سوال

ایک شخص نے لڑائی کے دوران اپنی بیوی کو چار سے پانچ دفعہ کہا "میں تجھے فارغ کرتا ہوں "یا "طلاق دیتا ہوں"" فارغ کر دوں گا "طلاق دے دوں گا "مطلب اسے اس بات میں شک ہے کہ میں نے حال کا صیغہ استعمال کیا تھا یا استقبال کا ،البتہ اس بات کا یقین ہے کہ مذکورہ بالا الفاظ پانچ دفعہ استعمال کیے ہیں، اس صورت میں اس شخص کے لیے کیا حکم ہے ؟کیا اس کی بیوی کو طلاق واقع ہو جائے گی؟

اَلجَوَابْ بِاسْمِ مُلْہِمِ الصَّوَابْ

صورت مسئولہ میں اس شخص کو حال اور استقبال  کے الفاظ استعمال  کرنے میں شک ہے  ، حال کے الفاظ ("میں تجھے فارغ کرتا ہوں "یا "طلاق دیتا ہوں")سے طلاق واقع ہوجاتی ہےاور  استقبال کے الفاظ (" فارغ کر دوں گا "طلاق دے دوں گا ")سے طلاق  واقع نہیں ہوتی ،دونوں صورتوں میں حکم مختلف ہے،لہذا اس صورت میں غور وفکر کریں کہ اس نے کونسے الفاظ استعمال کیے ہیں ،اگر اس کا غالب گمان یہ ہے کہ اس نے حال کے الفاظ استعمال کیے ہیں تو اس صورت میں تین طلاقیں واقع ہوگئیں ،اگر اس کا غالب گمان یہ ہے کہ استقبال کے الفاظ استعمال کیے ہیں ، یا  دونوں جانب میں شک اور تردد  ہو تو اس صورت میں طلاق واقع نہیں ہوئی  ۔

قال العلامة الحصكفي رحمه الله: علم أنه حلف ولم يدر بطلاق أو غيره لغا كما لو شك أطلق أم لا. ولو شك أطلق واحدة أو أكثر بنى على الأقل.

قال العلامة ابن عابدین  رحمه الله:قوله :(بنى على الأقل) أي كما ذكره الإسبيجابي، إلا أن يستيقن بالأكثر أو يكون أكبر ظنه. وعن الإمام الثاني إذا كان لا يدري أثلاث أم أقل يتحرى؛ وإن استويا عمل بأشد ذلك عليه؛ أشباه عن البزازية قال ط: وعلى قول الثاني اقتصر قاضي خان؛ ولعله لأنه يعمل بالاحتياط خصوصا في باب الفروج. اهـ.(الدرالمختار مع ردالمحتار:3/283)