سوال

 کیافرماتے ہیں علماء  دین  اس مسئلہ  کے بارے میں  کہ  ہمارے  گاؤں میں  امام  صاحب  فجر  کے بعد   درس  قرآن   دیتے ہیں    پھر   تعلیم  کی  غرض  سے  اونچی   آواز  میں   سورہ  یسین  کی تلاوت  کرتے ہیں  ،اور  محلہ  کے  بعض   نمازی  بھی  اس  میں شریک ہوتے ہیں ، اور  بعض   درس  کے بعد  گھروں  کو  چلے جاتیں  ،اس  طرح   عشاء  کی  نماز کے بعد   فضائل  اعمال  کی  تعلیم  ہوتی ہے ،اس  کے بعد  امام  صاحب  اونچی  آواز  سے سورہ  ملک  کی  تلاوت  کرتے ہیں ، اس میں بھی    نماز ی شریک  ہوتے ہیں ،اور  بعض  شریک  نہیں ہوتے یہ سلسلہ  چند ماہ سے  جاری ہے،اب  علاقہ کے بعض   علماء  اس  عمل  کو بدعت  بتلارہے  ہیں ۔

اب سوال  یہ ہے  کہ یہ  عمل   جائز  ہے  یانہیں ؟ کیا  یہ واقعی  بدعت   ہے؟

اَلجَوَابْ بِاسْمِ مُلْہِمِ الصَّوَابْ

چونکہ کسی مباح  عمل کو زیادہ  عرصہ  اس طرح  چلانے سے آہستہ آہستہ   لوگ اسے  لازم سمجھنے  لگتے ہیں  اس لئے اس اجتماعی  طریقہ کو ترک کر دیاجائے،البتہ سائل کی تحریر  میں  مذکورہے کہ بعض  نمازی اس عمل میں  شرکت کرتے ہیں  اور  بعض نہیں  کرتے ہیں، اس سے معلوم ہوتاہےکہ  امام صاحب  اور  اہل  محلہ   اس  عمل کو  لاز م   نہیں سمجھتے   ہیں  ،اگر  واقعی اس کو ضروری  نہیں سمجھاجاتاہے تو محض  تعلیم کی غرض سے  امام صاحب کے اونچی آواز سے تلاوت  کرنے اور بیٹھکر مقتدیوں  کے   سننےسے  یہ عمل بدعت  نہیں  ہوگا۔البتہ بہتر  یہ ہے  کہ قرآن مجید  کی تلاوت  آہستہ  آواز  سے کی جائے  تاکہ  آنے والے  نمازی ،ذکر و  تلاوت وغیرہ   عبادت  کرنے والوں  کی عبادت  میں خلل   نہ آئے۔    

حضرت مفتی کفایت اللہ صاحب رحمہ اللہ نے تحریر فرمایا  ہے,, بدعت ان  چیزوں  کہتے ہیں   جن   کی اصل  شریعت  سے ثابت  نہ ہو    یعنی   قرآن مجید     اور احادیث   شریفہ    میں    اس کا ثبوت  نہ ملے  اور  رسول اللہ صلی اللہ  علیہ وسلم    اور صحابہ  کرام    اور تابعین   اور تبع تابعین  کے زمانہ میں  اس کا وجود  نہ ہو   اسے  دین  کاکام سمجھ کر  کیا جائے  یاچھوڑاجائے ۔

حوالہ جات

﴿ تعلیم  الاسلام  حصہ چہاروم ص27/﴾

اسی طرح﴿ مفردات القرآن  ﴾میں ہے والبدعة  فی المذھب  ایراد  قول  لم یستن قائلھا  اوفاعلھا   فیہ   بصاحب   الشریعہ   واماثلھا  المتقدمة  واصولھا المتقنة ۔ص/ ۳۷

احسان اللہ شائق  عفااللہ عنہ

دارالافتاجامعة الرشید  کراچی

۲۵ رجب ١۴۳۹ھ

واللہ سبحانہ وتعالی اعلم