اس لیے اس کے پورے منافع کے حقدار آپ ہی ہیں چنانچہ آپ کے لیے ان کو منافع دینا کوئی ضروری نہیں۔

حوالہ جات

درر الحكام في شرح مجلة الأحكام (3/ 340)

ويتفرع على لزوم الاشتراك في رأس المال في شركة العقد المسألة الآتية وهي: لو قال أحد لآخر: أقرضني ألف درهم حتى أبيع وأشتري والربح يكون مشتركا بيننا، وأقرضه الآخر على هذا الشرط فيكون كل الربح للمقترض، وليس للمقرض أن يأخذ شيئا من الربح البحر.

معاذ احمد بن جاوید کاظم 

دارالافتاء جامعۃ الرشید کراچی 

22 جمادی الاولی 1443ھ

واللہ سبحانہ وتعالی اعلم