سوال

کیافرماتے ہیں علماء کرام درج ذیل مسئلہ کے بارے میں کہ

میں نے اپنی بیوی سے شادی کے دو ماہ بعد چھ ماہ کا ایلاء کیا تھااورپھر مدت میں قریب نہ جانے  کی وجہ سے بقول علماء ایک طلاق بائن خیال کرکے دوبارہ نکاح کیاتھا،شادی کے دو سال بعد پھر جھگڑا ہوا تو میں نے اپنی اسی بیوی کو ایک طلاق ِصریح دیدی تھی یعنی لفظ طلاق ایک دفعہ کہہ دیاتھا،پھر چار سال کے بعد جھگڑا ہوا تو پھرمیں نے ایک طلاقِ صریح دیدی یعنی لفظِ طلاق ایک دفعہ کہاتھا،پھرتین طلاق سمجھتے ہوئے لڑکی والوں کے تقاضے پر ایک تحریری طلاق کا نوٹس جوایک اسٹام فروش نے کمپیوٹرپرلکھا تھامیں نے اس پر دستخط کرکے بھیج دی، میں نے اس نوٹس کو پہلی طلاق کا نوٹس سمجھتے ہوئے دستخط کیاتھا۔

اب پوچھنایہ ہےکہ :

    مذکورہ بالاتحریرکردہ صورتوں میں کیامیری بیوی پر تین طلاقیں واقع ہوگئیں ہیں یانہیں ؟

اَلجَوَابْ بِاسْمِ مُلْہِمِ الصَّوَابْ

مسئولہ ٍ ٍصورت میں تین طلاقیں واقع  ہوکر حرمتِ مغلظہ ثابت ہوگئی ہے،پہلی طلاق ایلاء سے دوسری دوسال کے بعدصریحاً دینے سے اورتیسری چارسال کے بعد صریحاً دینے سے،لہذا اب میاں بیوی میں نہ رجوع ہوسکتا ہے اورنہ  ہی حلالہ کے بغیرنیا نکاح  ۔

فی القرآن الکریم

قَوْلُهُ تَعَالَی:{الطَّلاقُ مَرَّتَانِ} [البقرة: 229] إلَى قَوْلِهِ عَزَّ وَجَلَّ: {فَإِنْ طَلَّقَهَا فَلا تَحِلُّ لَهُ مِنْ بَعْدُ حَتَّى تَنْكِحَ زَوْجًا غَيْرَهُ} [البقرة: 230]

وفی صحيح البخاري (ص: 89)

حدثني محمد بن بشار حدثنا يحيى عن عبيد الله قال حدثني القاسم بن محمد عن عائشة أن رجلا طلق امرأته ثلاثا فتزوجت فطلق فسئل النبي أتحل للأول قال لا حتى يذوق عسيلتها كما ذاق الأول.

وفی بدائع الصنائع، دارالكتب العلمية (3/ 187)

وأما الطلقات الثلاث فحكمها الأصلي هو زوال الملك، وزوال حل المحلية أيضا حتى لا يجوز له نكاحها قبل التزوج بزوج آخر.