ہمارےقریبی گاؤں والوں نے اب حال ہی میں میرے بچے کوشہیدکیاہے اپنی کسی دشمنی کی بناءپر،یہ قتل جان بوجھ کرکیاہے اوروہ اس کے مقربھی ہیں کہ ہم نے ماراہے،میرے مقتول بچے کی شادی ایک سال پہلے ہوئی تھی اوراس کاایک بچہ بھی ہے،پھراس قتل کے اقرارکے بعدمیں نے صلح میں ان سے ایک بچی مانگی جیساکہ دیہات میں ہوتاہےکہ مقتول کے بدلہ ایک لڑکی یادولڑکیوں کانکاح اپنے بیٹوں یاکسی اوررشتہ داروں سے کرالیتے ہیں،لیکن قاتل نے لڑکی دینے سے انکارکردیا اورکہاکہ پیسے جتنے بھی مانگو گے تومیں دوں گا،پھرجج نے اٹھارہ لاکھ روپے کافیصلہ سنایا،لیکن میں نے انکارکیا کہ نہیں میں شریعت کی مقررکی ہوئی رقم وصول کروں گاتوانہوں نے یہ بات مان لی کہ فتوی لے آوہم مان لیتےہیں ۔
پوچھنایہ ہے کہ قاتل جس نے قصداقتل کیاہواوروہ اس کامقربھی ہوتواس سے قصا معاف کرلیاجائے تو پھر دیت میں وہ کتنی رقم وصول کرسکتاہے؟
اَلجَوَابْ بِاسْمِ مُلْہِمِ الصَّوَابْ
قتل عمد سےصلح کرنے کی صورت میں فریقین مال کی جتنی مقدار پرراضی ہوجائیں اتنی ہی مقدارقاتل پرمقتول کے ورثہ کودینی لازم ہوتی ہے ،قتل عمد سے صلح کی صورت میں شریعت نے کوئی متعین مقداردیت کی مقررنہیں کی ،بلکہ اس کوفریقین کی رضامندی پرچھوڑدیا،لہذا مذکورہ صورت میں اگرقاتل اپنے اس عمل پرنادم اورشرمندہ ہیں اورورثہ صلح میں مال لینے پرراضی ہیں تواس میں قاتل کی مالی حیثیت کوسامنے رکھ کرکوئی ایسی مقدارمتعین کرلی جائے کہ جس کووہ ادابھی کرسکے اورآئندہ کے لئے اس کوعبرت بھی حاصل ہوجائے۔عدالت کی طرف سے مقررکردہ رقم بھی لے سکتے ہیں،اس میں کمی بیشی بھی ہوسکتی ہے۔
حوالہ جات
رد المحتار - (ج 23 / ص 291)
”( و ) صح ( في ) الجناية ( العمد ) مطلقا ولو في نفس مع إقرار ( بأكثر من الدية والأرش ) أو بأقل لعدم الربا ، وفي الخطأ كذلك لا تصح الزيادة لأن الدية في الخطأ مقدرة حتى لو صالح بغير مقاديرها صح كيفما كان بشرط المجلس “
