سوال

محترم مفتیان کرام

السلام علیکم ورحمۃ اللہ وبرکاتہ

کیا فرماتے ہیں علمائے کرام ومفتیان عظام درج ذیل مسئلے کے بارے میں کہ  والد کی وفات کے تین ماہ بعد والدہ کا انتقال ہوا تھا۔والدہ مرحومہ نے عدت کے دوران اپنے ایک بیٹے کو بطور خواہش یہ بات کہی تھی کہ میں اپنے حصے کی رقم سے حج پہ جانا چاہتی ہوں اور اگر نا جا سکوں تو میرے حصے کی رقم مسجد اور قبرستان کی ضروریات میں خرچ کردینا ،اس بھائی نے اپنے دو بھائیوں کو بلوایا اور والدہ سے کہا کہ آپ جو کہہ رہی تھی وہ ان دو بھائیوں کے سامنے دوبارہ کہہ دیں والدہ نے دوبارہ اسی طرح کہہ دیا۔اس پر بڑے بھائی سلیم اصرار کررہے ہیں کہ میں خود  والدہ کاپورا حصہ والدہ کی خواہش کے مطابق خرچ کروں گا ،مگر دیگر ورثاء کا کہنا ہے کہ رقم سب میں تقسیم کی جائے اور ہر کوئی اپنی مرضی سے والدہ کی وصیت کو پورا کرے۔کون سا عمل شریعت کے نزدیک درست ہے ،جس میں تنازع بھی نا ہو اور دوسری بات یہ کہ والدہ کی کل رقم کو وصیت میں خرچ کیا جائے گا یا اس کا کچھ حصہ؟

        تمام ورثاء نے اس سوال نامے کو بغور پڑھ لیا اور حلفیہ اقرار کرتے ہیں کہ اس سوال کا جوبھی شرعی فیصلہ آئے گا وہ سب کو دل وجان سے منظور ہوگا اور اس پر عملدرآمد کرنے میں ذرا بھی رکاوٹ نہیں ڈالیں گے۔

اَلجَوَابْ بِاسْمِ مُلْہِمِ الصَّوَابْ

جس بیٹے کو والدہ نے بلواکر دوگواہوں کے سامنے اپنے بعد وصیت پوری کرنے کی ذمہ داری سونپی تھی وہ ان کا وصی ہے اور اس پر لازم ہے کہ وہ ان کی وصیت پر مکمل امانت کے ساتھ عملدارآمد کرے۔چونکہ مشورہ باعث خیر ہے ،لہذا دیگر بہن بھائیوں سے بھی اس ذمہ داری کوبہتر طریقے سے انجام دینے کے لیے مشورہ کیا جاسکتاہے۔

والدہ کی وصیت کی تکمیل ان کی وفات کے وقت ان کی ملکیت میں موجود کل مال کے ایک تہائی حصے سے کرنا لازم ہے۔اس سے زائد نہیں ،البتہ تمام ورثاء اگر راضی ہوں تو ایک تہائی سے زیادہ بھی دیا جاسکتا ہے۔

بدائع الصنائع في ترتيب الشرائع (7/ 393)

وأما) الوصية بالإنفاق على فلان، وأوصى بالقرب فحكمها وجوب فعل ما دخل تحت الوصية؛ لأنه هكذا أوصى، ويعتبرذلك كله من الثلث، والله - سبحانه وتعالى - أعلم.

تبيين الحقائق شرح كنز الدقائق وحاشية الشلبي (6/ 230)

(ثم وصيته) أي ثم تنفذ وصيته من ثلث ما بقي بعد التجهيز والدين لما تلونا.وفي أكثر من الثلث لا تجوز إلا بإجازة الورثة