سوال

ہم ایک عرصہ سے "فاریکس ایکسپرٹ ایڈوائزر ٹریڈنگ" کررہے ہیں اور ہم جس بروکر کے ساتھ کام کررہے ہیں اس کا نام Bitkrypton ہے ۔ اس میں ہم انویسٹمنٹ دیتے ہیں اور وہ اسے مختلف چیزوں میں تقسیم کردیتا ہے۔ مثلا خام تیل، سونا، چاندی اور مختلف ممالک کی کرنسیز میں ہمارا پیسہ تقسیم کردیتا ہے اور اس میں تجارت کرکے ہمیں روزانہ کی بنیاد پر نفع دیتا ہے۔ نفع کی جو شرح ہے وہ مکمل انویسٹمنٹ کا 0.50فیصد دیتا ہے۔ نفع ہفتہ میں پانچ دن ملتا ہے، ہفتہ اور اتوار مارکیٹ بند ہوتی ہے۔بروز پیر سے جمعرات نفع کی شرح0.50 فیصد  یکساں رہتی ہے اور جمعہ والےدن مارکیٹ بہت زیادہ اپ اور ڈاؤن ہوتی ہے۔ جمعہ والے دن نفع کی شرح 0.50 فیصد سے بڑھ بھی سکتی ہے اور کم بھی ہوسکتی ہے۔ مطلب یہ کہ نفع کی شرح فکس نہیں ہے۔ بروکر کے ساتھ ہمارا جو معاہدہ ہوتا ہے وہ عرصہ 730 دن پر مشتمل ہوتا ہےجو کہ ہمیں ماہانہ بنیاد پر نفع کی شرح 9 فیصد تا 14 فیصد تک دیتا ہے۔ بروکر جو کہ یہ عرصہ مکمل ہونے کے بعد ہماری اصل انویسٹمنٹ کی رقم واپس نہ کرتا ہے جبکہ صرف ہمیں نفع کی رقم وصول ہوتی ہے۔

اوپر ذکر کی گئی صورت میں کیا ہمیں ملنے والا منافع سود تو نہیں۔۔۔۔؟

اَلجَوَابْ بِاسْمِ مُلْہِمِ الصَّوَابْ

سوال میں مذکور تفصیل کے مطابق کمپنی اصل رقم واپس نہیں کرتی اور جو نفع دیتی ہے اس کی کم از کم مقدار (9 فیصد ماہانہ) مقرر ہے۔ کل عرصہ (730 دن)  میں یہ رقم اصل رقم سے کئی گنا زائد ہو جاتی ہے۔ اس طرح اصل رقم کمپنی بہرحال واپس کرتی ہے اور اس پر منافع کے نام پر اضافی رقم بھی دیتی ہے۔ اس تفصیل کے مطابق شریعت مطہرہ کی روشنی میں جمع کروائی جانے والی اصل رقم کمپنی پر قرض ہے اور بطور نفع دی جانے والی اضافی رقم سود ہے۔

حوالہ جات

"وقوله تعالى: {وحرم الربا} حكمه ما قدمناه من الإجمال والوقف على ورود البيان، فمن الربا ما هو بيع، ومنه ما ليس ببيع وهو ربا أهل الجاهلية وهو القرض المشروط فيه الأجل وزيادة مال على المستقرض."

(احکام القرآن للجصاص، 1/569، ط: دار الکتب العلمیۃ)

محمد اویس پراچہ     

دار الافتاء، جامعۃ الرشید

تاریخ: 12/ جمادی الاولی 1442ھ

واللہ سبحانہ وتعالی اعلم