بعض لوگ کہتے ہیں کہ آپ صلی اللہ علیہ وسلم نوربھی ہیں اوربشربھی ہیں یعنی بشریت کی نفی نہیں کرتے،یہ کہناکیساہے؟نیزاحسن الفتاوی جلداول میں بھی ایک مسئلہ کے جواب میں یہ لکھاہواہے کہ آپ صلی اللہ علیہ وسلم نوربھی ہیں اوربشربھی،اس کاکیامطلب ہے؟
اَلجَوَابْ بِاسْمِ مُلْہِمِ الصَّوَابْ
اگرکوئی شخص رسول اللہ صلی اللہ علیہ وسلم کوبشر ہونے کے ساتھ صفات کے اعتبارسے نورکہتاہے تواس میں کوئی حرج نہیں ،صفات کے اعتبارسے نورہونے کامطلب یہ ہے کہ جس طرح روشنی خودظاہرہوتی ہے اوردوسری چیزوں کے ظاہرکرنےاورروشن کرنے کاسبب بنتی ہے تواسی طرح رسول اللہ صلی اللہ علیہ وسلم بھی تمام انسانیت کواللہ تعالی کی تعلیمات کے پہنچانے کے ذریعہ ان کی دل کی تاریکیوں کو دورکرکےروشن کرنے کاذریعہ اورسبب بنتے ہیں ،اس کومجازکہتے ہیں یعنی کسی چیز کے سبب کومسبب کانام دینااوریہ کلام عرب میں ،قرآن پاک میں بہت استعمال ہوتاہے۔احسن الفتاوی کی عبارت کایہی مطلب ہے۔
