تلبیہ بند:

تلبیہ جو آپ اب تک برابر پڑھتے رہے، آج جمرۂ عقبہ کی رَمی کی ابتداء کرتے ہی اس کا سلسلہ ختم ہوجاتا ہے، اب تلبیہ بند کردیجئے اَور دوسرے اذکار سے زبان کو تر رکھیے۔(غینة الناسک: صـ ۱۷۰(

رَمی سے فارغ ہو کر دُعاء کے لیے نہ ٹھہریئے، دُعاء کئے بغیر اپنے خیمے میں چلے آیئے اَور قربانی کی تیاری کیجئے۔(بدائع الصنائع: صـ ۱۴۶)

قربانی:

آپ حج تمتع کر رہے ہیں، تمتع یا قران کرنے والے حاجی پر بطورِ شکر حج کی قربانی واجب ہے۔(مناسک ملا علی قاری: صـ ۲۲۶)

عید کی قربانی جو ہر صاحب نصاب مقیم پر واجب ہوتی ہے وہ اس کے علاوہ ہے، اَگر آپ مقیم ہیں اَور صاحب ِنصاب ہیں تو اس قربانی کا بھی اہتمام کیجئے، خواہ خود کیجئے، خواہ اپنے وطن میں کرایئے۔(غنیة: صـ ۱۷۲، مناسک: صـ ۲۲۶)

ہمارے اکابر رحمہم اللہ تعالیٰ کے فتویٰ کے مطابق منی مکہ مکرمہ سے الگ ایک مستقل  مقام تھا، لہٰذا اگر کسی حاجی کا 8 ذی الحجہ کی صبح تک مکہ مکرمہ میں 15 دن یا زیادہ قیام ہے تو وہ مقیم شمار ہوتا تھا اور اس پر قربانی لازمی ہوتی تھی۔ اس سے کم قیام ہے تو مسافر اور مسافر پر صاحب نصاب ہونے کے باوجود قربانی واجب نہیں۔

اب اکثر اہل علم کے نزدیک مکہ مکرمہ کی آبادی بعض اطراف سے منیٰ سے متصل ہو گئی ہے اور منیٰ مکہ مکرمہ کا حصہ بن گیا ہے، لہٰذا منیٰ کے 5 دنوں کو شامل کر کے اگر کل قیام 15  دن یا زیادہ رہا تو یہ مقیم ہوگا، اس سے کم رہا تو مسافر ہوگا۔

عام قربانی کی طرح حج کی اس قربانی کے لیے بھی تین دِن یعنی 10، 11 اور 12/ ذِی الحجہ مقرر ہیں۔(بدائع الصنائع: ۶/ ۲۸۵)

 12/ ذِی الحجہ کے غروب آفتاب تک دِن میں رات میں جب چاہیں کریں، گوپہلا دِن اَفضل ہے، مگر پہلے دِن ہجوم کی وجہ سے کافی دقت پیش آتی ہے، 11/ذِی الحجہ کوباآسانی قربانی کی جا سکتی ہے۔(ردالمحتار: ۹/  ۵۲۵)

اس قربانی میں بھی اِختیار ہے کہ چاہیں تو خود منیٰ کے ’’ذبح خانہ‘‘ میں جا کر اپنی پسند کا جانور خرید کر ذبح کریں اَور چاہیں تو منیٰ یا مکہ میں یا اپنے وطن میں اپنے کسی معتمد شخص کے ذریعہ کروائیں۔(بدائع: ۶/ ۲۸۵)

بینک کے ذریعہ قربانی:

بعض لوگ بینک کے ذریعہ یہ قربانی کرواتے ہیں،بینک والوں پر یہ اعتماد مشکل ہے کہ وہ حلق سے پہلے قربانی ضرور ذبح کر دیں گے،جبکہ قربانی حلق سے پہلے کرنا واجب ہے، اَگر ترتیب بدل گئی تو دَم لازِم ہو جاتا ہے، نیز یہ بھی سننے میں آیا ہے کہ بینک والے شرائط قربانی کا لحاظ نہیں رکھتے، معیوب جانوروں کی قربانی بھی کر دیتے ہیں، بلکہ ایک خبر یہ بھی ہے کہ وہ سب لوگوں کی طرف سے قربانی نہیں کرتے، اگرچہ ان خبروں کی صداقت کی پوری تحقیق نہیں ہو سکی، مگر شک تو ضرور پیدا ہو گیا ہے۔ اس لئے حتی الامکان بینک کے ذریعہ قربانی کروانے سے اِجتناب کیا جائے۔ اَگر بامر مجبوری کروانا ہی پڑے تو حلق سے پہلے اس کا اطمینان کر لیا جائے کہ قربانی کا جانور ذبح ہو گیا ہے۔

حلق یا قصر:

اَگر آپ نے قربانی خود منیٰ میں کی ہے یاکسی سے کروائی ہے اَور قربانی ہونے کا مکمل یقین ہو چکا ہے تومرد پورے سر کے بال منڈائیں(غنیة: صـ ۱۷۳) یا پورے سر کے بال انگلی کے پورے سے کچھ زِیادہ مقدار میں کتروائیں، مگر حلق اَفضل ہے۔(بدائع: ۳/ ۱۰۱) (غنیة: صـ ۱۷۴)خواتین پورے سر کے بال مذکور مقدار میں کتروائیں، اَفضل یہی ہے(غنیة: صـ ۹۴) اَور چوتھائی سر کے بال کتروانا واجب ہے، اس لئے چوتھائی سر کے بال اتنی مقدار میں کٹ جانے کا اطمینان کرلیں، چوتھائی سے کم کٹے ہوں تو عورت اِحرام کی پابندیوں سے آزاد نہ ہوگی۔(مرقاة: ۵/ ۵۴۰، المکتبة الحبیبیة) حلق یا قصر کے بعد بیوی سے ہمبستری کے سوا اِحرام کی سب پابندیاں ختم ہوجائیں گی۔(غنیة: صـ ۱۷۶)

طواف ِزِیارت:

حلق یا قصر سے فارغ ہو کر غسل کرنا چاہیں تو غسل کر کے ورنہ وضو کر کے سلے ہوئے کپڑے پہن کر یا اِحرام کی چادروں ہی میں پورے ذوق وشوق کے ساتھ مکہ روانہ ہوجائیے اَور طوافِ زِیارت کیجئے، واضح رہے کہ طواف با وضو کرنا واجب ہے، اَگر کسی نے پورا یا اکثر طواف ِ زِیارت بے وضو کر لیا تو دَم لازم ہو گا اَور اَگر نصف طواف سے کم طواف ِ زِیارت بے وضو کر لیا تو ہر چکر (جو بے وضو کیا) کے لیے بقدرِ صدقة الفطر صدقہ لازم ہو گا اَور اَگر پورا یا اکثر طواف ِ زِیارت حالت ِ جنابت یا حالت ِ حیض میں کر لیا تو بَدَنہ (یعنی ایک اونٹ یا ایک گائے) واجب ہو جائے گا، اَلبتہ اَگر وضو اَور غسل کر کے طواف دوبارہ کر لیا تو سب صورتوں میں دَم یا بَدَنہ ساقط ہو جائے گا۔

طوافِ زِیارت ’’وقوفِ عرفہ‘‘ کے بعد دوسرا اَہم رُکن ہے۔(ہندیة: ۱/ ۲۱۹، مکتبہ رشیدیة، تاتارخانیة: ۲/ ۲۳۷) اس کاوَقت 10/ذِی الحجہ کی صبح صادق سے شروع ہو جاتا ہے، مگر چونکہ طوافِ زِیارت رَمی اَور حلق یا قصر کے بعد سنت ہے، اس لیے طواف رَمی اَور حلق سے فارغ ہونے کے بعد کرے، اَگر پہلے کر لیا، تو خلاف ِ سنت کیا، طوافِ زِیارت کا آخری وَقت 12/ذِی الحجہ کے غروب آفتاب تک ہے۔(مناسک: صـ ۲۳۲، غنیة: صـ ۱۷۶)  اَگرچہ اَفضل یہی ہے کہ آج 10/ ذِی الحجہ ہی کو کر لیا جائے، اَگر 10/ ذِی الحجہ کو تکان او ر ہجوم کی وجہ سے مشکل ہو تو 11 یا 12/ ذِی الحجہ کو کرنے میں بھی کوئی حرج نہیں۔ اس سے زیادہ بلا عذر تاخیر مکروہ ہے اور امام اعظم رحمہ اللہ کے نزدیک اس صورت میں دَم لازِم ہوگا۔

طواف ِزِیارت کا طریقہ وہی ہے جو عمرہ کے بیان میں تفصیل سے گزر چکا، چونکہ اس طواف کے بعد آپ کو سعی بھی کرنی ہے، اس لئے اس میں پہلے تین چکروں میں رَمل کیجئے۔(بدائع: ۳/ ۱۲۰) اَگر سلے ہوئے کپڑے پہنے ہوں تو اِضطباع (دایاں کندھا کھلا رکھنا) نہیں ہوگا، اِحرام کی چادروں میں طواف کر رہے ہوں تو اِضطباع بھی کیجئے۔

سعی:

طواف اَور اس کے متعلقات یعنی دورکعت نمازِ طواف،(مناسک: صـ ۱۵۵ ۔ ۲۳۲، بدائع: ۳/  ۱۲۳)ملتزم پر دُعاء،(غنیة: صـ ۱۲۲)

 زَمزم پینے اَور دُعاء مانگنے سے فارغ ہو کر پھر حجرِ اَسود کا اِستلام یا اِشارہ کر کے صفا ومروہ کی سعی کیجئے۔(غنیة: صـ ۱۷۷، مناسک: صـ ۲۳۶) سعی کا وہی طریقہ ہے جو عمرہ کی سعی کے بیان میں گزر چکا۔

سعی سے فارغ ہو کر منیٰ واپس آجایئے او ر رات منیٰ ہی میں گزاریے۔(غنیة: صـ ۱۷۸ ۔ ۱۷۹، مناسک: ۲۳۴ ۔ ۲۳۶)

مسئلہ: اَگرچہ اَفضل یہی ہے کہ سعی طوافِ زِیارت کے بعد ہی کی جائے، لیکن اَگر کوئی طوافِ قدوم کے بعد سعی کرلے یا عمرہ سے فارغ ہو کر کوئی نفل طواف کرنے کے بعد سعی کر لے تو بھی جائز ہے، اب طوافِ زِیارت کے بعد نہ سعی کرے گا اَور نہ اس طواف میں رَمل و اِضطباع کرے گا، اَلبتہ اَیسے طواف ِ قدوم یا نفلی طواف میں رَمل و اِضطباع کرنا چاہیے، اَگر قصداً یا بھول کر نہیں کیا تھا تو بھی اب طواف ِ زِیارت میں رَمل و اِضطباع نہ کرے۔

11/ذِی الحجہ(حج کاچو تھا دِن)

جمرات کی رَمی:

11/ذِی الحجہ کو زَوال کے بعد تینوں جمرات، جمرئہ اولیٰ، جمرئہ وسطیٰ اَور جمرئہ عقبہ پر بالترتیب سات سات کنکریاں ماریئے۔(بدائع : ۳/ ۱۴۹) یہ رَمی زَوال کے بعد غروب ِآفتاب سے پہلے سنت ہے،(ردالمحتار: ۳/ ۶۱۹، مناسک ملا علی قاری: صـ ۲۴۰) مگر ہجوم کی وجہ سے بوڑھوں، بیماروں اَور خواتین کو جان جانے یا شدید مشقت کا اندیشہ ہو تورات میں بھی رَمی کر سکتے ہیں، بلکہ جان جانے کے خطرہ سے جوانوں کے لیے بھی تاخیر کرنے میں کوئی کراہت نہیں۔(مناسک: صـ ۲۳۷)

دُعاء:

جمرۂ اولیٰ کی رَمی سے فارغ ہو کر ذرا آگے بڑھ کر ایک طرف ہو کر قبلہ رو کھڑے ہو کر خوب خوب دُعاء مانگیے، جمرۂ وسطیٰ کی رَمی سے فارغ ہو کر بھی اسی طرح دعا کیجئے، اس موقع پر قبولیت ِدُعا کی خاص امید ہے، مگر جمرۂ عقبہ پر رَمی کے بعد دُعاء نہیں ہے، دُعاء کیے بغیر اپنے مقام پر واپس آجایئے۔(بدائع الصنائع: ۳/ ۱۴۹، مناسک ملا علی قاری: صـ ۲۴۲)

12/ ذِی الحجہ(حج کا پانچواں دِن)

جمرات کی رَمی:

زَوال کے بعد غروبِ آفتاب سے پہلے تینوں جمرات پر سات سات کنکریاں ماریے، اس میں وہی تفصیل پیشِ نظر رکھیے جو اوپر 11/ ذِی الحجہ کے بیان میں گزری۔(بدائع الصنائع: ۳/ ۱۴۹)

قیام کا اِختیار اَور رَمی:

12/ذِی الحجہ کی رَمی کے بعدآپ کو اِختیار ہے،خواہ منیٰ میں قیام کریں یا مکہ مکرمہ واپس آجائیں۔(مناسک ملا علی قاری: صـ ۲۴۳، غنیة الناسک: صـ ۱۸۴) اَگرچہ اَفضل یہی ہے کہ قیام کریں اَور 13/ذِی الحجہ کی رَمی کر کے مکہ واپس آئیں، لیکن اَگر آپ کو 13/ ذِی الحجہ کی صبح منیٰ ہی میں ہوگئی تو یہ رَمی بھی واجب ہوجائے گی،(غنیة الناسک: ۱۸۴، مناسک ملا علی قاری: صـ ۲۴۴) زَوال کے بعد رَمی کر کے واپس آنا ہوگا۔

مکہ معظمہ کا قیام:

حج سے فارغ ہو کر اَگر کچھ روز مکہ مکرمہ میں قیام کا موقع مل جائے تو اسے بہت بڑی نعمت جانئے اَور اس کی قدر کیجئے۔(غنیة: صـ ۱۸۹) دِن رات میں جس قدر ہوسکے نفلی طواف کیجئے، اپنے والدین کی طرف سے، اپنے اساتذہ اَور خاص محبین ومحسنین کی طرف سے۔(غنیة: صـ ۱۳۷)

جس بیت ﷲ کی طرف منہ کر کے غائبانہ نمازیں اب تک پڑھتے رہے اَور آیندہ بھی پڑھتے رہیں گے،اس کے بالکل سامنے اَور اس کی دیواروں کے نیچے کھڑے ہو کر نمازیں پڑھیے، عمر بھر کی حسرت نکال لیجئے۔ کسی کوتکلیف پہنچائے بغیر ممکن ہو تو حجرِ اَسود کو بوسے دیجئے،(ردالمحتار: ۳/ ۵۷۷) ملتزم سے چمٹ کر آنسو بہا بہا کر اپنے رب سے دُنیا وآخرت کی کامیابی، امت مسلمہ کی عظمت رفتہ کی بحالی، مجاہدین کی فتح اَور پورے عالم میں غلبۂ اِسلام کی دُعائیں مانگیے۔ دوسروں کو بھی جہاد واعمال خیر کی دعوت دیجئے، مسجد ِحرام میں بیٹھ کر وقتاً فوقتاً ﷲ کے اس مقدس گھر کو عظمت ومحبت کی نظروں سے دیکھئے۔(غنیة: صـ ۱۳۸)

یہ سب وہ بہاریں ہیں جو مکہ معظمہ سے چلے جانے کے بعد آپ کو نصیب نہ ہوسکیں گی، اس لئے اس موقع کو غنیمت سمجھئے اَور ﷲ تعالیٰ کی رحمتوں وبرکتوں کو جس قدر ہو سکے سمیٹنے کی کوشش کیجئے۔

طوافِ وداع:

اﷲ تعالیٰ کا شکر اَدا کیجئے کہ اس نے آپ کا حج مکمل کرادیا، اب حج کے اعمال میں سے کوئی عمل باقی نہیں رہا، بس اتنا عمل باقی ہے کہ جب آپ مکہ معظمہ سے رخصت ہونے لگیں تو ایک رخصتی طواف کر کے جائیں۔اسے طواف ِوداع کہتے ہیں اَور یہ بیرونی حاجیوں کے لیے واجب ہے(مناسک ملا علی قاری: صـ ۲۵۲، غنیة: صـ ۱۹۰) اَور اس کا طریقہ عام نفل طواف کی طرح ہے، نہ اس میں اِضطباع و رَمل ہے اَور نہ اس کے بعد سعی ہے۔(مناسک: صـ ۲۵۴)

اَگر کسی نے طواف زِیارت کے بعد کوئی نفل طواف کرلیا اَور طوافِ وداع کئے بغیر ہی وہ مکہ معظمہ سے رخصت ہوگیا تو یہ نفلی طواف ہی طواف ِوداع کے قائم مقام ہوجاتا ہے۔(غنیة الناسک: صـ ۱۹۰، مناسک: صـ ۲۵۲) تاہم بہتریہی ہے کہ رَوانگی سے پہلے وداع اَور رخصت ہونے کی نیت سے مستقل طواف کیا جائے۔(مناسک: صـ ۲۵۲، غنیة: صـ ۱۹۰)

طوافِ وداع کے وَقت فطری طور پر آپ کو یہ خیال آئے گا کہ بیت ﷲ جو ﷲ تعالیٰ کی خاص تجلی گاہ ہے اَور عمر بھر کی تمناؤں کے بعد یہاں پہنچنا نصیب ہوا ہے، اب اس سے رخصت ہو رہے ہیں، آیندہ نہ معلوم یہ سعادت میسر آئے گی یا نہیں،بس اسی دلسوزی اَور حسرت کے ساتھ طواف کیجئے، اَگر مکروہ وَقت نہ ہو تو دوگانہ اَدا کیجئے۔

طواف سے فارغ ہو کر جی بھر کے زَمزم پیجئے، پھر ملتزم پر آئیے اورکسی کو تکلیف  پہنچائے بغیر موقع ہو تو وداع اَور رخصت ہی کی نیت سے اس سے لپٹ لپٹ کر خوب رویئے، آہ وزاری کیجئے، اپنے رب سے حج کی مقبولیت مانگیے، مغفرت مانگیے،ﷲ کی رضا مانگیے، اپنے لئے اپنے والدین، اساتذہ، مشایخ اَور پوری اُمت کے لیے مانگیے،بلک بلک کر مانگیے، مسجد ِحرام و بیت ﷲ کے آداب وحقوق کے بارے میں جو کوتاہیاں ہوئیں ان کی معافی مانگیے اَور سنت کے مطابق مسجد ِحرام سے نکلیے۔(مناسک: صـ ۲۵۴ ۔ ۲۵۵، غنیة: صـ ۱۹۲، فتاویٰ تاتارخانیة: ۲/ ۴۷۰)