سوال

کیا میری بہن کی عدت کا خرچہ اور بچے کا خرچ شوہر کے ذمہ واجب ہو گا؟ نیز اس نے ابھی تک بہن کا حق مہر بھی ادا نہیں کیا، کیا وہ بھی ہم وصول کر سکتے ہیں؟

اَلجَوَابْ بِاسْمِ مُلْہِمِ الصَّوَابْ

مطلقہ عورت کی عدت کا نان ونفقہ شوہر کے ذمہ واجب ہے، اسی طرح بچے کا نان ونفقہ، علاج معالجہ اور دیگر تمام اخراجات بھی اس کے والد کے ذمہ واجب ہیں، جس کے لیے دونوں فریق باہمی رضامندی سے رقم کی ایک مناسب مقدار مقرر کر سکتے ہیں اور اگر بالفرض فریقین کا کسی رقم پر اتفاق نہ ہوتو عدالت سے رجوع کیا جا سکتا ہے، پھر عدالت اپنے حساب سے شوہر کے ذمہ عورت اور اس کے بچے کے اخراجات کے لیے ماہانہ ایک متعین رقم کی ادائیگی واجب کر دے گی۔

جہاں تک مہر کا تعلق ہے تو وہ بھی عورت کا حق ہے اور اصولی طور پر علیحدگی ہو جانے کے فورا بعد اس کی ادائیگی شوہر کے ذمہ لازم ہو جاتی ہے، لہذا شوہر کے ذمہ لازم ہے کہ وہ فوری طور پر آپ کی بہن کا مکمل حق مہر ادا کرے، اگر وہ ادا کرنے میں ٹال مٹول سے کام لے تو اس کے لیے بھی عدالت سے رجوع کیا جا سکتا ہے۔

  المبسوط للسرخسي (5/ 27) دار المعرفة – بيروت:

ومتى فرق القاضي بينهما بعد الدخول؛ لعدم الكفاءة حتى وجبت عليها العدة فلها نفقة العدة على الزوج؛ لأنها كانت تستحق النفقة في أصل النكاح فيبقى ذلك ببقاء العدة.

     المبسوط للسرخسي (5/ 201) دار المعرفة – بيروت:

أن وجوب نفقة العدة باعتبار ملك اليد الثابت للزوج عليها في حالة العدة.