سوال

کیا نکاح کے موقع پر لڑکی کی جانب سے پانچ لاکھ روپے بطور سیکیورٹی، پلاٹ، دو تولہ سونا یا دیگر مالی شرائط عائد کرنا شرعاً درست ہے؟

اَلجَوَابْ بِاسْمِ مُلْہِمِ الصَّوَابْ

واضح رہے  کہ  مہر عورت کا شرعی حق ہے اور اس کی زیادہ سے زیادہ کوئی حد مقرر نہیں۔ لہٰذا پانچ لاکھ روپے، پلاٹ، دو تولہ سونا یا کوئی دوسری مالیت رکھنے والی اور شرعاً قابلِ تملیک چیز مہر میں مقرر کرنا جائز ہے۔

اگر پانچ لاکھ روپے بطور سیکیورٹی سے مراد مؤخر مہر ہے، یعنی شوہر کے ذمے واجب الادا مہر کا وہ حصہ جو بعد میں ادا کیا جائے، تو یہ شرعاً جائز ہے۔

لیکن اگر سیکیورٹی سے مراد مہر کے علاوہ کوئی ایسی مالی شرط ہو جو ضمانت یاجرمانے کے طور پر عائد کی جائے، یا لڑکی کے والدین و رشتہ دار اپنے لیے رقم، قیمتی تحائف، پلاٹ یا دیگر مالی فوائد کا مطالبہ کریں، تو ایسی شرائط شرعاً درست نہیں، کیونکہ یہ غیر شرعی مالی مطالبات ہیں اور نکاح کو غیر ضروری طور پر دشوار بناتے ہیں۔