سوال

میرا تعلق مسلکِ دیوبند سے ہے۔ ہماری مسجد میں ہر اتوار جماعت اسلامی کی طرف سے مقرر کردہ ایک مدرس درسِ قرآن دیتا ہے، جو انہیں کے نظریات کا حامل ہے۔یہ درس اس وجہ سے جاری ہے کہ ہمارے قریب جماعتِ اسلامی کی ایک مسجد واقع ہے جہاں ہم تبلیغی جماعت کے اعمال (بیانات، ترتیب، گشت وغیرہ) کے لیے جاتے ہیں۔ اگر ہم اُنہیں اپنی مسجد میں درسِ قرآن دینے سے منع کریں تو وہ لوگ ہمیں اپنی مسجد میں تبلیغی اعمال کی اجازت نہیں دیتے۔

تواب سوال یہ ہے کہ  ان لوگوں کا ہماری مسجد میں درس قرآن دینا جائز ہے یا نہیں ؟

اَلجَوَابْ بِاسْمِ مُلْہِمِ الصَّوَابْ

صورتِ مسئولہ میں اگر اس درس میں کوئی واضح فکری یا اعتقادی انحراف نہ ہو اور درسِ قرآن کے ذریعے فتنہ و اختلاف کے بجائے خیر و ہدایت کا پہلو غالب ہوتو جماعت اسلامی کی طرف سے مقرر کردہ  مدرس کا درسِ قرآن دینا درست ہے۔نیز، یہ بھی ملحوظ رہے کہ جماعتِ اسلامی کے بانی مولانا مودودیؒ کے بعض افکار و نظریات پر جمہورِ امت کی طرف سے نقد و اختلاف موجود ہے، لیکن اُن کے بعد آنے والے بعض قائدین نے ان متنازع نظریات کی نہ صرف تائید سےگریز کیا،بلکہ بعض نے ان سے براءت کا اظہار بھی کیا ہے۔(تبویب: 73868)