سوال

کیا اب منیٰ اور مزدلفہ مکہ مکرمہ کا حصہ شمار ہوتے ہیں؟ بعض لوگ کہتے ہیں کہ چونکہ یہ علاقے مکہ کا حصہ ہیں، اس لیے اگر کل قیام (بشمول 5 ایام حج) 15 دن ہو جائیں تو آپ "مقیم" شمار ہوں گے۔ اس بارے میں شرعی حکم کیا ہے؟

اَلجَوَابْ بِاسْمِ مُلْہِمِ الصَّوَابْ

ہماری رائے یہ ہے کہ چونکہ منی اب  مکہ شہر کی آبادی میں داخل ہوگیا ہے، لہذا بحیثیت مجموعی  اگر کوئی صاحب  مکہ اور منی میں پندرہ روز یا اس سے زائد قیام کریں گے  تو وہ مقیم شمار ہوں گے،نیز قصر کے بجائے اتمام (پوری نماز پڑھنا) ضروری ہوگا اور یہی حکم مزدلفہ کا بھی ہے،اسی طرح عرفات اگرچہ مکہ کی آبادی سے خارج ہے،لیکن مکہ میں مقیم حضرات کے لیے صرف عرفات تک کے سفر کی وجہ سےاس میں قصر جائز نہ ہوگا،بلکہ وہاں بھی اتمام ضروری ہوگا۔بعض حضرات  اہل علم کی رائے یہ ہے کہ مکہ ،منی    الگ الگ مقامات ہیں لہذا  مکہ اور منی میں مجموعی طور پر پندرہ روز کے قیام سے  آدمی مقیم  شمار نہیں  ہوگا بلکہ مسافر ہی رہے گا۔مقیم ہونے کیلئے منی جانے سے پہلے مکہ  میں پندرہ دن یا زیادہ قیام ہونا ضروری ہے۔

باقی اہل حق علماءکے اختلاف کی صورت میں جن اہل علم کے علم وتقوی پر آپ کو اعتمادہو ان کے مسئلہ وموقف پر عمل کرنےکے آپ مکلف ہیں۔ اس پر آپس میں بحث و مباحثہ کرکے اختلاف و انتشاز کی فضا پیدا کرنا بہت بری بات ہے۔(مستفاد از تبویب جامعۃ الرشید:77338)

.