سوال

مجھے لڑکی   والوں   کی   طرف    سے   ہی   نکاح  کا   پیغام آیا۔وہ   لوگ   مجھے   بچپن   سے   جانتے   تھے   اور   میرے   حوالے   سے   خاصی   معلومات   بھی   رکھتے  تھے۔ چونکہ  مجھے  رہائش  کے  حوالے  سے  مشکلات  کا  سامنا  تھا  تو  انہوں  نے  مجھے  ان  کے  ساتھ  ان  کے گھر  پر  رہنے  کی  پیشکش کر دی  جو  کہ  میں  نے  اپنی  مجبوری کے  باعث   قبول   کر لی۔ تاہم  ہمارا   نکاح  ایک  لاکھ   روپے    مہر  (نصف معجل،   نصف   موجل)   میں بتاریخ  5 جون2020ء  کو  ہوا۔   جیسا   کہ  طے   پایا   تھا،  میں  نے  نصف 50  ہزار  (سونے   کی   چین   کی   صورت  میں)   اسی  روز   رات    کو   کمرے   میں   جانے    کے    ساتھ   ہی     ادا   کر دیئے   اور   اپنی    بیوی   کو   اس   بات   سے   باقاعدہ  آگاہ   بھی  کر دیا۔

شادی  کے  ابتدائی ماہ خوشی  سے  گزرے۔   لیکن  اس  کے   بعد  مجھ  سے خرچے  سے  متعلق  ناجائز  مطالبات شروع  کر دئے  گئے  جن  سے  میں  نے  معذرت  کر لی۔   بالآخر ایک  روز  جب  میں کسی کام سے  اپنی امی  کے  گھر  گیا  تو  میری  ساس  نے  فون  پر  مجھے  کہا  کہ  اپنے  والدین  کے بغیر  گھر  واپس  نہ  آنا۔ میں  نے   فیصلہ  کر لیا  کہ   اب   میں   وہاں نہیں رہوں   گا۔ اس   سلسلے  میں،   میں  پانچ   روز   بعد   اپنی   والدہ   اور   بہن   کے   ہمراہ   اپنا   سامان   اور    اپنی   بیوی   کو  لینے ان   کے    گھر   گیا۔  لیکن   انہوں   نے   میرا   سامان   دینے   سے   بھی   انکار کر   دیا  اور   بیوی   بھی   ساتھ   چلنے   پر   راضی   نہ   ہوئی۔  بعد   میں   بھی   میں   نے   اپنی   بیوی   سے   رابطہ   کر   کے   اس   کا   میرے   ساتھ   رہنے   کے   حوالے   سے   ارادہ   دریافت   کیا تو   اس   نے   جواب   دینے   سے   ہی   انکار   کر  دیا۔

لوگوں  کے  مشورے  سے  میں  نے  مئی  کے  مہینے  کا  انتظار   کیا  جس  میں  میری  اولاد کی  ولادت  متوقع  تھی۔  جب  بہت  انتظار  کے  بعد  بھی  مجھے  میرے   سسرالیوں  نے  کوئی  خبر  نہ  دی  تو  ایک  روز  میں  اپنے  کزن  کے  ہمراہ  ان  کے   گھر   پہنچ   گیا   تو  گالیوں سے   میرا  استقبال   ہوا   اور   اسی   دوران  میری   بیٹی   کی   ولادت  کی  خبر   ملی۔  بہر حال  آج   تک انہوں   نے مجھے   میری   بیٹی   کی   شکل   تک  دیکھنے   نہ   دی۔ پانچ  روز  بعد جب  میرے  کزن  طے  کئے  ہوئے  وقت  پر  ان  سے  مشاورت  کے  لئے  پہنچے  تو  وہ  نصف  مہر  کی  ادائیگی کے منکر تھے۔ مہر  کی مد میں  ایک  لاکھ  روپے  کے  ساتھ  طلاق  کا  مطالبہ کیا  اور  بچی  کی ولادت  کے  من  گھڑت اضافی جھوٹے  اخراجات  کی رقم  طلب  کرنا  چاہی۔ اس  کے  بدلےمیں   مجھے   میرا   سامان   اور  میری  بیٹی   دینے   کا   مشکوک   وعدہ   کیا۔ ان  دھوکے بازیوں سے  بچنے  کے  لئے  میں  نے  عدالت  سے  رجوع  کیا   اور  حقِ  زوجیت  کی  بحالی  اور  اپنے  سامان  کی  واپسی  کا  مطالبہ  بھی  کیا۔ جس  کے  بدلے  میں  ان  کی طرف سے  خلع  کا  مطالبہ  آگیا۔  ان  کے  مقدمے  میں  بہر حال  ہسپتال  کے  اخراجات  کی  درست  کاپیاں  بھی  شامل  تھیں  اور پورے مہر  سے  دستبرداری  کا اظہار  بھی۔  تاہم وہ  نصف   مہر  کی  ادائیگی  کے  اب بھی  منکر  تھے۔   اس  کے  علاوہ  ان  کے  مقدمے  میں  اور  بھی  جھوٹے  الزامات  تھے۔

بالآخر  میں  اور  میری  بیوی  جب  ایک  تاریخ  کو  جج  کے  سامنے   پیش   ہوئے   تو   اس   نے   اپنے  جھوٹے   الزامات   پر  قائم   رہتے   ہوئے    جج   سے   خلع   کا   مطالبہ   کیا  اور  میں  نے  اپنی  صفائی میں   اس   کے   جھوٹ   کی  نشاندہی   کرتے   ہوئے     بتایا   کہ   میں   طلاق   نہیں   دینا   چاہتا  لیکن  اگر  انسانوں  کی طرح  یہ  میری  تین  شرائط  پوری  کر دے  تو میں  اس  کے  خلع  کا  مطالبہ تسلیم  کرتا  ہوں۔  وہ   شرائط   یہ  تھیں۔

1)  نصف  مہر  کی  مد   میں   دی   گئی   سونے کی   چین   واپسی۔  2)  میرے   سامان کی   واپسی ۔  3)   میری   بیٹی   مجھے   دی   جائے۔

اگرچہ  جج  نے  میری  باتوں  کو  زیادہ  خاطر  میں  نہیں  لیا  اور  محض میری  بیوی  کے  مسلسل  میرے  ساتھ  رہنے  سے  انکار  پر اس  کی  خلع  کی  درخواست  قبول  کر لی۔ کیا  میری مندرجہ  بالا  تین  شرائط  جائز  ہیں؟  کیا  ہماری  خلع   ہو  گئی؟  تاہم   میرے   وکیل   کا   کہنا   ہے   کہ   عدالتوں   میں   رائج   قوانین   کا   خواتین   کی   طرف   جھکاؤ   کے   باعث   شاید   میری   تین   شرائط   نہ   مانی   جائیں۔  

برائے   مہربانی   رہنمائی   فرما   دیں۔

اَلجَوَابْ بِاسْمِ مُلْہِمِ الصَّوَابْ

خلع  بیع  وشراء  دیگر  معاملات کی طرح ایک معاملہ  ہے  جو طرفین  کی رضامندی  پر موقوف ہے ، صورت  مسئولہ  میں جب شوہر کی پیش  کردہ  خلع کی شرائط  بیوی  نے قبول نہیں کی، اور شوہر ان  شرائط  کے بغیر  خلع پر  راضی  نہیں تھا۔ توایسی  صورت میں عدالت کا یک طرفہ  خلع کی ڈ یگری جاری کرناشرعاغیر معتبر  ہے،لہذا  اگر  شوہر  نےاس کے علاوہ  کوئی  طلاق نہیں دی  تو  دونوں کا  نکاح بر قرار  ہے ۔ بیوی کے ذمے  لازم  ہے کہ  شوہر  کے ساتھ زندگی  گذار ے۔

حوالہ جات

البحر الرائق شرح كنز الدقائق ومنحة الخالق وتكملة الطوري (4/ 85)

ثم اعلم أن البدل، وإن لم يجب في الخلع والطلاق فلا يقعان إلا بقبولها، ولذا قال في البزازية لو قالت له خالعني بمال أو على مال، ولم تذكر قدره لا يتم في ظاهر الرواية بلا قبولها، وإذا لم يجب البدل هل يقع الطلاق قيل يقع وبه يفتى، وقيل لا يقع، وهو الأشبه بالدليل. اهـ. .

البحر الرائق شرح كنز الدقائق ومنحة الخالق وتكملة الطوري (3/ 265)

قوله: وقبول المرأة الطلاق على مال) قال في الكافي: ولو أكرهت امرأة بوعيد تلف أو حبس حتى تقبل من زوجها تطليقه على ألف درهم فقبلت ذلك منه، وقد دخل بها ومهرها الذي تزوجها عليه أربعة آلاف درهم أو خمسمائة درهم فالطلاق واقع ولا شيء عليها من المال ولو كان مكان التطليقة خلع بألف درهم كان الطلاق بائنا ولا شيء عليها اهـ.

احسان اللہ شائق عفا اللہ عنہ    

دارالافتاء جامعة الرشید کراچی

۷ربیع الاول ١۴۴۳ھ

واللہ سبحانہ وتعالی اعلم