سوال

میں محمد مدثر قدیرگزشتہ چھ سال سے جامعۃ الرشید میں زیرِ تعلیم ہوں۔ حال ہی میں میرے دل میں یہ احساس پیدا ہوا کہ مدرسے میں استعمال ہونے والی تمام اشیاء وقف کے مال سے ہیں، جن کا استعمال نہایت احتیاط اور امانت داری کا متقاضی ہے۔ اس بات کا بھی ادراک ہوا کہ میں نے ماضی میں ان اشیاء کے استعمال میں بعض بے احتیاطیاں کی ہیں۔

 مثال کے طور پر بعض اوقات جامعہ کی بجلی کا غیر ضروری استعمال کیا ، اسی طرح کھانے کے وقت پیٹ بھرنے کے لیے دو روٹیاں کافی ہوتی تھیں لیکن میں نے بے احتیاطی سے تین روٹیاں لے لیں۔ اس کے علاوہ واشنگ مشین کا ذاتی سہولت کے لیے ضرورت سے زیادہ  استعمال کیا، اور وضو و غسل کے دوران پانی کے استعمال میں بھی اسراف کیا۔اب سوال یہ ہے کہ ایسی کوتاہیوں کے ازالے کی کیا صورت ہو سکتی ہے ؟ کیونکہ یہ تمام اشیاء اموالِ وقف سے تعلق رکھتی ہیں جن میں تمام طلبہ  کا حق شامل ہے، اور شرعی اعتبار سے اس میں کوتاہی گناہ کے زمرے میں آتی ہے۔

اَلجَوَابْ بِاسْمِ مُلْہِمِ الصَّوَابْ

واضح رہے کہ مساجد اور مدارس کے وقف اموال  میں اسراف یا بے احتیاطی کرنا خیانت کے زمرے میں آتا ہے۔ ایسی صورتِ حال میں سب سے پہلے   صدقِ دل سے اللہ تعالیٰ کے حضور   توبہ کریں اور آئندہ کے لیے وقف کے مال میں مکمل احتیاط سے کام لینے کا عزم کریں  تاکہ دوبارہ کسی قسم کی کوتاہی نہ ہو۔ اس کے علاوہ  جو کچھ اسراف یاوقف کی چیزوں کا  بے جا استعمال کیاہےتو  اندازے کے مطابق  کچھ رقم  بطورِ تلافی جامعہ کو ہدیہ یا صدقہ کے عنوان  سے واپس کر دیں۔

........