سوال

میری شادی کو نو ماہ مکمل ہو چکے ہیں اور میری بیوی کو جو اس کے والدین کی طرف سے سونا ملا تھا وہ تقریباً دو تولہ ہے اور وہ سونا اس کے والدین نے اس کو تقریباً چار ، پانچ سال قبل ہی ملکیت میں دے دیا تھا ۔معلوم کرنے پر پتہ چلا کہ جب سے والدین نے دیا ہے تب سے ایک سال بھی زکوٰۃ نہیں نکالی اور وجہ یہ بتائی گئی کہ سونے پر زکوۃ جب ہوتی ہے تب وہ ساڑھے سات تولہ ہو ،اب چونکہ وہ تقریباً دو تولہ ہے تو زکوٰۃ نہیں ،لیکن اس دوران نقد رقم ہمیشہ موجود رہتی تھی چاہے تھوڑی ہی کیوں نہ ہو ،اب سوال یہ ہے کہ کیا زکوٰۃ کا نصاب اس صورت میں سونے سے دیکھا جائے گا یا ساڑھے باون تولہ چاندی کی قیمت سے  ؟

اَلجَوَابْ بِاسْمِ مُلْہِمِ الصَّوَابْ

واضح رہے کہ اگر کسی شخص کے پاس سونا یا چاندی نصاب سے کم مقدار میں ہو،لیکن اس کے علاوہ اس کے پاس ضرورت سے زائد  نقد رقم بھی ہو،اگرچہ نہایت کم مقدار میں ہو،اور اس سونے اور رقم کی مجموعی قیمت چاندی کے نصاب(ساڑھے باون تولہ) کی قیمت تک پہنچ جائے تو سال گزرنے کے بعد اس پر زکاۃ فرض ہو گی، سونے کے نصاب کی قیمت تک پہنچنا ضروری نہیں ۔

لہذا  صورت مسئولہ میں دو تولہ سونے کے ساتھ کچھ رقم مل جائے تو ان کی مجموعی قیمت چاندی کے نصاب کی قیمت تک پہنچ جاتی ہے ، لہذا اس پر زکا ۃ واجب ہوگی ۔

(الدر المختارمع رد المحتار:2/ 303) :

فلو ضم حتى يؤدي كله من الذهب، أو الفضة فلا بأس به عندنا، ولكن يجب أن يكون التقويم بما هو أنفع للفقراء رواجا.

وكذا فيه :(وشرط كمال النصاب)ولو سائمة (في طرفي الحول) في الابتداء؛ للانعقاد،وفي الانتهاء؛ للوجوب (فلا يضر نقصانه بينهما)۔ فلو هلك كله بطل الحول.

(بدائع الصنائع، کتاب الزکوٰۃ، فصل فیما إذا كان ذهبا مفردا، ج:2، ص:410):

أما ‌إذا ‌كان ‌له ذهب مفرد فلا شيء فيه حتى يبلغ عشرين مثقالا فإذا بلغ عشرين مثقالا ففيه نصف مثقال.

(الفتاوى التاتارخانية، كتاب الزكوة، فصل في زكوة المال، ج:3، ص:157):

ويضم الذهب إلى الفضة، والفضة إلى الذهب، ويكمل إحدى النصابين باالأخر عند علمائنا.... ثم قال أبو حنيفة: يضم باعتبار القيمة.... وقال ابويوسف و محمد: يضم باعتبار الأجزاء يعني بالوزن .