سوال

میں نے اپنی بیوی کو غصے میں کہا کہ اگر آج تو اپنی امی، ابو کے گھر یا علی والے (جگہ کانام) گھر گئی تو تجھے تین طلاقیں، اس کے کچھ دیربعد میں نے اس کو واضح کر کے بتایا کہ اب میری طرف سے اجازت ہے، تم اپنی امی، ابو کے گھر اور علی والے پر جا سکتی ہو، لیکن میری بیوی دس دن تک کہیں نہیں گئی، میں گواہی دیتا ہوں کہ میری نیت ساری زندگی منع کرنے کی نہیں تھی، بلکہ صرف ایک دن روکنا مقصود تھا، برائے مہربانی رہنمائی فرمائیں کہ طلاق ہو گئی یا نہیں؟

اَلجَوَابْ بِاسْمِ مُلْہِمِ الصَّوَابْ

سوال میں ذکر کی گئی صورتِ حال کے مطابق چونکہ آپ نے اپنی بیوی کے اسی دن والدین کے گھر جانے کے ساتھ تین طلاق کو معلق کیا تھا، جبکہ آپ کی بیوی دس دن تک کہیں نہیں گئی، اس لیے صورتِ مسئولہ میں آپ کی بیوی پر کوئی طلاق واقع نہیں ہوئی، اس لیے فریقین کے درمیان نکاح بدستور قائم ہے، البتہ آئندہ  کے لیے اس طرح طلاق کے الفاظ استعمال کرنے سے پرہیز کرنا چاہیے۔

۔۔۔