سوال

میں اور میرے ایک بھائی کی جسمانی حالت ایسی ہے کہ حادثہ کی وجہ سے یا گھٹنوں میں سخت تکلیف کی وجہ سے ہمارے گھنٹے عام آدمیوں کی طرح فولڈنہیں ہو سکتے۔

خاص طور پر ہم تشہد کی حالت میں نہیں بیٹھ سکتے، بغیر سہارے اوپر اٹھ نہیں سکتے، شوگر اور بلڈ پریشر کی وجہ سے زیادہ دیر کھڑا رہنے سے کپکپاہٹ میں اضافہ ہوتا ہے اورگرنے کا اندیشہ ہو تا ہے، ڈاکٹر نے واش روم میں انگلش پاٹ استعمال کرنے اور نماز میں کرسی استعمال کرنے کی ہدایت کی ہے، ان حالات میں ہمارے لیے کر سی استعمال کرنےکے علاوہ کوئی چارہ نہیں ہے۔

نماز میں قیام فرض ہے، اس لیے اس شرط کو کسی حد تک پورا کرنے کے لیے ہم کھڑے ہو کر نیت کر لیتے ہیں اور تعوذ و تسمیہ کے بعد کچھ دیر کے لیے قرات پڑھ  یاسن لیتے ہیں، اس کے بعد بقیہ نماز کرسی پر بیٹھ کر ہی مکمل کر سکتے ہیں، اب ہمارے سوالات درج ذیل ہیں:

1. کیا مذکورہ صورتوں میں زمین پر سجدہ کرنے کی شرط ساقط ہو سکتی ہے ؟
2. باجماعت نماز میں ہمیں " قیام " کے مدِ نظر کرسی کی سیٹ کے سامنے کھڑا ہونا پڑتا ہے، گزارش ہے کہ کیا مذکورہ حالات میں نماز با جماعت کے لیے کرسی استعمال کی جاسکتی ہے ؟
3. سیٹ کے آگے کھڑے ہونے سے صف بندی میں حرج تو نہیں ہوتا ؟جبکہ کرسی کی پچھلی ٹانگیں دوسرے نمازیوں کی ایڑیوں کی سیدھ میں ہوتی ہیں۔

اَلجَوَابْ بِاسْمِ مُلْہِمِ الصَّوَابْ

1. سوال میں ذکر کی گئی تفصیل کے مطابق چونکہ گھٹنے فولڈ کرنے میں آپ دونوں کو سخت تکلیف ہوتی ہے اور ڈاکٹر نے بھی آپ کو کرسی بیٹھ کر نماز پڑھنے کی تلقین کی ہے، اس لیے آپ دونوں  زمین پر سجدہ کرنے کے حق میں  شرعاً معذور شمار ہوں گے اور معذور آدمی کے لیے کرسی پر بیٹھ کر نماز ادا کرنا اور اشارہ سے سجدہ کرنا جائز ہے۔
2. جی مذکورہ صورت میں آپ کرسی پر بیٹھ کر نماز ادا کر سکتے ہیں، البتہ جتنا قیام بآسانی کرنا ممکن اتنی دیر قیام کر کے کرسی پر بیٹھ جائیں، کیونکہ نماز میں قیام بھی رکوع وسجود کی طرح مستقل رکن ہے، جس کو بلاعذر چھوڑنا درست نہیں۔
3. آپ دونوں چونکہ معذور ہیں اس لیے کرسی کی سیٹ کے سامنے صف کے آگے کھڑے ہونے میں کوئی حرج نہیں، تندرست آدمی کے لیے اس طرح کھڑا ہونا گناہ اور ناجائز ہے۔ معذور اس میں داخل نہیں، لہذا  معذور کے لیے کرسی کی پچھلی ٹانگیں صف کے برابر کرنا اور خود آگے کھڑے ہونا جائزہے۔

۔۔۔۔