سوال

کیا ڈیجیٹل تصویروں  والا کام کرنا جائز ہے ؟ میرے دوست کو کسی قسم کی احتیاط کرنے کی ضرورت ہے جس کی وجہ سے اس کی آمدن حرام نہ ہو۔

اَلجَوَابْ بِاسْمِ مُلْہِمِ الصَّوَابْ

ایسےمناظر کی تصویر کشی  میں تو بالاتفاق کوئی حرج نہیں جو کسی جاندار کی تصویر پر مشتمل نہ ہو، چاہے وہ ڈیجیٹل صورت میں ہو،یا پرنٹ شدہ ،جبکہ کسی جاندار کی ڈیجیٹل تصویر کے محرم تصویر میں داخل ہونے یا نہ ہونے میں  معاصر علماء کے درمیان اختلاف ہے،بعض کے نزدیک یہ تصویر محرم میں داخل نہیں،بشرطیکہ اس میں تصویر ہونے کے علاوہ کوئی اور حرام پہلو، مثلا: عریانیت،موسیقی یا غیر محرم کی تصاویر وغیرہ نہ ہوں،جبکہ بعض  کے نزدیک یہ تصویر محرم میں داخل ہے۔

اس لئے غیر جاندار اشیاء کی تصاویربنانےکے عوض ملنے والی آمدن تو بالاتفاق حلال ہے،جبکہ کسی جاندار کی ایسی ڈیجیٹل تصویر بنانے کی کمائی میں معاصر علماء کا اختلاف ہے جس میں تصویر ہونے کے علاوہ کوئی اورحرام پہلو نہ ہو،بعض کے نزدیک حلال ہے،جبکہ دیگر بعض کے نزدیک حرام ہے،اس لئےاس قسم کی ڈیجیٹل تصاویر کے کام کوبھی  ذریعہ آمدن بنانے سے احتراز بہتر ہے۔

........