سوال

ایک  مرحوم خاتون نے اپنی زندگی میں ہی اپنا گھر اپنے بیٹے کو گفٹ کردیا تھا کہ ایک ہی بیٹا ہے ،چھ بیٹیاں ہیں [۱یک کی وفات کو ۱۰ سال ہو گئے ہیں ، ایک غیر شادی شدہ ہے اور چار شادی شدہ ہِیں] پانچوں زندہ بیٹیوں کو دو،دو لاکھ روپے دے گئی ہیں ، اپنی تدفین و قبر کا خرچ بھی دے گئی ہیں ،جس بیٹی / بیٹا نے سونا کی کوئی چیز گفٹ کی تھی اس کو واپس کرنے کا کہا ہے اور جو کچھ بچا ہے وہ سب اپنی غیر شادی شدہ بیٹی کو دے گئی ہیں اور بیٹی کو اپنے ابو کا خیال ر کھنے کا کہا ہے ،اس خاتون کے شوہر صحت مند آدمی ہیں، مگر انھوں نے کمائی نہیں کی،غیر شادی شدہ بیٹی پڑھی لکھی ہے اور خود جاب بھی کرتی ہے ، اب اس غیر شادی شدہ بیٹی کا سوال یہ ہے کہ کیا یہ سب تقسیم شریعت کے مطابق ہے ؟ یا جو کچھ اس کی امی ا س کو دے گئی ہیں، اس میں سے کسی بہن بھائی کا حق نکلتا ہے ؟کیاوہ اس رقم میں سے صدقہ کرسکتی ہے ؟

اَلجَوَابْ بِاسْمِ مُلْہِمِ الصَّوَابْ

زندگی میں جائیداد اولاد کو دینا میراث نہیں ، ہدیہ ہے، لیکن پھر بھی بلاضرورت یا بلاکسی معقول وجہ ترجیح کے ساری جائیداد کسی ایک بیٹے  یا وارث کو دینا شرعا درست نہیں، کیونکہ شریعت نے ہدیہ دینے میں بھی انصاف کا حکم دیا ہے، اس لیےبیٹیوں کو جائیداد سے محروم کرکے صرف بیٹے  یا کسی ایک بیٹی کوساری جائیداد دینا ایک ظالمانہ رسم ہے،جس سے احتراز لازم ہے اور زندگی میں اس کا تدارک کرنا ضروری ہے، البتہ اگر کوئی صرف بیٹے یا بیٹی کو مالکانہ حقوق واختیارات کے ساتھ اپنی جائیدادیا کسی چیز کا مالک بنا دے تو وہ  قانونی طور پرمالک ہوجائے گا۔لہذا مرحومہ نے جس غیر شادی شدہ بیٹی کو دوسری بیٹیوں کے مقابلے میں مالکانہ اختیارات کےساتھ زیادہ دیا ہے وہ اس مال کی مالک ہے اور اس میں سے صدقہ کرسکتی ہے،لیکن اس بیٹی کوچاہئےکہ باقی ورثہ کوامتیازی ترجیح پرملنےوالی مال میں سے کچھ دےکرراضی کرلے تاکہ میت کے غلط اقدام کابوجھ اس سےکم ہوجائے۔

۔۔۔۔۔۔۔