سوال

کیا فرماتے ہیں مفتیان کرام اس مسئلہ کے بارے میں کہ ہم طلبہ  جامعۃ الرشید  پاکستان کے بلکہ پورے عالم اسلام کے ایک ایسے عظیم ادارے میں زیر تعلیم ہیں،جہاں پر ہمیں ایک بااعتماد عالم دین کے ساتھ ساتھ ایک قائد بنا کر اطراف میں بھیجا جاتا ہے۔بجائے اس کے کہ ہم وہاں پر بڑی سطح پر کام کریں بلکہ عام نشست و برخواست میں دو مزاجوں کا ٹکراؤ آجاتا ہے، جو ہمارے لیے ایک بڑے پیمانے پر طعن کا سبب بن جاتا ہے۔وہ دومزاج درج ذیل ہیں:

                                    1۔ہمارے علاقوں کے عوام و خواص کا مزاج:یعنی  علماء کرام تو ایک طرف عوام بھی ایک ایسے مزاج کے حامل ہوتے ہیں کہ وہ دعاء الاجتماعیۃ بعد صلوات الخمسۃ و کذلک حکم العمامۃ خاصۃ للامام اذا کان یصلی بالناس" لہٰذا  وہ دعا یا عمامہ ترک کرنے پر سخت ناراض ہوتے ہیں ،جو ہمارے لیے وہاں دینی خدمت کرنے میں رکاوٹ بنتا ہے۔

                                    2۔ جب کہ جامعہ میں ہم کچھ اس طرح  کے مزاج کے عادی بن جاتے ہیں ،کہ دعا تو صرف صلاۃ الکسوف کے بعد ہی کرتے ہیں یا جب کبھی امام صاحب یاد دلادیں ۔اور پگڑی 7 سال کے بعد دورہ حدیث کے سال میں اور وہ بھی صرف استاذ جی ابو لبابہ شاہ صاحب دامت برکاتھم کے گھنٹے میں باندھتے ہیں۔

                                    اس استفتاء کے ذریعے سے اعتراض کرنا مقصود نہیں ہے بلکہ  البرکۃ مع اکابرکم  کے تحت صحیح رہنمائی مقصود ہے۔

                                    جبکہ مفتی فرید صاحب رحمہ اللہ(جو کہ  مفتی اعظم پاکستان اور رئیس الاساتذہ اکوڑہ خٹک تھے) کے قول کا مفہوم ہے :ایک عالم دین کو اپنے شہر کے علماء اور عوام کے مزاج کے مطابق کام کرنا چاہیے  اور ان احکام پر عمل کرنا چاہیے ،اس طور پر کہ سب کے لیے قابل قبول ہو۔لہٰذا اگر پاکستان کے ساحلی علاقوں میں ہے تو گنجائش ہے،اگر قبائلی علاقوں میں ہو تو بہت احتیاط کرنی چاہیے۔

اَلجَوَابْ بِاسْمِ مُلْہِمِ الصَّوَابْ

فرض نماز کے بعد دعا کرنا اور ایسی دعا کا مقبول ہونا احادیث میں وارد ہے جس کا تقاضہ ہے کہ ہرفرض پڑھنے والا اپنی نماز کے بعد دعا کرے اب اگر جماعت سے نماز ادا کی جارہی ہوگی تو ہرایک کے انفراداً دعا کرنے سے اجتماعی ہیئت معلوم ہوگی اس میں مضائقہ نہیں کیونکہ جماعت کی نماز پوری ہوجانے کے بعد امام کے ساتھ مقتدیوں کے اقتداء کا تعلق ختم ہوجاتا ہے، مقتدی اس بات کے پابند نہیں کہ جتنی دیر امام دعا مانگے مقتدی لوگ بھی اس کی اتباع کریں بلکہ مقتدی پہلے بھی ختم کرسکتے ہیں اور امام کے بعد تک بھی مانگ سکتے ہیں۔

            لہٰذا اجتماع کو ضروری سمجھنا اور اس کا اہتمام والتزام کرنا اورنہ کرنے والوں پرطعن وتشنیع کرنا درست نہیں،اس لیے  بہتر تو یہ ہوگا کہ ہرشخض انفراداً دعا کرے جس سے اجتماعی ہیئت بن جائے  تو مضائقہ نہیں ۔اگرکوئی اس کو عقیدة ً بھی لازم نہیں سمجھتااوراس پراس طرح التزامِ عملی بھی نہیں کرتا کہ چھوڑنے والے پرطعن اورملامت کرے تواس میں علماءِ حق کے دوقول ہیں : ١۔بعض یہ کہتے ہیں کہ گوابھی اس کو عقیدة ً بھی لازم نہیں سمجھاجاتاوراس پراس طرح التزام عملی بھی نہیں کیاجاتا کہ چھوڑنے والے پرطعن اورملامت کیاجائےمگردوام کرنے سے آگے جاکراس کے لزوم کاخطرہ موجود ہے لہذاسدّاللذرائع اس کومنع کیاجائے گااوراس میں دیگرخرابیاں بھی ہیں ،یہی حضرت اقدس مفتی رشید احمد صاحب کی رائے ہے ۔ ۲۔دوسری رائے یہ ہے کہ چونکہ لوگ اس کولازم نہیں سمجھتے اورعملی التزام نہیں کرتے محض دوام کرتے ہیں، اس لئے فی نفسہ یہ جائزہے، جب تک اس میں خرابیاں پیدانہ ہوں،یہ رائے حضرت مفتی شفیع رحمہ اللہ اور بعض دیگر علماء کی ہے۔ حضرت علامہ محمدانورشاہ کشمیری رحمہ اللہ نے ' فیض الباری' میں اور محدث العصر حضرت مولانا محمد یوسف بنوری نوراللہ مرقدہ نے اپنے فتاویٰ میں لکھاہے کہ فرائض کے بعد موجودہ ہیئت کے مطابق اجتماعی دعا کرنا سنت مستمرہ تو نہیں ہے، لیکن اس کی اصل ثابت ہے(آپ کے مسائل اور ان کا حل:4/153) اسی طرح کفایت المفتی میں حضرت مفتی کفایت اللہ صاحب کا بھی یہی موقف ہے۔(کفایت المفتی:3/330) ۔ دونوں طرف اہل حق علماء ہیں ،پہلی رائے احتیاط پرمبنی ہے ،دوسری رائے میں آسانی اورتخفیف ہے، لہذاتنقید اورشدّت کاراستہ اپنانےسے گریز کیاجائے اورجس کی رائے پر زیادہ اعتمادہواس پرعمل کیاجائے۔لیکن سوال میں عوام کی جس کیفیت کا بیان ہے کہ وہ اس عمل کو لازم سمجھتے ہیں اور ترک پر شدید ناراض ہوتے ہیں تو عوام کے اس عقیدہ اور طرز عمل کی اصلاح بھی مناسب انداز میں کیا کریں اور خود بھی کبھی کبھار ترک پر عمل کیا کریں۔

البتہ سوال میں مذکور مفتی فرید صاحب رحمہ اللہ کی رائے کے مطابق اپنے علاقے کے علماء کے طریقے پر بھی عمل کیا جاسکتا ہے،تاکہ لوگ فتنے میں نا پڑیں،البتہ  یہ دعا سر اً افضل ہے،  تعلیم کی غرض سے  کبھی کبھار امام  جہراً بھی دعا کرا سکتا ہے ۔

            رہی بات جامعہ میں عمل کی تو یہ آپ کی اپنے عمل میں کمزوری ہے کہ آپ صلاۃ الکسوف یا امام صاحب کی تنبیہ کے بعد دعا مانگتے ہیں وگرنہ خود امام صاحب و دیگر  کئی  اساتذہ و طلبہ کا دعا کا مستقل معمول ہے۔

            جبکہ  عمامہ باندھنا نماز اور غیر حالت نماز دونوں میں سنت ہے۔امام کے لیے بھی اور مقتدی کے لیے بھی ، لیکن بغیر عمامہ کے بھی نماز پڑھنا جائز ہے،اس  سے نماز میں کچھ کراہت نہیں ہوتی، بلکہ جہاں عمامہ کو نماز کے لیے لوگ ضروری سمجھتے ہوں وہاں امام کو اصلاح عقیدہ عوام کے لیے گاہے بگاہے عمامہ کا ترک کردینا افضل ہوگا(امدادالاحکام:508)۔لہٰذا سوال میں مذکور صورت کے مطابق آپ بھی اپنا عام معمول تو یہی بنائیں کہ پگڑی باندھیں لیکن لوگوں کو یہ مسئلہ بھی سمجھائیں۔

حوالہ جات

و فی المعجم الکبیر:حدثنا محمد بن أبي يحيى، قال: رأيت عبد الله بن الزبير ورأى رجلاً رافعاً يديه بدعوات قبل أن يفرغ من صلاته، فلما فرغ منها، قال: «إن رسول الله صلى الله عليه وسلم لم يكن يرفع يديه حتى يفرغ من صلاته»۔ (المعجم الكبير للطبرانی 13/ 129)

                                                 وفی معارف السنن :اخرج ابن ابی شیبة فی مصنفهِ من حدیث الاسود العامری عن ابیهِ قال صلیت مع رسول اللهِ صلى الله إذا سلم الفجرفلماسلم انحرف ورفع یدیهِ ودعا.الاذکار النوویۃ

                                                                                                                                                                                                                                                                                                                                                                                                                                             (معارف السنن:3/125)

                                                و فی سنن الترمذی : عن عائشة، قالت: كان رسول الله صلى الله عليه وسلم إذا سلم لا يقعد إلا مقدار ما يقول: اللهم أنت السلام، ومنك السلام، تباركت ذا الجلال والإكرام.

                                                                                                                                                                                                                                                                                                                                                                                                                                               ( سنن الترمذي:1/ 387)

                                                وقال العلامۃ الکاسانی رحمہ اللہ:السنة في الأذكار المخافتة؛ لقوله تعالى {ادعوا ربكم تضرعا وخفية} [الأعراف: 55] ولقول النبي - صلى الله عليه وسلم - «خير الدعاء الخفي» ولذا هو أقرب إلى التضرع والأدب وأبعد عن الرياء فلا يترك هذا الأصل إلا عند قيام الدليل المخصص

                                                                                                                                                                                                                                                                                                                        (بدائع الصنائع في ترتيب الشرائع :1/ 196)

                                                وقال الامام السرخسی رحمہ اللہ:والإخفاء في الدعاء أولى قال الله - تعالى -: {ادعوا ربكم تضرعا وخفية} [الأعراف: 55] وقال - عليه الصلاة والسلام -: «خير الدعاء الخفي وخير الرزق ما يكفي» (المبسوط للسرخسي:1/ 33)

                                                قال العلامۃ المحدث  عبد الرؤف المنادی  فی شرح الشمائل للترمذی رحمہ اللہ:مانصہ و العمامۃ سنۃ لاسیما للصلوٰۃ وبقصد التجمل  لاخبار کثیرۃ فیھا و اشتداد ضعف کثیر فیھا یجبرہ کثرۃ طرقھا و زعم وضع اکثرھا تساھل و تحصل السنۃ بکونھا علی الراس  او القلنسوۃ تحتھا  الی ان قال ولا باس  بلبس القلنسوۃ اللاصقۃ بالراس  و المرتفعۃ المضربۃ وغیر ھا تحت العمامۃ و بلا عمامۃ لان ذلک کلہ جاء عن المصطفی  صلی اللہ علیہ وسلم و بذلک سایدبعضھم  مااعتید فی بعض الاقطار من ترک العمامۃ  من اصلھا و تمییز  علمائھم بطیلسان علی قلنسوۃ بیضاء، و لکن الافضل  العمامۃ ،اھ.

                                                                                                                                                                                                                                                                                                                                                (شرح الشمائل  للمنادی رحمہ اللہ:1/34)

                                                 وقال  العلامۃ الفاری فی شرح الشمائل  ایضا: ولابی داؤد و المصنف  فرق مابیننا  و بین المشرکین العمایم  علی القلانس قال المصنف  غریب و لیس اسنادہ  بالقائم ،اھ.

                                                و فی زاد المعاد لابن القیم : وکانت لہ صلی اللہ علیہ وسلم عمامۃ  تسمی السحاب کساھا علیا  وکان یلبسھا  و یلبس  تحتھا القنسوۃ و کان یلبس القلنسوۃ بغیر عمامۃ  و یلبس  العمامۃ بغیر قلنسوۃ   و کان اذا اعتم ارخی  عمامتۃ  بین کتفیہ  اھ.  ص 34/1  ،قلت  و ھذا  عام  للصوٰۃ و لغیرھا ، و اللہ اعلم.

                                                                                                                                                                                                                                                                                                    (شرح الشمائل لعلامۃ الفاری :1/165-166)

محمد عثمان یوسف

     دارالافتاءجامعۃ الرشید کراچی

          2 رجب المرجب 1442ھ

واللہ سبحانہ وتعالی اعلم