سوال

حضرت آج کل کچھ مساجد میں ایسے ایمپلیفائر لگے ہوئے ہیں کہ اس میں ایکو( Echo) کا آپشن ہوتا ہے ۔جب مؤذن اذان دیتا ہے تو وہ ایمپلیفائر پر ایکو کا آپشن آن کر لیتا ہے ،جس کی وجہ سے اذان کا جو کلمہ ہے جب وہ ختم ہوتا ہے تو اس کلمے کا جو آخری لفظ ہے وہ چار پانچ دفعہ  کٹ کٹ کر ریپیٹ ہوتا ہے ۔جیسے دیوار سے ٹکرا کر آواز واپس آتی ہے ۔ اور یہ ایمپلیفائر کی سیٹنگ میں ہوتا ہے ،چاہے اس کو استعمال کر لیں چاہے نہ کریں۔ تو کیا اس طریقے سے اذان دینا درست ہے؟

اَلجَوَابْ بِاسْمِ مُلْہِمِ الصَّوَابْ

ایکو آن کرنے سے مقصود آواز میں تحسین پیدا کرنا ہوتا ہے۔اگر گونج کی مقدار اس حد تک  معمولی ہو کہ جس سے آواز میں صرف تحسین پیدا ہو، الفاظ وحروف میں تکرار پیدا نہ ہو  تو اس کی گنجائش ہو سکتی ہے۔اور اگر ایکو کی مقدار اس حد تک بڑھادی جائے کہ جس سے  حروف میں تکرار آجائے یا الفاظ آپس میں خلط ہوں تو  اس طرح  کا ایکو استعمال کرنا جائز نہیں۔ آج کل بعض مؤذنین اور قراء حضرات بلا ضرورت ایکو کی مقدار بہت بڑھا دیتے ہیں جو کہ مکروہ ہے۔اس سے اجتناب کرنا چاہیے۔

قال  في الهندية: وإذا ‌جهر ‌الإمام فوق حاجة الناس ‌فقد ‌أساء؛ لأن الإمام إنما يجهر لإسماع القوم ليدبروا في قراءته ليحصل إحضار القلب. كذا في السراج الوهاج (الفتاوى الهندية(72/1:

قال العلامة ابن عابدين رحمه الله:  بأنه صرح في ‌السراج بأن الإمام إذا ‌جهر فوق الحاجة ‌فقد ‌أساء ،اهـ والإساءة دون الكراهة ولا توجب الإفساد.( رد المحتار :1/ 589)

قال العلامة الطحطاوي رحمه الله :والأولى :أن لا يجهد نفسه بالجهر بل بقدر الطاقة ؛لأن إسماع بعض القوم يكفي بحر ونهر .والمستحب :أن يجهر بحسب الجماعة .فإن زاد فوق حاجة الجماعة ‌فقد ‌أساء كما لو جهر المصلي بالأذكار. ) حاشية الطحطاوي على مراقي الفلاح: 253)