سوال

ویب سائٹس کا پیڈ ایس ای او کرنا درست ہے یا نہیں؟

اَلجَوَابْ بِاسْمِ مُلْہِمِ الصَّوَابْ

ایس ای او (سرچ انجن آپٹمائزیشن) کا مطلب یہ ہے کہ کسی ویب سائٹ یا بلاگ کو ایسے تیار کیا جائے کہ وہ گوگل اور دیگر سرچ انجنز کی سرچ میں اوپر آ جائیں۔ اس  کی تین قسمیں ہوتی ہیں:

1.     وائٹ ہیٹ ایس ای او: جس میں وہی چیزیں استعمال کی جائیں جو سرچ انجن کے اصولوں کے مطابق ہوں اور کسی قسم کی جعل سازی یا جھوٹ نہ ہو۔

2.     بلیک ہیٹ ایس ای او: جس میں جھوٹے اور غیر حقیقی ہیش ٹیگ ڈالے جائیں، غیر حقیقی ٹریفک ظاہر کیا جائے یا سرچ انجن کے دیگر اصولوں کی خلاف ورزی کی جائے۔

3.     گرے ہیٹ ایس ای او: جس میں واضح جھوٹ، غیر حقیقی ہیش ٹیگ یا ٹریفک وغیرہ تو نہ ہو لیکن ایسی چیزیں استعمال کی جائیں جن کے بارے میں سرچ انجن کے اصول غیر واضح ہوں یا جو درست اور غلط دونوں کیٹگریز میں آ سکتی ہوں۔

مندرجہ بالا تفصیل کی روشنی میں سرچ انجن آپٹمائزیشن چونکہ اپنی ویب سائٹ پر ہوتی ہے  اور سرچ انجن سے اس کا براہ راست کوئی تعلق نہیں ہوتا، نیز سرچ انجن سے اس بارے میں کوئی معاہدہ بھی نہیں ہوتا اس لیے اگر صریح جھوٹ اور دھوکہ دہی نہ ہو تو یہ کام شرعاً جائز ہوگا۔ مثلاً بعض اوقات کسی موضوع پر ایسے ٹیگ بھی استعمال کرنے ہوتے ہیں جو براہ راست اس موضوع سے متعلق تو نہیں ہوتے لیکن ان کا لوگوں کے اس موضوع کو سرچ کرنے سے بالواسطہ تعلق ہوتا ہے۔ چونکہ اس میں جھوٹ یا دھوکہ دہی نہیں ہے لہذا ایسے ٹیگز استعمال کرنا یا اس قسم کی انڈیکسنگ کرنا شرعاً درست ہے اگرچہ وہ سرچ انجن کے اصولوں کے مطابق نہ ہو۔ البتہ کسی اور کی ویب سائٹ کی ایسی آپٹمائزیشن کرنا جس کی وجہ سے مستقبل میں اس کی ویب سائٹ یا اس کا اکاؤنٹ بین ہونےاور اسے نقصان ہونے کا امکان ہو، تو ایسی آپٹمائزیشن درست نہیں ہے۔

"(ولا يمنع الشخص من تصرفه في ملكه إلا إذا كان الضرر) بجاره ضررا (بينا) فيمنع من ذلك، وعليه الفتوى: بزازية."

(الدر المختار شرح تنویر الابصار، 1/477، دار الکتب العلمیۃ)