سوال

السلام علیکم!

کیا فرماتے ہیں علماء کرام اس مسئلہ کے بارے میں کہ ایک شخص اپنی پوتی کا، چھوٹی عمر میں کسی کے ساتھ نکاح کر لے اور بدلے میں  اپنے بیٹے کے لیے اس گھرانے سے لڑکی کا نکاح کرے تو یہ نکاح شرعاً اور قانونا درست ہوا یا نہیں؟ اور لڑکی بالغ ہونے پر یہ نکاح فسخ کر سکتی ہےیا نہیں؟  کیونکہ اب لڑکی بالغ ہے، لڑکی خود بھی راضی نہیں اور لڑکی کے والدین بھی راضی نہیں ہیں ،لیکن لڑکی کے والدین اپنے باپ سے مجبور تھے کیونکہ معاشرہ کے رسم و رواج کی وجہ سے کچھ کہہ نہیں سکتے تھے اور لڑکی کا دادا اب فوت ہو چکا ہے ،لہذا اس مسئلے کے بارے میں شرعا اور قانونا رہنمائی فرمائیں۔ جزاکم اللہ خیرا

اَلجَوَابْ بِاسْمِ مُلْہِمِ الصَّوَابْ

والد کی موجودگی میں اگر دادا نے نابالغ پوتی کا نکاح کرایاہے،تو یہ والد کی اجازت پر موقوف ہو گا،اگر والد رضامند ہو تو یہ نکاح صحیح ہو گا، اگر رضامند نہ ہو تو بلوغت پرلڑکی کے انکار کرنے سےنکاح باطل ہو جاتاہے۔لہذااگروالد  نےدادا کے کرائے ہوئے نکاح پر صراحتا(زبان سے اجازت) یا دلالتا (مہر وغیرہ قبول کرکے)کسی بھی طرح  رضامندی کا اظہار نہ کیاہوتویہ نکاح اب لڑکی کے بالغ ہوکر انکارکرنے سے باطل شمار  ہو گا، چنانچہ ایسی صورت میں  بیٹی کی اجازت سے  والد دوسری جگہ نکاح کراسکتاہے۔

دادا نے  اپنے بیٹے کے لیے دوسری جگہ سے لڑکی منتخب کرکے نکاح کرایا ہے اگر اس میں شرائط مکمل ہوں تو وہ نکاح منعقد ہوجائے گا۔

وفی  الهندية (1/285):

وإن زوج الصغير أو الصغيرة ‌أبعد ‌الأولياء فإن كان الأقرب حاضرا وهو من أهل الولاية توقف نكاح الأبعد على إجازته۔

وفی الدرالمختار (3/81):

فلا ‌يكون ‌سكوته إجازة لنكاح الأبعد وإن كان حاضرا في مجلس العقد ما لم يرض صريحا أو دلالة۔