نابالغ کا اِحرام اور حج و عمره:

نابالغ بچہ نفل عمره و حج کر سکتا ہے، اگر وه سمجھدار ہے تو اس کی طرف سے کوئی دوسرا اِحرام نہ باندھے، بلکہ ضروری ہے کہ وه خود احرام باندھے اور آگے حج يا عمره کے افعال بھي بچہ خود انجام دے، البتہ جو افعال وه خود نہيں انجام دے سکتا وه اس کی طرف اس کا کوئی رشتہ دار اس کا نائب بن کر ادا کر سکتا ہے۔ نيت بچے کی طرف سے ادا کرنے کی کرے گا۔

نابالغ اگر سمجھدار نہيں تو اس کا خود اِحرام باندھنا درست نہيں، کوئي رشتہ دار (بہتر يہ ہے کہ سب سے قريبی رشتہ دار ہو) اس کی طرف سے حج يا عمره کا احرام باندھے، آگے حج يا عمره کے افعال بھي بچہ سے نہيں کروائے گا بلکہ بچہ کی طرف سے نائب بن کر اس کی  طرف سے نيت کر کے طواف وغيره سارے افعال کرے گا، البتہ طواف کے بعد دو رکعتوں ميں نيابت درست نہيں ہے، لهٰذا وه بچہ کی طرف سے ادا نہيں کرے گا۔

واضح رہے کہ مذکوره بالا دونوں صورتوں ميں بہتر تو يہ ہے کہ بچے کو اِحرام کے ممنوعات سے بچايا جائے، اسے اِحرام کا لباس پہنايا جائے اور حج يا عمره کے سارے افعال اس سے کروائے جائيں يا اس کی طرف سے کيے جائيں ليکن اگر ان امور پر کسی عذر سے يا بلا عذر عمل درآمد نہ ہو سکے مثلاً بچہ احرام ميں ممنوع چيزوں کا ارتکاب کرلے يا سارے افعال نہ کرے، بعض چھوڑ دے تو اس کی کوئی جزا يا قضا نہ بچے کے اوپر ہے اور نہ اس کے بالغ رشتہ دار کے اوپر ہے۔(غنية الناسک: ص: ۸۳،۸۴)

احرام کی چادريں دھونا:

اِحرام کي چادريں ميلی  ہو جائيں تو اسے دھونا درست ہے، البتہ خوشبو دار سرف يا صابن سے دھو نا اور پھر انہيں پہننا جائز نہيں۔

       اِحرام ميں انجکشن:

اِحرام کي حالت ميں انجکشن لگوانے ميں حرج نهيں۔

طواف ميں اضطباع:

حالت ِ احرام ميں اضطباع يعنی داياں کندھا کھلا رکھنا صرف اس طواف کی  حالت ميں مسنون ہے جس کے بعد صفا و مروه کی سعی بھی کرنی ہو۔ اس کے علاوه نہيں، لہذا عام حالات ميں کندھا ڈھانکنا چاہیے، خصوصاً نماز کی حالت ميں۔(فتاوی شامية:۳/ ۵۵۸)

اِحرام کب باندھنا لازم هے؟

اپنے اوپر اعتماد ہو کہ ممنوعات ِ اِحرام کا ارتکاب نہیں کرے گا تو گھر ہی سے اِحرام باندھنا اور جتنا پہلے ہو سکے (حج کے مہینوں کے اندر اندر) اِحرام باندھنا مستحب ہے، ليکن اگر کسی کو خدشہ ہو کہ احرام کی پابنديوں کی  رعايت نہیں  کرسکے گا، تو اس کے ليے احرام ميں جتنی تاخير ممکن ہو، مستحب ہے، البتہ درجِ ذيل جگہوں سے (جنہیں مواقيت) کہتے ہیں بغير احرام کے گزرنا جائز نہیں، اس سے پہلے احرام باندھنا واجب ہے، يہ پانچ جگہیں درجِ ذِيل ہيں:

1:۔’’ذوالحليفه‘‘ (آج کل اس کو ’’ابيارِ علي‘‘ کہتے ہيں) مدينہ منوره سے آنے والوں کے لئے  یہاں احرام باندھنا ضروری  ہے۔

2:۔’’جحفہ‘‘ مصر، شام، مغربی  علاقے اور تبوک سے آنے والے لوگوں کے لئے ميقات ہے، آج کل يہ بستی  چونکہ ويران ہو چکی ہے، اس لئے اس کے ساتھ اس سے تھوڑا سا پہلے بستی  ’’رابغ‘‘ ہی سے لوگ اِحرام باندھتے ہيں۔

3:۔’’قرن المنازل‘‘ (آج کل اس کو ’’سيل‘‘ کہتے  ہيں) اہل نجد، رياض اور طائف کی طرف سے آنے والے يہاں سے اِحرام باندھتے ہيں۔

4:۔’’ذاتِ عرق‘‘ اہل عراق يعنی  بصره اور کوفہ کے لوگوں کے ليے يہ ميقات ہے، ليکن اس بستی  کے اثرات بھی  مٹ گئے ہيں، لہذا بہتر يہ ہے کہ عقيق (جو اس سے پہلے ہے) سے اِحرام باندھا جائے۔

5:۔’’يلملم‘‘ (آج کل اس کو ’’سعديہ‘‘ کہتے ہيں) پاکستان، ہندوستان اور يمن کے لوگوں کے ليے ميقات ہے۔( غنية الناسک: ص: ۵۰۔۵۲)

ان پانچ مقامات سے بری يا بحری راستے سے بغير اِحرام کے آگے گزرنا حرام و ناجائز ہے۔

ميقات سے اِحرام کا مطلب:

مذکوره مقامات سے ہر اس شخص کے لئے بغير احرام کے آگے جانا جائز نہيں جس کا گزر یہاں سے ہو، اگرچہ وه دوسری جگہ کا رہنے والا ہو مثلاً ايک پاکستانی  عراق کی طرف سے حرم آرہا ہو تو اس کے لئے  عقيق سے اِحرام باندھنا ضروری ہے ، اِحرام کے بغير نہ گزرنے کا مطلب يہ ہے کہ حج يا عمره کا اِحرام باندھے گا اور اس پر حج يا عمره (جس کا بھی  احرام باندھا ہو) کرنا بھی  ساتھ لازم ہوگا، اگر نہیں کيا تو اس کی قضا لازم ہوگی ۔

اگر راستے ميں دو ميقات ہوں:

اگر کسی  شخص کے راستے ميں دو ميقات آرہی ہوں مثلاً مدينہ سے آنے والے شخص کے سامنے ذوالحليفہ(ابيارعلی) اور پھر اس کے بعد جحفہ (رابغ) دو ميقاتيں ہوتی ہيں تو ايسے شخص کے ليے افضل تو يہ ہے کہ پہلے والی ميقات سے اِحرام باندھے ليکن اگر دوسری ميقات سے اِحرام باندھے تو بھی کوئی  گناه يا جزا لازم نہیں هوتی۔( غنية الناسک ،ص: ۵۳)

ايک ميقات پر گزر ہو اور دوسری محاذاة ميں ہو:

کسی ميقات کی محاذاة سے احرام باندھنا جب جائز ہے جب حقيقی ميقات سے گزر نہ ہو، لہذا جس شخص کے سامنے دو ميقات آرہی ہوں، ايک ميقات پر سے وه حقیقةً گزرے گا، جبکہ دوسری ميقات پر اس کا حقيقی گزر نہیں ہوگا، بلکہ وه راستے ميں اس سے آگے کسی جگہ اس کی  محاذاة ميں آئے گی تو ايسی صورت ميں جس ميقات سے اس کا حقيقی گزر ہوگا اس سے اِحرام باندھنا لازم ہے، اگر محاذاة کی جگہ سے اِحرام باندھے گا تو يہ درست نہیں ہوگا (فتاوی شامیۃ: ۳/ ۵۵۱) اور اس پر بغير اِحرام کے ميقات عبور کرنے کي وجہ سے دَم بھی لازم آئے گا۔

البتہ اگر محاذاة والی ميقات پہلے آتی ہے تو اس سے اِحرام باندھنے ميں حرج اس لئے نہیں کہ حقيقی ميقات سے پہلے احرام باندھنا جائز بلکہ افضل ہے۔

حل ميں جانے والے پر اِحرام ضروری نہیں:

ميقات سے بغير اِحرام کے گزرنا کسی شخص کے لئے جائز نہیں، خواه وه حج، عمره کی  نيت سے جا رہا ہو يا کسی اور کام سے حرم ميں جانے کا اراده رکھتا ہو، البتہ اگر کسی کی ميقات سے گزرنے کی  نيت تو ہو ليکن آگے حرم ميں جانے کی نيت بالکل نہ ہو بلکہ  ’’حل‘‘ (حرم اور ميقات کے درميان) جانے کي نيت ہو، نيز راستے ميں حرم پر اس کا گزر بھی نہ ہو تو اس کے ليے ميقات سے اِحرام کے بغير گزرنا جائز ہے۔( غنية الناسک: صـ: ۵۴)

مکی اگر ميقات سے باہر چلا جائے:

اگر مکہ اور حرم کا رہائشی سفر کر کے ميقات سے باہر آجائے تو اس کے ليے بھی واپس جاتے ہوئے ميقات سے اِحرام باندھنا لازم ہے۔(فتاوی شامیہ: ۳/ ۵۵۴)

ميقات سے اِحرام کے بغير گزرنے کی  ايک جائز صورت:

اگر کسی حج و عمره پر جانے سے پہلے ہی  ’’حل‘‘ ميں کوئی  کام درپيش ہو اور اس کا اراده يہ ہو کہ ميں پہلے ’’حل‘‘ کے کسی  مقام مثلاً جده جاؤں گا، وہاں سے مقصد پورا ہونے کے بعد حرم ميں بھی حج يا عمره يا کسی  اور کام سے جاؤں گا تو ايسے شخص کے ليے بغير اِحرام باندھے ميقات عبور کرنا جائز ہے، وه پہلے جده ميں اپنا کام انجام دے، اس کے بعد حج يا عمره کے ليے وہیں سے اِحرام باندھ کر حرم چلا جائے۔ (تفصيل کے لئے حضرت مفتی رشيد احمد صاحب رحمہ الله تعالیٰ  کا رسالہ ’’حيلۂ دخولِ مکہ بلا اِحرام‘‘ ملاحظہ ہو)

نيز اس صورت ميں جده سے اِحرام باندھنا جب ضروری ہے جب حج يا عمره کے ليے حرم ميں جانے کی  نيت ہو، اگر کسی  اور ضرورت سے جانے کی نيت ہو تو پھر اِحرام باندھنے کی  ضرورت نہیں۔(ردالمحتار: ۳/ ۵۵۳،۵۵۴)

جو شخص دو ميقاتوں کے درميان رہتا ہو:

اگر کوئی شخص ايسا ہو کہ بعض جگہوں کے اعتبار سے تو ميقات کے اندر ہو ليکن کسی دوسری ميقات سے باہر ہو تو اس کے ليے دوسری ميقات سے پہلے پہلے اِحرام باندھنا لازم ہے، مثلاً ايک آدمی ذوالحليفہ اور جحفہ کے درميان رہتا ہو تو اس کے ليے حرم آتے وقت (خواه ويسے آرہا ہو يا حج عمره کے لئے آرہا ہو دونوں صورتوں ميں) جحفہ سے پہلے پہلے حج يا عمره کا اِحرام باندھنا لازم ہوگا۔(غنية الناسک: ص: ۵۶)

اہل حرم کے ليے ميقات:

جو لوگ حرم کے اندر موجود ہوں وه حج کرنا چاہيں تو حج کا اِحرام جہاں وه ہيں وہيں سے باندھنا لازم ہے اور خلاف ورزی  پر دَم لازم ہوگا، البتہ عمره کے اِحرام کے ليے حرم سے نکل کر حل کی زمين ميں آنا واجب ہے، خلاف ورزی پر دَم لازم ہوگا، بہتر يہ ہے کہ تنعيم ميں آکر عمره کا اِحرام باندھيں۔( ردالمحتار: ۳/ ۵۵۳،۵۵۴) اس لئے  کہ يہ قريب پڑتا ہے، نيز اس لئے  بھی کہ حضرت عائشہ رضی الله تعالیٰ عنہا کو رسول اللهﷺنے يہیں سے عمره کا اِحرام باندھنے کا حکم ديا تھا۔

جده:

جده ائير پورٹ پر کاغذی کارروائی ميں تقريباً چھ سے باره گھنٹے لگ جاتے ہيں، نيز یہاں سے فراغت کے بعد آپ کے معلم کا وکيل مکہ مکرمہ جانے کے ليے سواری کا انتظام کرے گا، اس  ميں بھی کبھی کبھی ايک دِن يا دو دِن تاخيرہوجاتی ہے، صبر وتحمل سے کام ليجئے اور ذکر وعبادت ميں مشغول رہیے۔

حدودِ حرم:

مرکز جده سے مسجد الحرام تک کل فاصلہ 80 کلو ميٹر ہے،جبکہ حدودِ حرم کی ابتدا سے مسجد الحرام تک فاصلہ 23 کلوميٹر ہے، حدودِ حرم سے تقريباً 2 کلوميٹر پہلے ايک چيک پوسٹ ہے، یہاں سے ايک سڑک الگ ہوتی ہے جو غير مسلموں کے ليے مختص ہے، اس پر ايک بورڈ ہے جس پر ’’لغير المسلمين‘‘ لکھا ہوا ہے۔اس سے تقريباً دو کلوميٹر بعد حدودِ حرم شروع ہوتی  ہيں، يہاں سڑک کے دونوں طرف آغازِ حدودِ حرم کی علامت کے طور پر محراب نما ستون بنے ہوئے ہيں اور ’’بدایۃ حد الحرم‘‘ کا بورڈ لگا ہوا ہے۔

اس سے چار کلوميٹرآگے سڑک کے اوپر ايک بہت بڑی رحل بنی ہوئی ہے،جس کے بارے  ميں پہلے مشهو ر تھا کہ يہ آغازِحدودِ حرم ہے، اَگر اب بھی  کسی  کا يہ خيال ہو تويہ درست نہیں۔

حدودِ حرم پہنچ کر يوں دُعاء کيجئے: