سوال

میرا سوال یہ ہے کہ بھائی کی جائیداد میں کس کس کا حصہ ہوگا، جب کہ ماں باپ کا انتقال کافی پہلے ہوچکا ہے اور والد کی جائیداد میرے بڑے بھائی کے پاس تھی۔ بڑے بھائی کی ایک بیوی اور ایک بیٹی ہےاور میں چھوٹا بھائی ہوں۔

وضاحت: سائل نے بتایا کہ بڑے بھائی کا انتقال ہوگیا ہے اور والد صاحب کی وراثت میں حصے متعین کردیے تھے البتہ تقسیم نہیں کی گئی تھی۔اور یہ جائیداد بڑے بھائی کے قبضے میں تھی۔ مزید یہ کہ والد کے انتقال کے وقت ان کے والدین یعنی سائل کے دادا ، دادی حیات نہیں تھے۔

اَلجَوَابْ بِاسْمِ مُلْہِمِ الصَّوَابْ

مرحوم کے ترکہ میں سے پہلےتجہیز وتکفین کے اخراجات نکالے جائیں گے، بشرطیکہ یہ اخراجات کسی نے بطورِ احسان نہ اٹھائے ہوں،اس کے بعد قرضوں کی ادائیگی کی جائے گی، پھر اگر انہوں نے کوئی جائزوصیت کی ہوتو وہ کل ترکہ کے ایک تہائی (1/3)حصے میں نافذ ہوگی۔ اس کے بعد بقیہ ترکہ کو 8حصوں میں تقسیم کیا جائے گا، 1حصہ بیوہ (بڑے بھائی کی بیوی) کا، 4 حصے بیٹی کے اور بقیہ 3حصے بھائی(سائل) کے۔

{يُوصِيكُمُ اللَّهُ فِي أَوْلَادِكُمْ لِلذَّكَرِ مِثْلُ حَظِّ الْأُنْثَيَيْنِ فَإِنْ كُنَّ نِسَاءً فَوْقَ اثْنَتَيْنِ فَلَهُنَّ ثُلُثَا مَا تَرَكَ وَإِنْ كَانَتْ وَاحِدَةً فَلَهَا النِّصْفُ} [النساء: 11]