سوال

اگر حکومت یا متعلقہ ادارے ایسی قیمتیں مقرر کریں جن میں پیسوں کی ادائیگی کا عملی نظام موجود نہ ہو، تو کیا یہ بدعنوانی یا لوگوں کے حقوق تلف کرنے کے زمرے میں آتا ہے؟ اس بارے میں شریعت کی رہنمائی کیا ہے؟

اَلجَوَابْ بِاسْمِ مُلْہِمِ الصَّوَابْ

اگر حکومت یا متعلقہ ادارے ایسی قیمتیں مقرر کریں جن میں پیسوں (Decimals) کی ادائیگی یا واپسی کا عملی نظام موجود نہ ہو، مثلاً متعلقہ سکے رائج نہ ہوں یا بقایا رقم واپس کرنے کا کوئی مؤثر انتظام نہ ہو، تو ایسا نظام شرعی نقطۂ نظر سے درست نہیں۔ اس کے نتیجے میں صارفین کو مقررہ قیمت سے زائد رقم ادا کرنے پر مجبور ہونا پڑتا ہے، جو ان کے مالی حقوق کے ضیاع اور ناانصافی کا سبب بنتا ہے۔

شریعت کا تقاضا ہے کہ حکومت اور متعلقہ ادارے عوامی معاملات میں عدل و انصاف کو یقینی بنائیں، لوگوں کے حقوق کی حفاظت کریں اور ایسا نظام اختیار کریں جس میں کسی فریق پر ظلم نہ ہو۔ لہٰذا متعلقہ اداروں پر لازم ہے کہ یا تو قیمتیں ایسے مکمل اعداد میں مقرر کریں جن کی ادائیگی آسانی سے ہو سکے، یا پھر بقایا رقم کی واپسی کا ایسا مؤثر نظام قائم کریں جس کے ذریعے ہر صارف کو اس کا پورا حق مل سکے۔