اسی طرح اس حدیث میں حج نہ کرنے کو یہود ونصاریٰ کا عمل قرار دیا ہے کیونکہ یہود ونصاریٰ حج نہیں کیا کرتے تھے۔(مناسک الملا علی القاری: صـ ۳۱)

ان سب اَحادیث کاتقاضا یہ ہے کہ جب حج فرض ہو جائے یعنی ایک آزاد، عاقل، بالغ اَور تندرست مسلمان کے پاس حوائج اصلیہ(یعنی رہنے کا گھر،لباس،نوکر، سواری، گھریلو سامان، زراعت کا سامان، اہل و عیال کے واپسی تک کے خرچ اَور قرض وغیرہ) کے علاوہ اتنا مال ہو کہ عادت اَور حیثیت کے مطابق زادِ راہ یعنی خانہ کعبہ آنے اَور جانے کے خرچ کے لیے کافی ہو، راستہ بھی پرامن ہو، اَگر عورت ہے تو محرم بھی ہو، اَگر اتنا خرچ نقد موجود نہ ہو لیکن ملکیت میں اتنا زیور ہو یا فوری ضرورت سے زائد اتنا سامان (مثلاً سامانِ تجارت) ہو کہ اس کی مالیت سے اخراجات پو رے ہو سکتے ہوں تو ان سب صورتوں میں حج فرض ہے، اس کے بعد تاخیر کرنا جائز نہیں، جو جتنی تاخیر کرے گا اتنا ہی گناہ گار ہو گا۔(شامیة: ۳/ ۵۲۱)

اِمام اعظم، اِمام مالک، اِمام احمد اَور اِمام ابو یوسف رحمہم اللہ تعالیٰ کے نزدیک اِستطاعت کے بعد حج فی الفور فرض ہو جاتا ہے،لہٰذا فرض ہونے کے بعد پہلے ہی سال اَدا کرنا ضرورِی ہے۔(ردالمحتار: ۳/ ۵۱۵ ۔ ۵۲۰)

کیونکہ حج کا وَقت متعین ہے اَور موت کا کوئی وَقت متعین نہیں، آیندہ سال حج کے موسم سے پہلے موت کا آنا بالکل ممکن ہے، بلکہ بسا اوقات موت واقع بھی ہو جاتی ہے، اس لیے باوجود قدرت کے تاخیر کرنا گویا حج کو ضائع کرنا ہے۔ )ردالمحتار: ۳/ ۵۲۰، ۵۲۱)

نبی کریم ﷺ نے فرمایا ہے: ’’جو حج کا ارادہ کرے اس کو جلدی کرنالازم ہے، اس لئے کہ کبھی آدمی بیمارہوجاتاہے یااورکوئی حاجت پیش آجاتی ہے۔‘‘) کنز العمال: ۵/ ۸، رقم الحدیث: ۱۱۸۸۷(

اِس بناء پر والدین اَگر اِجازت نہیں دیتے تو ان کی اِجازت کے بغیر بھی حج فرض کے لیے جانا ضرورِی ہے، الا ّیہ کہ وہ خدمت کے اَیسے محتاج ہوں کہ حج پر جانے کے بعد ان کے ناقابلِ تحمل مشقت میں پڑنے کا خطرہ ہو تو پھر ان کی اجازت کے بغیر جانا جائز نہیں۔) الشامیۃ: ۲/ ۴۵۶)

حج میں تاخیر کے بعض من گھڑت اعذار

بعض لوگ حج فرض ہونے کے باوجود حج اَدا کرنے سے غفلت برتتے ہیں اَور مختلف قسم کی غلط تأویلیں اَور لچر قسم کے بہانے پیش کرتے ہیں۔ ذیل میں اَیسے لوگوں کی کچھ تأویلیں پیش کی جا رہی ہیں جو اَحادیث بالا میں بیان کردہ وعیدوں کی روشنی میں بالکل غیر معتبر ہیں۔

پہلے نماز روزہ تو کرلیں:

کچھ لوگ یہ عذر پیش کر تے ہیں کہ حج پر تو بعد میں جائیں گے، پہلے نماز روزہ کے پابند تو ہو جائیں۔ حالانکہ یہ ایک من گھڑت عذر ہے، حج کا فرض ہونا نماز روزہ کی پابندی پر کہاں موقوف ہے؟ نیز نماز روزے کی پابندی بھی تو اپنے اِختیار میں ہے، جب چاہیں پابند ہو جائیں،کیا مشکل ہے؟ اَور سب سے اَہم بات یہ کہ حج سے آدمی کی روحانی تربیت ہو تی ہے، جب 40 سے 50 روز تک گھر سے باہر رہ کر صرف حرم ِپاک اَور مسجد ِنبوی میں وَقت گزرے گا اَور عبادت والا ایک خاص ماحول میسرہو گا تو یہی زندگی میں انقلاب کا ذریعہ بنے گا اَور اپنے مقام پر بھی نماز روزہ اَور دیگر فرائض و واجبات کی پابندی آسان ہو جائے گی، لہٰذا اَگر نماز روزہ کی پابندی نہیں تو فریضۂ حج کی اَدائیگی اس کا ایک مؤثر علاج ہے،لہٰذا اس میں تاخیر کی بجائے جلد اَز جلد اسے اَدا کرنے کا اہتمام کرنا چاہیے۔

دِیگر فرائض:

کچھ لوگ یہ کہتے ہیں کہ ایک حج ہی اَدا کر نے کے لیے رہ گیا ہے؟ اَور بھی تو بہت سارے فرائض ہیں، والدین کی خدمت ہے، رشتہ داروں کے حقوق ہیں، بچوں کی تعلیم ہے، پہلے ان کو پورا کر لیں، پھر حج بھی کر لیں گے،اتنی جلدی کیا ہے؟

اَیسے لوگ درج ذیل اَحادیث پر غور کریں:

حضور ﷺکا ارشاد ہے:

1:۔’’جو حج کا ارادہ کرے اسے چاہیے کہ جلدی کرے۔‘‘(مشکوٰة: صـ ۲۲۲)

2:۔’’فرض حج میں جلدی کرو، نہ معلوم کیا بات پیش آ جائے۔‘‘(مختصر الترغیب والترہیب: صـ ۱۳۱، رقم الحدیث: ۳۵۸)

3:۔’’حج میں جلدی کرو، کسی کو بعد کی کیا خبر؟کوئی مرض پیش آجائے، کوئی اَورضرورت لاحق ہو جائے۔‘‘(کنز العمال: ۵/ ۸، رقم الحدیث: ۱۱۸۵۱)

گناہوں کے خوف یا حرص کی بناء پر حج میں تاخیر:

کچھ لوگ حج پر اس لئے نہیں جاتے کہ بھائی ابھی جوانی ہے، گناہوں سے بچنا مشکل ہے، ابھی حج کر لیا تو پھر گناہ ہوتے رہیں گے۔ اس لئے بس زندگی کے آخری اَیام میں حج کریں گے تاکہ بعد میں پھر کوئی گناہ نہ کریں۔

یہ بھی نفس و شیطان کا فریب ہے۔ در حقیقت گناہوں کی حرص اس تاخیر کا باعث ہے۔ ابھی گناہ چھوڑنا نہیں چاہتے، اس لئے حج نہیں کرتے،حالانکہ گناہوں کا چھوڑنا تو ہر حال میں فرض ہے، خواہ جوانی ہو یا بڑھاپا۔ اَگر گناہوں کی حرص اس کا سبب نہ ہو بلکہ حج کے بعد پھر گناہوں میں مبتلا ہونے کا خوف ہی اس کا سبب ہو تو بھی حج میں تاخیر کا کوئی جواز نہیں۔ کیونکہ:

اولاً :۔تو حج میں تاخیر خود گناہ ہے۔

ثانیاً :۔یہ تو معلوم نہیں کہ زندگی کتنی ہے؟ معلوم نہیں کب موت آجائے؟ اَگر زندگی کے آخری اَیام کے اِنتظار میں موت آگئی تو پھر کیا ہوگا؟

ثالثاً :۔سچی بات یہ ہے کہ حج کا اَصل لطف در حقیقت جوانی ہی میں ہے،اس لئے کہ حج میں جسمانی مشقت اَور محنت کی ضرورت ہوتی ہے اَور حج کے افعال اسی وَقت نشاط اَور ذوق وشوق کے ساتھ انجام دئیے جا سکتے ہیں جب انسان کے اعضاء مضبوط ہوں اَور وہ اطمینان کے ساتھ یہ محنت برداشت کر سکتا ہو۔ بڑھاپے میں انسان اَگر چہ جوں توں کر کے حج کر لیتا ہے، لیکن کتنے کام اَیسے ہیں جنہیں نشاط، چستی اَور حضورِ قلب کے ساتھ انجام دینے کی حسرت دِل میں ہی  رہ جاتی ہے۔

رابعًا:۔حج اَگر اِخلاص اَور نیک نیتی کے ساتھ صحیح طور پرانجام دیا جائے تو تجربہ یہ ہے کہ وہ انسان کے دِل میں ضرور ایک انقلاب پیداکرتا ہے،اس سے انسان کے دِل میں نرمی، اللہ تعالیٰ کے ساتھ تعلق اَور آخرت کی فکر پیدا ہوتی ہے جو اسے گناہوں، جرائم اَور بدعنوانیوں سے روکتی ہے۔قلب وذہن کی اس تبدیلی کی سب سے زِیادہ ضرورت انسان کو جوانی میں ہوتی ہے، کیونکہ اس کے بغیر وہ جوانی کی رو میں غلطیاں کرتا چلا جاتا ہے۔

در جوانی توبہ کردن شیوۂ پیغمبری است             وَقت پیری گرگ ظالم می شود پرہیزگار

’’جوانی میں ظلم اَور گناہ سے توبہ پیغمبروں کا شیوہ ہے،بڑھاپے میں تو ظالم بھیڑیا بھی پرہیز گار بن جاتا ہے۔‘‘

بچوں کی شادیوں کا مسئلہ:

یہ غلط فہمی بھی بہت سے لوگوں کے ذہن میں پائی جاتی ہے کہ جب تک تمام اولاد کی شادیاں نہ ہو جائیں،اس وَقت تک حج نہیں کر نا چاہیے۔یہ خیال بھی سراسر غلط ہے جس کی کوئی بنیاد نہیں۔حقیقت یہ ہے کہ حج کی فرضیت کا اولاد کی شادیوں سے کوئی تعلق نہیں۔ جس شخص کو بھی مذکور بالا معیار کے مطابق اِستطاعت ہو اس کے ذِمے حج فرض ہو جاتا ہے، خواہ اولاد کی شادیاں ہوئی ہوں یا نہ ہوئی ہوں۔

نیز آج کل ناجائز رسم و رواج نے شادی کو متوسط اور غریب طبقہ کے لیے وبالِ جان بنا دیا ہے، اگر سنت طریقے کے مطابق شادی کی جائے تو حج کو ملتوی یا مؤخر کرنے کی ضرورت پیش نہیں آتی، یہ کام تو ایک دن میں بھی ہو سکتا ہے کہ لڑکی کا نکاح کرایا، پھر سادگی سے اس کی رخصتی کرادی اور بس۔

رسول ﷲ ﷺ نے ارشاد فرمایا: ’’حج نکاح سے مقدم ہے۔‘‘(کنز العمال، رقم الحدیث: ۱۱۸۸۰)

جب تک گھر کا بڑا فرد حج نہ کر لے:

بعض گھرانوں میں یہ رواج بھی دیکھنے میں آتا ہے کہ جب تک گھر کا بڑا فرد حج نہ کرلے، اس وَقت تک چھوٹے حج کرناضرورِی نہیں سمجھتے، بلکہ بعض گھرانوں میں اس کو ایک عیب سمجھا جاتا ہے کہ چھوٹا بڑے سے پہلے حج کر آئے، حالانکہ دوسری عبادتوں یعنی نماز، روزے اَور زکوٰة کی طرح حج بھی ایک اَیسا فریضہ ہے جو ہر شخص پر انفرادی طور پر عائد ہو تا ہے،خواہ کسی دوسرے نے حج کیا ہو یا نہ کیا ہو۔ اَگر گھر کے کسی چھوٹے فرد کے پاس حج کی اِستطاعت ہے تو اس پر حج فرض ہے، اَگر بڑے کے پاس اِستطاعت نہ ہو یا اِستطاعت کے باوجود وہ حج نہ کر رہا ہو تو نہ اس سے چھوٹے کا فریضہ ساقط ہو تا ہے، نہ اسے مؤخر کرنے کا کوئی جواز پیدا ہو تا ہے۔

والدین نے حج نہیں کیا:

بعض لوگ سمجھتے ہیں کہ جب تک اولاد اپنے ماں باپ کو حج نہ کرائے اَور ماں باپ حج نہ کر لیں اس وَقت تک اولاد حج نہیں کر سکتی،اس لئے پہلے وہ والدین کو حج کرانے کی فکر میں رہتے ہیں، والدین اگر غریب ہیں تو ان پر حج فرض نہیں ہوتا اوراولاد اگر مالدار ہے تو ان پر فرض ہوتا ہے۔ اولاد پر ماں باپ کو حج کرانا ہر گز فرض نہیں۔ اَگر اولاد پر حج فرض ہوجائے تو وہ اپنا حج کر یں، پھر اَگر اللہ تعالیٰ مزید اِستطاعت دیں تو والدین کو بھی حج کرادیں۔

بغیر بیوی کے حج نہ کرنا:

بعض لوگوں پر حج فرض ہوتا ہے اَور ان کے پاس اس قدر پیسے ہوتے ہیں جن سے وہ خود تو حج کر سکتے ہیں، مگر اپنی بیوی کو حج پر لے جانے کی اِستطاعت نہیں رکھتے، وہ بیوی کے اصرار کی وجہ سے یا اپنی مرضی سے اس اِنتظار میں رہتے ہیں کہ جب بیوی کو ساتھ لے جانے کے قابل ہو ں گے اس وَقت میاں بیوی دونوں ساتھ حج کر نے جائیں گے۔واضح رہے کہ بیوی کو ساتھ لے جانے کے اِنتظار میں حج کو مؤخر کرنا درست نہیں، خاوند کو چاہیے کہ اس وَقت وہ خود حج اَدا کر لے، پھر بعد میں اللہ تعالیٰ توفیق دیں تو بیوی کو بھی حج کرادے۔

ابھی بچے چھوٹے ہیں:

بعض لوگ عموماً عورتیں یہ بہانہ بناتی ہیں کہ ابھی بچے چھوٹے ہیں اَور ہم نے کبھی بچوں کو اکیلا نہیں چھوڑا، انہیں اکیلا چھوڑ کر کیسے جائیں؟ یہ بھی محض ایک بہانہ ہے، ان کو اَگر دوسری جگہ کا سفر در پیش ہو یا کسی مرض کی وجہ سے ہسپتال جا نا پڑے تو اس وَقت چھوٹے بچوں کا سب انتظام ہو جاتا ہے، جب وہاں انتظام ہو سکتا ہے تو حج کے لیے جانے کی صورت میں بھی انتظام ہو سکتا ہے، اس لئے بچوں کی حفاظت کا مناسب بندوبست کر کے حج اَدا کرنے کی فکر کرنی چاہیے۔ اَلبتہ اَگر عورت حاملہ ہو اَور اَیام حج میں ولادت کا امکان ہو تو اسے حج مؤخر کرنے کی اِجازت ہے۔

ماحول نہیں:

اَگر کسی کو یاد دلائیں کہ بھائی آپ صاحب ِ اِستطاعت ہیں، آپ کے اوپر حج فرض ہے، اس کو اَدا کیجئے! تو جواب دیا جاتا ہے کہ ہمارے گھر میں ماحول نہیں، اس قسم کی باتیں ہمارے یہاں نہیں ہوتیں اَور والدین اِجازت نہیں دیتے اَور جب تک ماحول نہ ہو اَیسا کرنے کا کیا فائدہ؟ مگر شرعاً یہ کوئی عذر نہیں، والدین کی اِجازت یا اَیسا ماحول فریضۂ حج کی اَدائیگی کے لیے ضرورِی نہیں۔ یہ بہانہ آخرت میں بالکل نہ چل سکے گا۔

حج نہ کرنے کے حیلو ں کا جواب:

حج نہ کرنے کے مذکورہ تمام حیلوں اَور بہانوں کا ایک ہی جواب ہے کہ رسول کریم ﷺ نے فرمایا: ’’جس شخص کے لیے واقعةً کو ئی مجبوری حج کرنے میں حائل نہ ہو یا ظالم بادشاہ کی طرف سے کوئی رکاوٹ نہ ہو یا اَیسی شدید بیماری لاحق نہ ہو جو حج کرنے سے روک دے، پھر بھی وہ بغیر حج کئے مر جائے تو اسے اِختیار ہے چاہے یہودی ہو کر مرے یا عیسائی ہو کر مرے۔‘‘ (مشکوٰة: ۱/ ۲۲)1

ایک اَہم تنبیہ:

آخر میں یہ بات بھی ملحوظ رہے کہ جن حضرات کی درخواستیں منظور ہو جائیں، انہیں جانے سے پہلے حج کے مکمل احکام وآداب سیکھنے چاہئیں، اس کے لیے ہر زبان میں کتابیں بھی موجود ہیں اَور ملک کے مختلف حلقوں کی طرف سے حج کے تربیتی کورس بھی منعقد ہو تے ہیں، ان میں شرکت کر نی چاہیے، عموماً درخواست کی منظوری اَور حج کیلئے رَوانگی کے درمیان خاصا طویل وقفہ ہوتا ہے،جو حج کے احکام وآداب سیکھنے کیلئے بہت کافی ہے،بہت سے حضرات اس طرف توجہ دئیے بغیر حج کے لیے روانہ ہو جاتے ہیں اَور اتنا خرچ اَور مشقت اٹھا کر بھی صحیح طریقے کے مطابق حج کرنے سے محروم رہتے ہیں۔ دنیا میں کھیلوں کے آداب وقواعد مستقل فن کی صورت اِختیار کر گئے ہیں، دِل مانے یا نہ مانے ان کی پابندی کرنا پڑتی ہے تو حج تو ایک عبادت ہے، بڑی مقدس اَور عظیم الشان عبادت، لہٰذا اس کے احکام وآداب سیکھنا اَور ان کی پابندی کرنا نہایت ضرورِی ہے۔ اَگر اپنی من مانی کرنی ہے تو حج کے تکلف کی ضرورت ہی کیا ہے؟