021-36880325,0321-2560445

بِسْمِ اللَّـهِ الرَّحْمَـٰنِ الرَّحِيمِ

ask@almuftionline.com
AlmuftiName
فَسْئَلُوْٓا اَہْلَ الذِّکْرِ اِنْ کُنْتُمْ لاَ تَعْلَمُوْنَ
ALmufti12
نقدی نہ ہونے کی صورت میں صاحب نصاب شخص پرقربانی کاحکم
69888قربانی کا بیانقربانی کے متفرق مسائل

سوال

السلام علیکم! مفتی صاحب ایک خاتون یا بالغ لڑکی جس کے پاس تقریبا چھ تولہ سونا ہے۔ہر ماہ کسی کام کرنے کی وجہ سے دو اڈھائی ہزار روپے کماتی ہے۔ہر ماہ وہ تھوڑے تھوڑے پیسے بچا کر قربانی کے دن تک پہنچنے پر وہ بکرا یا دنبہ ذبح کرتی ہے۔شروع سے اسے اس فریضہ کی ادائیگی سے سکون ملتا ہے۔شادی ہونے کے بعد بھی وہ اپنے ہی پیسوں سے قربانی کرتی ہے۔اس سال بعض وجوہات کی بناء پر وہ قربانی کے پورے پیسے جمع نہیں کرسکی ،تو کیا اسے اپنے کچھ زیور بیچ کر قربانی کرنی چاہیے تھی  یا کچھ رقم مستعار لے کر قربانی کرے اور بعد میں قرض ادا کردے اور زیور نہ بیچے ؛کیوں کہ ان کے شوہر زیور بیچنے کے عمل کو پسند نہیں کرتے۔

اَلجَوَابْ بِاسْمِ مُلْہِمِ الصَّوَابْ

قربانی کے وجوب کے لیے ضروری ہے کہ کسی مسلمان ،عاقل،بالغ،مقیم شخص کے پاس  عید الاضحٰی کے پہلے دن(دس ذی الحجہ)کی فجر سے تیسرے دن(12 ذی الحجہ)کی مغرب تک کے دورانیے میں کسی بھی وقت سونا،چاندی،نقدی،مال تجارت اور ضرورت سے زائد سامان ملا کر چاندی کے نصاب(ساڑھے باون تولہ چاندی کی قیمت ) کو پہنچ رہے ہوں،تو اس شخص پر قربانی واجب ہوتی ہے۔ لیکن اگر کسی شخص کے پاس فقط سونا ہے اور اس کے علاوہ درج بالا اشیاء میں سے کچھ بھی نہیں ہے تو صرف اس صورت میں قربانی واجب ہونے کے لیے سونے کا نصاب پورا ہونا ضروری ہے جو کہ ساڑھے سات تولہ سونا ہے،اس سے کم سونا ہونے پر قربانی واجب نہ ہوگی۔

                              لہٰذا صورت مسئولہ کے مطابق چونکہ آپ کے پاس سونے کے ساتھ کچھ نقدی بھی موجود تھی تو عید کے دنوں میں قربانی واجب تھی ۔نقدی کم پڑنے کی صورت میں دونوں صورتوں کا اختیار ہے چاہے تو سونا بیچ کر قربانی کریں  چاہے تو کسی سے قرض لے کر قربانی کریں،دونوں جائز ہیں ،لیکن اب چونکہ عید کے دن گزر گئے اور واجب قربانی نہیں کی تو اس صورت میں ایک دنبہ یا بکرے کی قیمت صدقہ کرنا لازم ہوگا۔ ابھی قربانی نہ ہوگی۔

حوالہ جات
قال العلامۃ الحصکفی رحمہ اللہ:وشرائطها: (الإسلام والإقامة واليسار الذي يتعلق به) وجوب (صدقة الفطر) (الدر المختار:6/312)
                                                وقال العلامۃ الشامی رحمہ اللہ: قوله :(واليسار إلخ) بأن ملك مائتي درهم أو عرضا يساويها غير مسكنه وثياب اللبس أو متاع يحتاجه إلى أن يذبح الأضحية ولو له عقار يستغله فقيل تلزم لو قيمته نصابا، وقيل لو يدخل منه قوت سنة تلزم، وقيل قوت شهر، فمتى فضل نصاب تلزمه. ولو العقار وقفا، فإن وجب له في أيامها نصاب، تلزم.  (رد المحتار علی الدر المختار: 6/ 312)
                                                و فی الفتاوى الهندية: والموسر في ظاهر الرواية: من له مائتا درهم أو عشرون دينارا أو شيء يبلغ ذلك سوى مسكنه ومتاع مسكنه ومركوبه وخادمه في حاجته التي لا يستغني عنها، فأما ما عدا ذلك من سائمة أو رقيق أو خيل أو متاع لتجارة أو غيرها فإنه يعتد به من يساره.
                                                                                                                                                                                                                                                                                                                                                                                                ( الفتاوى الهندية: 5/ 292)
                                                وقال العلامۃ الکاسانی رحمہ اللہ:ولو كان موسرا في جميع الوقت فلم يضح حتى مضى الوقت ثم صار فقيرا ،صار قيمة شاة صالحة للأضحية دينا في ذمته، يتصدق بها متى وجدها.
                                                                                                                                                                                                                                                                                                                                             ( بدائع الصنائع في ترتيب الشرائع :5/ 65)

   محمد عثمان یوسف

     دارالافتاءجامعۃ الرشید کراچی

    13 محرم الحرام1442ھ

واللہ سبحانہ وتعالی اعلم

مجیب

محمد عثمان یوسف

مفتیان

سیّد عابد شاہ صاحب / سعید احمد حسن صاحب