سوال

اگر شوہر رات کو سوتے وقت بیوی کو اپنے ساتھ اکھٹے سونے کا کہے اور بیوی جان بوجھ کر حیلے بہانے بنا کر یا بچوں کا بہانہ بنا کر شوہر سے دور جا کر سوجائے ( خود ہی اپنا بستر الگ کر لیتی ہو ) اور بعد میں یہ کہے آپ تو سیکس کے بھوکے ہو، ہر وقت سیکس کا کہتے ہو ،جب شوہر کا دل کر رہا ہو اور بیوی الزام لگا کر بستر الگ کر کے سو جاتی ہو، بیوی کے میسر نہ ہونے کی ایسی صورت میں شوہر بہت مجبور ہو کر پھر خود اپنے ہی ہاتھ سے فارغ کرتا ہو اور جب بیوی کا خود  دل کرے تو شوہر کے بستر میں آ کر ساتھ میں سو جائے اور بہانے سے شوہر کو ہم بستری پر راضی کر لے تو قرآن و سنت کی روشنی میں شریعت کا بیوی پر کیا حکم لاگو ہوتا ہے؟ یا ایسی بیوی سے متعلق شوہر پر شریعت کا کیا حکم لاگو ہوتا ہے؟

اَلجَوَابْ بِاسْمِ مُلْہِمِ الصَّوَابْ

شریعت نے جنسی خواہش کی تسکین کے لیے  عفت والا راستہ  نکاح متعین کیاہے ، اس حلال راستہ کے علاوہ کسی بھی طریقہ سے اپنی خواہش پوری کرنا حدودسے تجاوز کرنے کی بنا پر ناجائز اور حرام ہے ۔لہذا شوہر پر لازم ہے کہ قبیح فعل پر توبہ و استغفار کرے۔نیز بیوی کو ہمبستری سے  اگر واقعی کوئی عذر ہو تو صبر سے کام لے یا مکمل جماع کرنے کی بجائے بیوی کی رانوں کے درمیان    رگڑ نےسے کام چلائے۔

  دوسری طرف  شریعت کا حکم یہ ہے کہ شوہر کی جنسی فطری ضرورت اور خواہش کی تکمیل بیوی پر لازم ہے، شرعی عذر کے  بغیر بیوی کے لیےشوہر کوتسکینِ شہوت سے روکنا ناجائز اور حرام ہے ،  احادیث میں ایسی عورت کے  لیےسخت وعید آئی ہے،چنانچہ حدیث  شریف میں  آیا ہے:

"جب کوئی شوہر  اپنی بیوی کو اپنے بستر پر بلائے اور وہ نہ آئے،  پھر اسی طرح غصہ میں اس نے رات گزاری تو صبح تک سارے فرشتے اس عورت پر لعنت کرتے رہتے ہیں"۔

مسلم کی ایک دوسری روایت ہے:" رسول اکرم صلی اللہ علیہ وسلم نے فرمایا: قسم ہے اس ذات کی جس کے قبضہ میں میری جان ہے، جو شخص اپنی بیوی کو اپنے پاس بستر پر بلائے، وہ انکار کردے تو باری تعالی اس سے ناراض رہتا ہے یہاں تک کہ شوہر اس (بیوی) سے راضی ہوجائے"۔

قال اللہ تعالٰی:{وَالَّذِينَ هُمْ لِفُرُوجِهِمْ حَافِظُونَ إِلَّا عَلَى أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ فَمَنِ ابْتَغَى وَرَاءَ ذَلِكَ فَأُولَئِكَ هُمُ الْعَادُونَ}. [سورۃ المومنون : 5]

أخرج الإمام البخاری رحمہ اللہ :وعن أبي هريرة قال : قال رسول الله صلى الله عليه وسلم : " إذا دعا الرجل امرأته إلى فراشه فأبت فبات غضبان لعنتها الملائكة حتى تصبح  . (البخاری:303/4)(رقم: 3244)                             

أخرج الإمام  مسلم   رحمہ اللہ : حدثنا ابن أبي عمر ، حدثنا مروان ، عن يزيد - يعني: ابن كيسان -، عن أبي حازم ، عن أبي هريرة ، قال: قال رسول الله صلى الله عليه وسلم: « ‌والذي ‌نفسي ‌بيده، ‌ما ‌من ‌رجل ‌يدعو ‌امرأته إلى فراشها، فتأبى عليه، إلا كان الذي في السماء ساخطا عليها، حتى يرضى عنها.  (مسلم:157/4)(رقم:1736)                                                                                                                                                         أخرج الإمام البیھقی  رحمہ اللہ :عن أنس بن مالك عن النبي صلى الله عليه وسلم قال:سبعة لا ينظر الله عز وجل إليهم يوم القيامة ولا يزكيهم ولا يجمعهم مع العالمين يدخلهم النار أول الداخلين إلا أن يتوبوا إلا أن يتوبوا إلا أن يتوبوا فمن تاب تاب الله عليه ‌الناكح ‌يده ‌والفاعل ‌والمفعول ‌به [والمدمن بالخمر] والضارب أبويه حتى يستغيثا والمؤذي جيرانه حتى يلعنوه والناكح حليلة جاره. ( شعب الإيمان:378/4)(رقم:5470)