سوال

آج سے چار سال پہلے عمر سے ایک کفر یہ کلام صادر ہوا، پھر اس نے اس طرح توبہ کی "یا اللہ! جو کفریہ الفاظ مجھ سے صادر ہوئے ہیں، میں ان سے توبہ کرتا ہوں"، کلمہ طیبہ پڑھ لیا اور اس حال میں شادی کرلی۔ چار سال بعد کسی عالم دین کا بیان سنا کہ جس کفر سے توبہ کرنا ہو تو توبہ میں اس کا تذکرہ ضروری ہے، ورنہ تجدیدِ ایمان نہیں ہوتی۔ اس بناء پر عمرکو لگا کہ جب اس کی تجدیدِ ایمان درست نہیں ہوئی تھی تو نکاح کیسے درست ہے؟ اس لیے اس نے اپنی بیوی بچوں کو چھوڑ دیا۔ اب عمر کے لیے کیا حکم ہے؟ کیا ان کفریہ الفاظ کو دوہرا کر توبہ اور تجدیدِ ایمان کرے؟

اَلجَوَابْ بِاسْمِ مُلْہِمِ الصَّوَابْ

صورتِ مسئولہ میں جب عمر نے ان الفاظ "یا اللہ! جو کفریہ الفاظ مجھ سے صادر ہوئے ہیں، میں ان سے توبہ کرتا ہوں" کے ساتھ توبہ کی اور تجدیدِ ایمان کی تو اس کی توبہ درست، تجدیدِ ایمان معتبر اور اس کے بعد کیا گیا نکاح ٹھیک ہوا تھا۔ لہٰذا اب دوبارہ کفریہ الفاظ دوہرا کر ان سے توبہ کرنے کی ضرورت نہیں۔ اپنی توبہ سے متعلق غلط فہمی پیدا ہونے کے بعد بیوی کو چھوڑنے سے مراد اگر اس کے ساتھ تعلق کو موقوف کرنا ہے تو اس سے کچھ نہیں ہوا، ان دونوں کا نکاح قائم ہے اور وہ بدستور عمر کی بیوی ہے، کسی قسم کے شک شبہے کا شکار نہیں ہونا چاہیے۔ لیکن اگر چھوڑنے سے مراد طلاق ہے تو پھر عمر نے اس وقت جو کچھ کہا  ہو، اس کی تفصیل لکھ کر دوبارہ مسئلہ معلوم کرلیں۔

۔