سوال

ایک شخص جس کا اپنی بیوی سے کسی بات پر تکرار ہوا  اس کی بیوی نے اس سے بدتمیزی کی ۔اس نے  اپنی بیوی کی بدتمیزی کو معافی  پر مشروط رکھا  کہ آپ اپنی غلطی کی معافی مانگ لیں میں معاف کر دیتا ہوں۔لیکن بیوی بضد رہی۔جس پر شوہر نے یہ بات کہی کہ آئندہ میں تمہارے قریب بھی نہیں آؤں گا ۔اب اس بات کو تقریبا دو سال مکمل ہو گئے لیکن میاں بیوی حقوقِ زوجیت کے علاوہ باقی امور گھرداری جیسے مل کر کھانا کھانا وغیرہ کرتے ہیں،حتی کہ بوس و کنار کا سلسلہ بھی نہیں ہے۔ برائے مہربانی اس سے متعلق شرعی حکم بتلا دیں۔                                        

اَلجَوَابْ بِاسْمِ مُلْہِمِ الصَّوَابْ

شرعی طور پر  ’’ایلاء ‘‘  میں اپنی بیوی کے قریب نہ جانے کی صورت میں  ایک طلاق بائن واقع ہوتی ہے۔

ایلاء کہتے ہیں کہ کوئی  شخص چار ماہ یا اس سے زیادہ اپنی بیوی کے  ساتھ صحبت نہ کرنے کی قسم   کھائے اور وہ قسم اللہ کے نام یا اس کی کسی صفت کو ذکر کے کھائی گئی ہو،یا پھراس قول کو شرط اور جزاء کی صورت میں ذکر کیا گیا ہو جیسا کہ کوئی اپنی بیوی سے کہے اگر میں تمہارے قریب آیا تو مجھ پر حج لازم ہے۔اس طرح قسم کھانے یا شرط اور جزاء کی صورت میں ذکر کرنے کے بعد اگر وہ 4 ماہ یا اس سے زائد  اپنی بیوی کے قریب نہ جائے تو اس کی بیوی کو ایک طلاق بائن واقع ہو جاتی ہے۔

مذکورہ صورت میں چونکہ شوہر کے اس قول    ’’ آئندہ میں تمہارے قریب بھی نہیں آؤں گا ‘‘ میں نہ تو اللہ کی ذات اور صفات کی قسم کھائی گئی ہے اور نہ ہی اس  کو شرط اور جزا ء کی صورت میں ذکر کیا گیا ہے۔لہذا اس صورت میں کوئی طلاق واقع نہیں ہو گی۔مذکورہ عورت حسب سابق شوہر کے نکاح میں ہے۔

بدائع الصنائع في ترتيب الشرائع (3/ 161)

اللفظ الدال على منع النفس عن الجماع في الفرج مؤكدا باليمين بالله تعالى أو بصفاته أو باليمين بالشرط والجزاء۔

بدائع الصنائع في ترتيب الشرائع (3/ 166)

أما اليمين بالشرط والجزاء فنحو قوله: إن قربتك فامرأتي الأخرى طالق، أو قال: هذه طالق أو قال: فعبدي هذا حر أو فأنت علي كظهر أمي أو قال: فعلي عتق رقبة أو فعلي حجة أو عمرة أو المشي إلى بيت الله أو فعلي هدي أو صدقة أو صوم أو اعتكاف؛ لأن الإيلاء يمين واليمين في اللغة عبارة عن القوة، والحالف يتقوى بهذه الأشياء على الامتناع من قربان امرأته في المدة؛ لأن كل واحد منها يصلح مانعا من القربان في المدة لأنه يثقل على الطبع، ويشق عليه فكان في معنى اليمين بالله عز وجل لحصول ما وضع له اليمين، وهو التقوي على الامتناع من مباشرة الشرط.

وكذا يعد مانعا في العرف والعادة فإن الناس تعارفوا الحلف بهذه الأشياء.