سوال

کیافرماتے ہیں علماء کرام اس مسئلہ کے بارے میں کہ

میری شادی کو تقریباً ساڑھے گیارہ سال ہو گئے ہیں، جس میں میرا ایک بیٹا ہے جو ساڑھے دس سال کا ہے۔ شادی کے شروع میں مختلف مسائل آئے جن میں سرِ فہرست معاشی مسائل تھے۔ میرے شوہر ڈاکٹر ہیں؛ شروع میں آمدنی کم تھی لیکن اتنی بھی نہیں تھی کہ میرا خرچہ نہ اٹھا سکیں۔ اس کے باوجود وہ ایک روپیہ بھی نہیں دیتے تھے اور یہ کہ گھر کا جو مجموعی خرچہ دے دیا، اسی میں سے میں سب پورا کروں۔

جس وقت شادی ہوئی، اس وقت میری نوکری نہیں تھی لیکن شادی سے پہلے میں سول ہسپتال میں ملازم تھی۔ اس پر سسرال والوں کا یہ کہنا تھا کہ میں اس (سابقہ) پیسے سے اپنا خرچہ پورا کروں، جبکہ میرے شوہر کے ماں باپ اور بھائی جب بھی پیسے مانگتے، وہ انہیں دے دیتے تھے۔ اس دوران الگ گھر لیا لیکن اس میں کچھ پیسوں کا مسئلہ تھا، تو میرے شوہر کے بھائی نے ان سے پیسے مانگے، لیکن میرے شوہر کے پاس نہیں تھے۔ انہوں نے مجھ سے مانگے لیکن میرے پاس اتنے پیسے نہیں تھے، تو بدلے میں میرا خرچہ جو صرف دو ہزار تھا وہ بھی بند کر دیا اور مجھے کہا کہ صرف دال سبزی پر گزارا کرو۔

میں بیمار ہوئی (ایک بار ہیپاٹائٹس A ہوا اور ایک بار شدید نمونیا)، تو مجھے میرے والد کے گھر بھیج دیا اور میرا پرسانِ حال تک نہ ہوا۔ ان رویوں کی وجہ سے میں نے الگ رہنے کا فیصلہ کر لیا اور کرایہ کا گھر لے لیا، لیکن اس میں بھی آئے دن لڑائی جھگڑے اور پیسے نہ دینے کا مسئلہ رہا۔ اسی دوران ایک عید کا موقع تھا اور میں نے گوشت لانے کا کہا، لیکن شوہر نے کہا کہ پیسے نہیں ہیں۔ میں نے کہا کہ آپ کی ہسپتال میں نوکری ہے (ایک سرکاری نوکری جو صبح سے ہے، ایک نجی ہسپتال میں مستقل نوکری اور باقی پرائیویٹ ہسپتالوں میں پارٹ ٹائم)، لیکن آپ پیسے نہیں دیتے؛ اس پر میرے شوہر نے قسم کھائی کہ "میں کوئی ازدواجی تعلق نہیں رکھوں گا"۔ یہ سلسلہ ایک سال تک رہا۔

اس کے بعد میں نے اپنی بچت کے پیسوں سے ایک چھوٹا فلیٹ لیا اور وہاں شفٹ ہو گئے، تو اس گھر میں آنے کے بعد بھی یہی مسئلے رہے کہ شوہر پیسے نہیں دیتے تھے، یہاں تک کہ بلڈنگ کے مینٹیننس کے ہزار روپے کے لیے بھی کہا کہ میرے پاس نہیں ہیں۔ اسی طرح ہر وقت لڑائی جھگڑا رہتا۔ ایک دن لڑائی میں مجھے بہت مارا، اتنا مارا کہ میرے سر اور کندھوں پر نیل پڑ گئے اور بیٹے کو لے کر اپنی والدہ کے گھر چلے گئے اور دو ہفتے وہیں رہے۔ اس دوران وہ محلہ مسجد کے امام صاحب (جو گلستانِ جوہر میں ہوتے ہیں اور میاں بیوی کے مسائل حل کراتے ہیں) کے پاس گئے، تو انہوں نے کہا کہ "آپ نے جو قسم کھائی تھی اس کا کفارہ ادا کرو (جو کہ پانچ ہزار روپے بنتے تھے) اور اپنی بیوی سے تعلق استوار کرو اور بیٹے کو لے کر گھر جاؤ"۔

جب میرے شوہر گھر واپس آئے تو معافی مانگی، لیکن ایک ہفتے کے بعد انہوں نے کہا: "مجھے یہ یقین نہیں آتا کہ کوئی عورت اتنی مار کھا کر بھی اپنے شوہر سے تعلق بحال کر سکتی ہے، تمہارا یقیناً کسی اور سے ناجائز تعلق رہا ہے اور اب میں تمہیں اس وقت تک ہاتھ نہیں لگاؤں گا جب تک یہ یقین نہ ہو جائے کہ تمہارا کردار صحیح ہے"۔ اوریہ بھی کہا کہ میرے ساتھ اورل سیکس کرکے میری شہوت پوری کرو، یہ الفاظ اس شخص نے ہم بستری کرنے کے فوراً بعد کہے تھے۔ اس کے بعد تقریباً چھ ماہ کا عرصہ گزر گیا لیکن اس شخص نے نہ کوئی تعلق رکھا اور نہ ہی کوئی بات چیت ہوئی۔

تقریباً چھ ماہ گزرنے کے بعد جب میں نے کہا کہ "مجھے طلاق دے دو"، تو کہنے لگے کہ "میں نے تو ایسا کچھ بھی نہیں کہا تھا" اور یہ کہ "میں نامرد ہو گیا ہوں"۔ جس پر میں نے کہا کہ اگر نامردی ہے تو اس کا علاج ہوتا ہے، لیکن اس پر وہ خاموش ہو گئے۔ جب بھی یہ بات ہوتی وہ گھر چھوڑ کر چلے جاتے۔ ایک بار میرے والدین بھی گھر میں تھے، میں نے بات کرنے کی کوشش کی تو وہ پھر گھر چھوڑ کر چلے گئے۔ اس بات کو اب چار سال کا عرصہ گزر گیا ہے۔

میرے سوالات درج ذیل ہیں:

سوال نمبر 1: اگر کوئی شوہر یہ قسم اٹھا لے یا یہ الفاظ کہے کہ "میں اپنی بیوی کو ہاتھ نہیں لگاؤں گا" اور اس بات پر چار سال کا عرصہ گزر جائے، تو کیا نکاح رہتا ہے؟ جبکہ شوہر کا مقصد بھی یہی ہو کہ وہ کوئی ازدواجی تعلق نہیں رکھنا چاہتا، کیونکہ اگر رکھنا ہوتا تو جو نامردی کا بہانہ بنایا اس کا علاج کروایا جاتا۔

سوال نمبر 2: اگر یہ نکاح ختم ہو گیا، تو شوہر نے جو وقت گھر پر گزارا اس کی شرعی حیثیت کیا ہے؟

سوال نمبر 3: اس چار سال کے عرصے کے بعد دوبارہ میرے شوہر سے لڑائی ہوئی اور انہوں نے دوبارہ مجھ پر ناجائز تعلقات کا الزام لگایا، لیکن مجھ سے کوئی بات نہیں کی بلکہ صرف میرے والدین سے بات کی اور بیٹے کو لے کر گھر سے چلے گئے اور مجھے طلاق دے دی(سائلہ کے گزشتہ استفتاء 47/27436 میں شوہر کی طرف سےبذریعہ میسج تین طلاق دینے، بچے کو ساتھ لے جانے اور تحفے کی واپسی کا مطالبہ تھااورایلاء کا ذکرنہیں تھا)۔ اب اس طلاق کی شرعی حیثیت کیا ہے؟

سوال نمبر 4: کیا اولاد کو زبردستی اس طرح گھر سے لے جانا اور اسے ماں سے نہ ملوانا، نیز فون بھی بند کر دینا، کیا یہ سب صحیح ہے؟ میرے بیٹے کے پاس اپنا موبائل تھا، انہوں نے وہ بھی چھین لیا اور بیٹے کو یہ کہہ دیا کہ "ماں کے گھر جاؤ گے تو وہاں تمہیں کوئی نقصان پہنچائے گا یا کوئی مار دے گا"۔ اس بات کو ایک ماہ سے زیادہ ہو گیا ہے اور میں نے اپنے بیٹے کی شکل تک نہیں دیکھی۔

براہِ مہربانی ان تمام سوالوں کے مکمل جواب دے کر رہنمائی فرمائیں۔

اَلجَوَابْ بِاسْمِ مُلْہِمِ الصَّوَابْ

(1) شریعتِ مطہرہ کی اصطلاح میں اگر شوہر یہ قسم کھا لے کہ وہ اپنی بیوی سے ازدواجی تعلق قائم نہیں کرے گا، تو اسے "ایلاء" کہا جاتا ہے۔فقہ حنفی کے مطابق، اگر شوہر اس قسم کے بعد چار ماہ (یا اس سے زائد عرصہ) تک بیوی سے کوئی ازدواجی (جسمانی) تعلق قائم نہ کرے، تو چار ماہ گزرتے ہی بیوی پر خود بخود ایک طلاقِ بائن واقع ہو جاتی ہے اور نکاح ٹوٹ جاتا ہے۔

صورتِ مسئولہ میں شوہر نے پہلے بھی ایک سال تک قسم کھا کر تعلق نہیں رکھا (جس سے پہلی طلاقِ بائن واقع ہو چکی تھی اور تجدیدِ نکاح کے بغیر ساتھ رہنا شرعاً درست نہیں تھا)۔ اس کے بعد دوبارہ شوہر نے یہ الفاظ کہے کہ "میں تمہیں اس وقت تک ہاتھ نہیں لگاؤں گا جب تک یقین نہ ہو جائے..." اور اس بات پر چار سال گزر گئے۔ لہٰذا، اس صورت میں شرعاً نکاح بہت پہلے (چار ماہ مکمل ہونے پر) ختم ہو چکا ہے اور دونوں ایک دوسرے کے لیے نامحرم ہو چکے ہیں۔ نامردی کا دعویٰ کرنا یا نہ کرنا اس طلاق کے واقع ہونے میں مانع نہیں ہے۔

(2) چونکہ "ایلاء" (چار ماہ تک تعلق نہ رکھنے کی قسم) کی وجہ سے نکاح ختم ہو کر طلاقِ بائن واقع ہو چکی تھی، اس لیے اس کے بعد تجدیدِ نکاح (دوبارہ نکاح) کیے بغیر ایک ساتھ میاں بیوی کی حیثیت سے رہنا شرعاً ناجائز اور حرام تھا۔اگر یہ لاعلمی یا جہالت کی بنا پر ہوا ہے، تو اس پر اللہ تعالیٰ کے حضور سچے دل سے توبہ و استغفار کرنا لازم ہے۔ نکاح ٹوٹنے کے بعد جو وقت ساتھ گزارا گیا، اس کی شرعی حیثیت حرام تعلق اور ناجائز رفاقت کی ہے۔

(3) کسی پاک دامن عورت پر بغیر چار شرعی گواہوں کے ناجائز تعلقات (زنا) کا الزام لگانا شریعت میں "قذف" کہلاتا ہے جو کہ حد درجہ سنگین اور کبیرہ گناہ ہے۔ ایسا الزام لگانے والا شخص قرآنِ مجید کی رو سے فاسق ہے اور اللہ کے ہاں سخت مجرم ہے۔

جہاں تک طلاق کی حیثیت کاتعلق ہے توجیسا کہ پہلے عرض کیا گیا کہ چار سال قبل ایلاء کی وجہ سے طلاقِ بائن واقع ہو کرعدت گزرکر نکاح پہلے ہی ختم ہو چکا تھا۔ لہٰذا، اب جو شوہر نے طلاق دی ہے، وہ ایک ایسے رشتے پر دی گئی ہے جو پہلے ہی ٹوٹ چکا تھا۔ فقہی اعتبار سے یہ طلاق "تحصیلِ حاصل" ہے، یعنی نکاح پہلے ہی ختم تھا، تاہم اس حالیہ طلاق نے اس علیحدگی اور رشتے کے حتمی خاتمے کی مزید توثیق کر دی ہے۔

اہم تنیہ: چونکہ سائلہ کے گزشتہ استفتاء (47/27436) میں شوہر کی طرف سے بذریعہ میسج تین طلاقیں دینے، بچے کو ساتھ لے جانے اور تحفے کی واپسی کا مطالبے ہی ذکر تھا اور اس میں "ایلاء" کا ذکر شامل نہیں تھا، اس بنا پرجواب میں تین طلاقوں کا حکم لکھا گیا تھا۔ اب جبکہ سائلہ نے دوبارہ سوال میں ایلاء والی تفصیل بھی لکھ دی ہے، جس سے شرعی حکم تبدیل ہو رہا ہے، اس بنا پر اس فتویٰ میں ایک طلاق کا حکم لکھا گیا ہے۔ گویا سوال کے مختلف ہونے کی وجہ سے حکم مختلف ہوا ہے۔

(4) شریعت نے اولاد کی پرورش اور ملاقات کے حوالے سے واضح احکامات دیے ہیں:ساڑھے دس سال کے لڑکے کی پرورش (حضانت) کا حق فقہی اعتبار سے اگرچہ باپ کے پاس آ جاتا ہے، لیکن ماں سے اس کی اولاد کو ملنے سے روکنا، بچے کا موبائل چھین لینا، اور ماں سے رابطہ مکمل منقطع کر دینا شرعاً سخت ناجائز، ظلم اور قطع رحمی (رشتہ توڑنے) کے زمرے میں آتا ہے۔بچے کے ذہن میں ماں کے خلاف زہر گھولنا، اسے ڈرانا کہ "ماں کے گھر جاؤ گے تو کوئی مار دے گا"، شرعاً و اخلاقاً ایک انتہائی قبیح عمل ہے۔ شریعت کسی بھی صورت میں باپ کو یہ حق نہیں دیتی کہ وہ بچے کے دل میں ماں کی نفرت بٹھائے۔ماں کا یہ بنیادی اور شرعی حق ہے کہ وہ اپنے بچے سے ملے اور بچہ اپنی ماں سے ملے۔ اس حق کو روکنے والا شخص اللہ کے ہاں ظالم اور گناہ گار تصور ہوگا۔

خلاصہ کلام یہ ہے کہ:

یہ رشتہ ایک طلاق بائن کے ساتھ شرعی طور پر مکمل طور پر ختم ہو چکا ہے۔ شوہر کا رویہ بشمول مالی حق تلفی، جسمانی تشدد، جھوٹے الزامات (قذف) اور ماں کو بچے سے دور کرنا  ظلم ہے۔ آپ بچے سے ملاقات کے شرعی اور قانونی حق کے حصول کے لیے قانونی چارہ جوئی (فیملی کورٹ سے رجوع) کرسکتی ہے، تاکہ پاکستان کے عائلی قوانین کے تحت آپ کو بچے سے ملاقات کا حق (Visitation Rights) باقاعدہ طور پر مل سکے۔

وفی الشامیة :

"(هو) لغة اليمين. وشرعا (الحلف على ترك قربانها) مدته... وركنه الحلف(وشرطه محلية المرأة) بكونها منكوحة وقت تنجيز الإيلاء... (وأهلية الزوج للطلاق)...(وحكمه وقوع طلقة بائنة إن بر) ولم يطأ."(كتاب الطلاق، باب الإيلاء، ج:٣، ص:٤٢٤، ط:سعيد)

وفی فتح القدیر :

"وحكمه ‌لزوم ‌الكفارة أو الجزاء المعلق بتقدير الحنث بالقربان، ووقوع طلقة بائنة بتقدير البر."(كتاب الطلاق، باب الإيلاء، ج:٤، ص:١٨٩، ط:دارالفكر)

جاء في "أحسن الفتاوى":

"لو حلف زيدٌ أن لا يقرب زوجته مدة أربعة أشهر أو أكثر، أو أتى بلفظٍ يصلح أن يكون صريحاً في الإيلاء أو كنايةً عنه—بحيث يُفهم منه حرمة الجماع—أو علَّق صحبتها بفعلٍ فيه مشقة، كأن قال: 'إن جامعتُها فهي طالق'، فهذا إيلاء. وفي هذه الصورة، يقع عليها طلاقٌ بائنٌ إذا لم يقربها حتى مضت أربعة أشهر." (کتاب الطلاق، باب الایلاء، ج:5، ص:373، ط:سعید)

الفتاوى الهندية (1/ 532):

المطلقة ثلاثا إذا جامعها زوجها في العدة مع علمه أنها حرام عليه ومع إقراره بالحرمة لاتستأنف العدة، ولكن يرجم الزوج، والمرأة كذلك  إذا قالت علمت بالحرمة، ووجدت شرائط الإحصان، ولو ادعى الشبهة بأن قال ظننت أنها تحل لي تستأنف العدة بكل وطأة، وتتداخل مع الأولى إلا أن تنقضي الأولى، فإذا انقضت الأولى وبقيت الثانية والثالثة كانت هذه عدة لوطء لا تستحق النفقة في هذه الحالة، وهذا الذي ذكرنا إذا جامعها مقرا بطلاقها، وأما إذا جامعها منكرا لطلاقها فإنها تستقبل العدة كذا في الذخيرة.

وفی الھندیة:

"الولد متى كان عند أحد الأبوين لا يمنع الآخر عن النظر إليه وعن تعاهده كذا في التتارخانية ناقلا عن الحاوي."(کتاب الطلاق ،الباب السادس عشر  فی الحضانة ،ج:543/1،ط:رشیدی)