سوال

اضافی بالوں کو ختم کرنے کے لیے چیونٹیوں سے نسخہ تیار کرنے کا کیا حکم ہے؟

اَلجَوَابْ بِاسْمِ مُلْہِمِ الصَّوَابْ

اضافی بالوں کو ختم کرنے کے لیے چیونٹیوں سے نسخہ تیار کرنے کی تفصیل معلوم نہیں ہوسکی ،تاہم اصولی بات یہ ہے کہ چیونٹیاں غیر موذی حیوانات میں سے  ہیں ،اور غیر موذی حیوانات کو بلا وجہ مارنا درست  نہیں ،البتہ اگر کسی معتبروجہ سے ان کومارا جائے تو گنجائش ہے۔لہذا صورت مسئولہ میں اگر یقینی طور پر چیونٹیوں سے تیار کردہ نسخہ  اضافی بالوں کو ختم کرنے کے لیے مفید ہے ، توچونکہ چیونٹیاں حشرات الارض میں سے ہیں اور حشرات الارض پاک ہیں  ،لہذا اس نسخے کو استعمال کرنے کی گنجائش ہوگی۔ البتہ آج کل اضافی بالوں کو ختم کرنے کے لیے  اس نسخے کے علاوہ  دیگرمتبادل موجود ہیں ،تو بہتر یہ ہے کہ متبادل استعمال کیا جائے ،تاکہ  حیوانات کو غیر ضروری طور پر تکلیف نہ  پہنچے۔

قال العلامة  بدرالدين العيني رحمه الله:(ويكره ‌قتل ‌النملة، ما لم تبتدي بالأذى) لأن قتل الحيوان إنما يجوز لغرض صحيح، فإذا لم يؤذ: لا يقتل.(منحة السلوك في شرح تحفة الملوك:425)

قال العلامة الكاساني رحمه الله: (أما) الذي ليس له دم سائل: فالذباب والعقرب والزنبور والسرطان ونحوها، وأنه ليس بنجس عندنا.(بدائع الصنائع:62/1)

کیڑے مکوڑے اور خشکی کے جملہ وہ جانور جن میں دم سائل نہ ہو پاک ہیں۔جیسے اکثر حشرات الارض بچھو ،تیتے،چھوٹی چھپکلی جس میں دم سائل نہ ہو ،چھوٹا سانپ جس میں دم سائل نہ ہو خارجاً ان کا استعمال ہر طرح درست ہے۔(طبی جوہر:104)