سوال

میرے شوہر نے کئی بار لڑائی کے دوران مجھے بولا کہ میں تجھے چھوڑدوں گا۔ ایک بار مجھے کہا کہ تم فارغ ہو۔ میں نے ان سے کہا کہ پہلے تم کہتے تھے کہ تمہیں چھوڑ دوں گا، اب کہتے ہو کہ تم فارغ ہو، اِس طرح میں تم پر حرام ہوجاوں گی؟ اس پر انہوں نے کہا کہ ہاں تم فارغ ہو۔ میں نے یہ سب بات موبائل میں ریکارڈ کر کے سب کو سنادی تھی۔ اِس کے بعد ہم آپ کے پاس آئے تھے اور آپ نے کہا تھا کہ طلاق ہوگئی ہے۔ اور آپ نے اُس موقع پر مجھے اجازت دی تھی کہ میں عدت کے بعد کہیں اور نکاح کرسکتی ہوں۔ میں نے اب نکاح کرلیا ہے اور میرے سابقہ شوہر اب یہ کہہ رہے ہیں کہ نکاح نہیں ہوا، تم ابھی بھی میری بیوی ہو۔ آپ سے سوال ہے کہ میرا دوسرا نکاح صحیح ہوا ہے یا نہیں؟

اَلجَوَابْ بِاسْمِ مُلْہِمِ الصَّوَابْ

میاں بیوی دونوں کا بیان سن کر ایک بار طلاق کے وقوع کا فتوی دیا جاچکا ہے۔ اِسی فتوے کی بنا پر خاتون نے کہیں اور نکاح کیا اور شوہر اِس دوران خاموش رہا۔ اب ایک طویل عرصہ گذرجانے کے بعد شوہر کا یہ دعوی کہ "دوسرا نکاح باطل ہے، میں نے طلاق نہیں دی" کالعدم ہے۔ لہذا خاتون کا دوسرا نکاح درست ہے۔

.