سوال

 ہماری مسجد میں سارا سال نماز ظہر 1:30 پر ہوتی ہے۔ بعض نمازی حضرات امام مسجد پر اعتراض کرتے ہیں کہ یہ حدیث اور سنت کے خلاف ہے، سردی میں ایک بجے نماز ہونی چاہیے۔ امام مسجد کا کہنا ہے کہ اس میں کوئی حرج نہیں، یہ استحبابی حکم ہے کوئی واجب نہیں۔ اب پوچھنا یہ ہے کہ کس کا مؤقف درست ہے، آیا امام کا یا مقتدیوں کا؟ از راہ کرم احادیث کی روشنی میں مدلل جواب دیں۔

اَلجَوَابْ بِاسْمِ مُلْہِمِ الصَّوَابْ

نماز ظہر کا وقت زوال کے بعد سے شروع ہوکر کسی شے کے سایہ اصلی کے علاوہ دو مثل ہوجانے تک  رہتا ہے۔ چنانچہ اس دورانیہ میں کسی بھی وقت ظہر کی نماز پڑھی جاسکتی ہے۔ البتہ مستحب عمل یہ ہے کہ سردی میں ذرا جلدی نماز پڑھی جائے اور گرمی میں تھوڑی تاخیر سے نماز پڑھی جائے۔ اس میں بھی یہی حکمت ہےکہ لوگ آسانی سے اور زیادہ جمع ہوسکیں،اورعوام کو تکلیف نہ ہو۔ اگر وقت مقرر کرنے  کی وجہ سے یہ حکمت حاصل ہوجائے تو کوئی حرج نہیں۔  لہذا اگر کسی علاقہ میں امام مسجد تمام نمازیوں کی رعایت رکھتے ہوئے 1:30 بجے ظہر کی نماز پڑھاتا ہے، تو اس میں کوئی مضائقہ نہیں۔

الفتاوى الهندية: (ج:1،ص:51،ط:دارالفکر)

  "ووقت الظهر من الزوال إلى بلوغ الظل مثليه سوى الفيء. كذا في الكافي وهو الصحيح... ويستحب تأخير الظهر في الصيف وتعجيله في الشتاء. هكذا في الكافي سواء كان يصلي الظهر وحده أو بجماعة."

الأصل: (ج:1،ص:122،ط:دار ابن حزم)

 "قلت: أرأيت ‌وقت ‌الظهر متى هو؟ قال: من حين تزول الشمس إلى أن يكون الظل قامة في قول أبي يوسف ومحمد. وقال أبو حنيفة: لا يدخل وقت العصر حتى يصير الظل قامتين، فإذا صار الظل قامتين دخل وقت العصر."