سوال

السلام علیکم! میرا سوال یہ ہے کہ ایک نعت ہے جس میں یہ الفاظ ہیں''ہو کرم سرکار اب تو ہو گئے غم بےشمار'' تو کیا یہ الفاظ اور پوری نعت شرکیہ ہے اگر اللہ کو تصور کریں تو کیا حکم ہے اس وقت۔

اضافہ:مکمل شعر یہ ہے:

ہو کرم سرکار اب تو ہوگئے غم بے شمار                  جان و دل تم پر فدا اے دو جہاں کے تاجدار

میں اکیلا اور مسائل زندگی کے بے شمار                  آپ کہیں کچھ کیجیے نا اے شہِ عالی وفا

جا رہا ہے قافلہ طیبہ نگر روتا ہوا                         میں رہا جاتا ہوں تنہا اے حبیبِ کردگار

جلد پھر تم لو بلا اور سبز گنبد تو دکھا                        حاضری کی آرزو نے کردیا پھر بے قرار

قافلے والو سُنو یاد آئے تو میرا سلام            عرض کرنا روتے روتے ہوسکے تو بار بار

گنبدِ خضریٰ کے جلوے اور وہ افطاریاں                  یاد آتی ہیں بہت رمضانِ طیبہ کی بہار

غمزدہ یوں نہ ہوا ہوتا عبیدِ قادری                        اِس برس بھی دیکھتا گر سبز گنبد کی بہار

اَلجَوَابْ بِاسْمِ مُلْہِمِ الصَّوَابْ

اگر شاعر کوئی شرکیہ عقیدہ نہ رکھتا ہو مثلا آپﷺ کو حاضر ناظر ، حاجت روا، مختار کل یا عالم الغیب وغیرہ ماننا تو ایسے اشعار پڑھنا جائز ہے اور اگر عقیدے میں یہ خرابیاں موجود  ہوں تو جائز نہیں۔

سورۃ النساء:(48)

إن اللہ لایغفر أن یشرک بہ ویغفر ما دون ذلک لمن یشآء.

الفتاوی الھندیۃ:(2/258)

(ومنها ما يتعلق بذات الله تعالى وصفاته وغير ذلك) يكفر إذا وصف الله تعالى بما لا يليق به، أو سخر باسم من أسمائه، أو بأمر من أوامره، أو نكر وعده ووعيده، أو جعل له شريكا، أو ولدا، أو زوجة، أو نسبه إلى الجهل، أو العجز، أو النقص ويكفر بقوله يجوز أن يفعل الله تعالى فعلا لا حكمة فيه ويكفر إن اعتقد أن الله تعالى يرضى بالكفر كذا في البحر الرائق.

امداد الفتاوی:(5/385)

بإرادہ استعانت و استغاسہ یا باعتقاد حاضر ناظر منھی عنہ ہے، اور بدون اس اعتقاد کے محض شوقا استلذاذا ماذون فیہ ہے، چونکہ اشعار پڑھنے کی غرض اظہار شوق و استلذاذ ہوتا ہے، اس لیے توسع کیا گیا ہے، لیکن اگر کسی جگہ اس کے خلاف دیکھا جائے گا منع کردیا جائے گا۔