سوال

وسوسوں کی وجہ سے میں بار بار کلمہ پڑھتا رہتا ہوں۔ اسی وجہ سے غسل یا وضو کرتے وقت واش روم میں بھی کئی مرتبہ کلمہ پڑھ لیا۔ بعد میں جامعہ کے ایک فتویٰ میں پڑھا کہ واش روم میں اللہ تعالیٰ اور رسول اللہ ﷺ کا نام لینا درست نہیں۔ مجھے پہلے اس مسئلے کا علم نہیں تھا، اگرچہ دل میں اسے مناسب بھی نہیں سمجھتا تھا، اسی لیے باہر نکل کر دوبارہ کلمہ پڑھ لیتا تھا۔ یہ سب رمضان المبارک میں روزے کی حالت میں بھی ہوا۔ براہِ کرم بتا دیں کہ میرے روزوں اور نمازوں کا کیا حکم ہے؟ کیا وہ درست ہو گئے؟

اَلجَوَابْ بِاسْمِ مُلْہِمِ الصَّوَابْ

واش روم میں زبان سے کلمہ یا دیگر اذکار پڑھنا جائز نہیں، البتہ دل ہی دل میں کلمہ یا ذکر کرنا جائز ہے۔

لہٰذا اگر آپ نے لاعلمی کی وجہ سے واش روم میں زبان سے کلمہ پڑھ لیا، تو اس سے نہ کفر لازم آتا ہے اور نہ آپ کے روزے، نمازیں، وضو یا غسل پرکوئی اثر نہیں پڑتا؛اس لیے آپ کے روزے، نمازیں، وضو اور غسل سب درست ہیں۔

اگر کبھی لاعلمی یا بھول کی وجہ سے ایسا ہو جائے، تب بھی اس کی وجہ سے عبادات ناجائز یا باطل نہیں ہوتیں۔ نیز آپ نے جو بار بار کلمہ پڑھنے اور ایمان کے بارے میں شک کا ذکر کیا ہے، یہ وسوسے ہیں۔ ان پر توجہ نہ دیں، بلکہ «أعوذ بالله من الشيطان الرجيم» پڑھ کر اللہ تعالیٰ کی پناہ مانگیں اور ان وسوسوں کو نظر انداز کریں۔

(الدر المختار مع رد المحتار: 1/109)

وسننہ : ۔۔۔۔۔۔ البداء ۃ بالتسمیۃ قولا ۔۔۔۔ قبل الاستنجاء وبعدہ إلا حال انکشاف وفي محل نجاسۃ فیسمی بقلبہ .ولا یحرّک لسانہ تعظیمًا لاسم اللہ تعالی  .