کیا فرماتے ہیں علمائے کرام اس مسئلہ کے بارے میں کہ ہم نے کچھ مرغیاں پال رکھی ہیں۔بسا اوقات وہ برتن میں موجود پانی کو جوٹھا کردیتی ہیں۔آیا اس پانی کو پینے کے لیے استعمال کرسکتے ہیں یا نہیں؟
اَلجَوَابْ بِاسْمِ مُلْہِمِ الصَّوَابْ
مرغی کا جوٹھا پاک ہے۔البتہ نجاست کھانے والی مرغی میں یہ تفصیل ہے کہ اگر اس کی چونچ کی طہارت کا یقین ہے تو پانی پاک ہے اور اگر اس کی چونچ کی نجاست کا یقین ہے تو پانی ناپاک ہے اور اگر کسی جانب یقین نہیں ہے تو پھر پانی کو استعمال کرنا مکروہ تنزیہی ہے۔
حوالہ جات
قال العلامہ ابن عابدین رحمہ اللہ تعالی:" وأما المخلاة فلعابها طاهر، فسؤرها كذلك. لكن لما كانت تأكل العذرة كره سؤرها، ولم يحكم بنجاسته ؛للشك، حتى لو علمت النجاسة في فمها تنجس، ولو علمت الطهارة انتفت الكراهة… قال في البحر: وأما سؤر الدجاجة المخلاة فلم أر من ذكر خلافا في المراد من الكراهة، بل ظاهر كلامهم أنها كراهة التنزيه بلا خلاف؛ لأنها لا تتحامى النجاسة. (رد المحتار:1/224،دار الفکر،بیروت)
