سوال

ایک طلاق دینے کے کچھ یر  بعد   تین کا  لفظ  استعمال کرنے کا حکم

کیا فرماتے  ہیں علما ء کرام  اس مسئلہ  کے بارے میں کہ     کلیم  اللہ  نامی شخص  نے  اپنی   بیوی سے  ایک  جھگڑے  کے دوران  کہا   کہ تم کو طلاق ہے ،  اس کے کچھ دیر بعد  چند  قدم  آگے چل کرکہا   تین  ۔یعنی  ایک دو نہیں تین سمجھنا ، گھر  سے باہر     عزیز   واقار ب سے ملا   ان  سے بھی  کہا   کہ میں نے بیوی کو تین  طلاق دی ہے ۔ لیکن طلاق  کے لفظ  اور تین  کے لفظ میں چند سکینڈ بھی گذرے ہیں ،اور چند قدم بھی چل چکاتھا ۔اس مسئلے کی وضاحت فرمادیں   کہ ایک طلاق واقع ہوئی یا تین  ؟

نوٹ ؛یہ  تحریر   لڑکی کے والد کی طرف سے ہے ۔ 

شوہر کا بیان

اس کے بعد   کلیم اللہ نے   دارالافتا  ء  جامعة  الرشید  کراچی میں حا ضر ہوکر   بیان  دیاہے  کہ  میں  نے پہلے   جھگڑے کے   دوران  ایک طلاق دی ہے ،اس کے بعد  اسی وقت   دوبارہ   جھگڑا   شروع ہوا   تو میں نے  بیوی  کو خاموش کروانے کے لئے   تین  کا لفظ کہا ہے،اس کے ساتھ  طلاق  کا کوئی جملہ استعمال نہیں کیا ۔اور  باہر  کسی  کے سامنے بھی اپنی بیوی  کو تین   طلاق دینے کا ذکر نہیں کیا  ، البتہ   مفتیان کرام  کے سامنے  واقعہ   بیان کیا  جو اوپر   سوال میں  مذکور ہےکہ پہلے  ایک طلاق  دی اس  کے بعد  دوبارہ  لڑائی  میں  تین  کا لفط کہا ۔اور  میری   بیوی  نجم النسا  ءکا  بیان بھی  یہی ہے ۔

اَلجَوَابْ بِاسْمِ مُلْہِمِ الصَّوَابْ

مسئولہ صورت میں جب  کلیم اللہ  نامی شخص نے اپنی بیوی کو پہلی  دفعہ ،تم کو  طلاق   ہے  کہا  ہے  ، تو اس سےکلیم اللہ  کی بیوی  پر   ایک طلاق رجعی  واقع ہوئی ، اس کےکچھ دیر  بعد  دوسری مرتبہ    کلیم اللہ نےتین کا  لفظ   استعمال  کیا  اور اس کے ساتھ  طلاق  کا  کوئی جملہ استعمال  نہیں کیا ،اگر  یہ بات  درست  ہے  تو   فقط تین  کا  لفظ کہنے سے مزید کوئی   طلاق  واقع نہیں  ہوئی ،لہذا اس کے بعد  اگر کلیم  اللہ نے  عدت  کے دوران  اپنی بیوی سے رجوع   کرلیا تھا   تو دونوں کا  نکاح  بر قرار  ہے،  دونوں کے لئے میاں بیوی کی حیثیت سے زندگی گذارنا جائز ہے ،اگر عدت  کے دوران  رجوع نہیں کیا تھا   تو ازدواجی زندگی  بحال کرنے کے لئے  دوبارہ نکاح کرنا  ضروری  ہے ۔البتہ دونوں  صورتوں  میں  شوہر کو  آیندہ صرف   دو طلاقوں کا اختیار باقی  رہےگا،کسی بھی وقت اگر  مزید دو طلاقیں   دے گا   تو   عورت   تین طلاق  مغلظہ  کے ساتھ حرام ہوجائے   گی ۔          

حوالہ جات

الدر المختار وحاشية ابن عابدين (رد المحتار) (3/ 367)

مطلب قال أنت طالق وسكت ثم قال ثلاثا تقع واحدة

وفي الخانية قال لزوجته أنت طالق وسكت ثم قال ثلاثا، إن كان سكوته لانقطاع النفس تطلق ثلاثا وإلا تقع واحدة

الدر المختار وحاشية ابن عابدين (رد المحتار) (3/ 287)

(ولو مات) الزوج أو أخذ أحد فمه قبل ذكر العدد (وقع واحدة)عملا بالصيغة لأن الوقوع بلفظه لا بقصده.

قال ابن عابدین رحمہ اللہ     ؛نقلا  عن  البحر

قال هنا ويدخل في العدد أصله وهو الواحدة ولا بد من اتصاله بالإيقاع، ولا يضر انقطاع النفس فلو قال: أنت طالق وسكت ثم قال ثلاثا فواحدة، ولو انقطع النفس أو أخذ إنسان فمه ثم قال ثلاثا على الفور فثلاث،

احسان اللہ شائق عفا اللہ عنہ    

دارالافتاء جامعة الرشید     کراچی

١۴ جمادی الثانیہ  ١۴۴۴ھ

واللہ سبحانہ وتعالی اعلم