سوال

  کیا میرے والد کی جائیداد میں میری مرحوم بہن کے بچوں کا کوئی حصۂ میراث  بنتا ہے،جبکہ میری بہن کا انتقال میرے والد ین سے پہلے ہوا تھا؟مہربانی فرما کرکچھ  تفصیل سے جواب دیں کہ ہم اعتراض کرنے والوں کو سمجھا سکیں ۔

اَلجَوَابْ بِاسْمِ مُلْہِمِ الصَّوَابْ

شرعی اعتبار سے میراث کا مستحق بننے کے لیے مورِث کی وفات کے وقت وارث کا  زندہ ہونا شرط ہے،جو رشتہ دار مرحوم کی وفات کے وقت زندہ نہ ہو وہ مستحق نہیں ہوتا،صورتِ مسئولہ میں آپ کی بہن کا انتقال والدین  کی زندگی  میں ہی ہواہے، لہٰذاان یتیم بچوں کی ماں کا اپنے  والدین  کے ترکہ میں حصہ نہیں ہے،جب ان کی والدہ کا حصہ نہیں تو بچوں کو بھی نہیں ملے گا ۔

تاہم اگر تمام ورثہ  عاقل اور بالغ ہوں اور وہ اپنی رضا مندی اور خوشی سےاپنے مشترکہ حصے میں سے، یا کوئی ایک وارث اپنے حصے سےمیت کی فوت شدہ  بیٹی کی اولاد کو کچھ مال دے تو یہ باعثِ ثواب ہے،اسی طرح  اگر بیٹی کی ملکیت میں پہلےسے   کوئی اور  جائیداد تھی تو اس کی جائیداد میں ان نواسے  اور نواسیوں   کا بحیثیت اولاد شرعی حصہ ہوگا۔

الدر المختار وحاشية ابن عابدين (رد المحتار:6/ 758):

وشروطه: ثلاثة: موت مورث حقيقة، أو حكما كمفقود، أو تقديرا كجنين فيه غرة ووجود وارثه

عند موته حيا حقيقة أو تقديرا كالحمل والعلم بجهة إرثه.