سوال

میری بیوی تقریبا چار ماہ سے ناراض ہوکر اپنے والدین کے گھر بیٹھی ہے اور منانے کے باوجود گھر آنے پر تیار نہیں اور اس پر بہ ضد ہے کہ منسلکہ شرائط پر لیگل پیپر پر اوتھ کمشنر کی موجودگی میں دو گواہان کے سامنے دستخط کرو۔

اس سے پہلے بھی مجھے ایک قانونی نوٹس بھیج چکی ہے،جس کا جواب میں نے اپنے وکیل کے ذریعے بھیج دیا تھا اور اپنے پر لگائے گئے تمام الزامات کا انکار کیا تھا۔

اپنے بچے کے مستقبل کی خاطر میں بہرصورت مصالحت کے لئے تیار ہوں سوائے شرط نمبر 5 کے،واضح رہے کہ میں نے ان پر کبھی جسمانی یا ذہنی تشدد نہیں کیا اور نہ کرنے کا ارادہ ہے۔

اپنے بچے کے بہتر مستقبل کے لئے درج ذیل شرائط پوری کرچکا ہوں:

1۔بینک اکاؤنٹ میں ماہانہ جیب خرچ جمع کرادوں گا۔

2۔ہر مہینے جو کپڑے بنواؤں گا ان کی رسیدیں ان کے والدین کو فراہم کروں گا۔

3۔بچے کا خرچہ پہلے بھی اٹھایا تھا اور مستقبل میں بھی اٹھاؤں گا،نیز ہر شرعی ذمہ داری پوری کروں گا۔

4۔گرمی میں ان کا مطالبہ چوبیس گھنٹے اے سی چلانے کا ہے جو کہ بجلی کے مہنگی ہونے کی وجہ سے میرے لئے ممکن نہیں،البتہ چار گھنٹے چلانے پر آمادہ ہوں۔

اب اس تمہید کی روشنی میں آپ سے درج ذیل سوالات کے جوابات مطلوب ہیں:

1۔شریعت کی رو سے بیوی شوہر کی مرضی کے بغیر کتنا عرصہ اپنے والدین کے گھر رہ سکتی ہے؟ میری بیوی چار ماہ سے اپنے والدین کے گھر مقیم ہے۔

اَلجَوَابْ بِاسْمِ مُلْہِمِ الصَّوَابْ

شوہر کی اجازت کے بغیر بیوی کے لئے گھر سے نکلنا جائز نہیں ہے،اگرچہ تھوڑے وقت کے لئے ہی کیوں نہ ہو،البتہ شوہر کو چاہیے کہ ہفتے میں ایک بار بیوی کو والدین سے ملاقات کی اجازت دے،یعنی اس کے والدین شوہر کے گھر آکر ملنا چاہے تو یہ رکاوٹ نہ بنے،بقیہ اگر وہ نہیں آسکتے تو پھر بیوی کو ہر ہفتے لے جانا،یا جانے کی اجازت دینا ضروری نہیں،بلکہ عرف اور دستور کے مطابق کچھ  عرصے بعد اجازت دے،لیکن رات گزارنے کی اجازت ضروری نہیں،صرف ملاقات کی اجازت دینا کافی ہے،خواہ خود لے جائے،یا جانے کی اجازت دے۔

لہذا مذکورہ صورت میں آپ کی بیوی پر فوری طور پر واپسی لازم ہے،کیونکہ آپ کی اجازت کے بٕغیر والدین کے گھر میں رہ کر وہ گناہ گار ہورہی ہے اورجتنے عرصے تک وہ آپ کی اجازت کے بغیر میکے میں رہی  اس عرصے کا نان نفقہ بھی آپ کے ذمے لازم نہیں ہے۔

"الدر المختار " (3/ 145):

"لها (زيارة أهلها بلا إذنه ما لم تقبضه) أي المعجل، فلا تخرج إلا لحق لها أو عليهاأو لزيارة أبويها كل جمعة مرة".

قال العلامة ابن عابدین رحمہ اللہ:" (قوله :فلا تخرج إلخ) جواب شرط مقدر: أي فإن قبضته فلا تخرج.

(قوله: أو لزيارة أبويها) سيأتي في باب النفقات عن الاختيار تقييده بما إذا لم يقدرا على إتيانها، وفي الفتح أنه الحق. قال: وإن لم يكونا كذلك ينبغي أن يأذن لها في زيارتهما في الحين بعد الحين على قدر متعارف، أما في كل جمعة فهو بعيد، فإن في كثرة الخروج فتح باب الفتنة خصوصا إن كانت شابة والرجل من ذوي الهيآت".