سوال

میری بیوی نے ایک دن غصے میں نازیبا الفاظ کہے، جس میں اس نے کہا: ’’میرے ساتھ ہمبستری نہ کرنا، اور اگر کرو تو ایسے جیسے اپنی ماں کے ساتھ کرو‘‘ اب میرے لیے شرعی طور پر یہ جاننا ضروری ہے کہ کیا ان الفاظ کی وجہ سے میری بیوی میرے لیے حرام ہو گئی ہے؟ کیا میں اس سے دوبارہ ہمبستری کر سکتا ہوں یا پہلے کوئی کفارہ دینا لازم ہو گا؟

اَلجَوَابْ بِاسْمِ مُلْہِمِ الصَّوَابْ

عام حالات میں جبکہ شوہر نے طلاق کا اختیار بیوی کو تفویض نہ کیا ہو، بیوی کے کلام سے کوئی طلاق یا ظہار وغیرہ شرعا ثابت نہیں ہوتا ،اسلئے صورت مسئولہ میں سائل کی بیوی   کی اس بات سے وہ نہ  اس پرحرام ہوگی، اور نہ ہی اس کے ذمے کفارہ ظہار لازم ہوگا۔البتہ بیوی کو اس طرح نامناسب رویےاور الفاظ سے سختی کے ساتھ اجتناب کرنالازم ہے۔

حاشية ابن عابدين = رد المحتار ط الحلبي (3/ 467):

(قوله: وظهارها منه لغو) أي إذا قالت: أنت علي كظهر أمي، أو أنا عليك كظهر أمك فهو لغو لأن التحريم ليس إليها ط (قوله: فلا حرمة إلخ) بيان لكونه لغوا أي فلا حرمة عليها إذا مكنته من نفسها ولا كفارة ظهار ولا يمين.