سوال

السلام علیکم ورحمۃ اللہ وبرکاتہ میرا نام نجمث سعادت ہند کلکتہ ہے میرا سوال یہ ہے کہ عورت کے پاس پیسہ ہے یا امیر ہے تو کیا اس پر حج فرض ہے؟ اگر حج نہ کرتے ہوئے فوت ہو جائے تو کیا کرنا چاہیے؟

اَلجَوَابْ بِاسْمِ مُلْہِمِ الصَّوَابْ

  اگر عورت کے پاس نقدی یا اتنی مالیت کاسوناچاندی وغیرہ موجود ہے کہ جس سے حج کے آنے جانے، رہائش اور کھانے پینے  کاخرچہ باآسانی نکل سکتا ہے تو اس پر حج فرض ہے شرط یہ ہے کہ شوہریامحرم اپنےخرچہ پر عورت کے ساتھ جانے کے لئے تیارہو ، اگرشوہریامحرم اپنے خرچ پرسفرکے لیے راضی نہ ہو یاان کے پاس اخراجات نہ ہوں اورعورت ان کے سفرکے اخراجات برداشت کرسکتی ہوتوایسی صورت میں شوہر/  محرم کے سفری اخراجات کاانتظام کرناعورت کے ذمہ ہے اوراگر اس کے پاس محرم کے حج کے اخراجات نہیں ہیں اور محرم بھی عورت کے اخراجات کے بغیر ساتھ جانے کیلئے تیار نہیں ، تو فرضیتِ حج کی دیگر شرائط کی موجودگی میں عورت پر حج تو فرض ہو جائے گا ، لیکن اس کی ادائیگی اس وقت واجب ہوگی جب عورت  محرم کے خرچ پر بھی قادر ہو جائے یا محرم عورت کے اخراجات کے بغیر ہی ساتھ جانے کیلئے  تیار ہو جائے ، اگر پوری زندگی عورت  محرم کے حج کے اخراجات پہ قادر نہیں ہوتی یا وہ بغیر اخراجات کےساتھ جانے کے لئے تیار نہیں ہوتا ، تو عورت پر واجب ہے کہ وہ مرنے سے پہلے اپنی طرف سے حجِ بدل کروانے کی وصیت کر جائے ، اگر نہیں کرے گی  تو گناہگار ہو گی۔

الهداية (ج 1 / ص 132):

” الحج واجب على الأحرار البالغين العقلاء الأصحاء إذا قدروا على الزاد والراحلة فاضلا عن المسكن وما لا بد منه وعن نفقة عياله إلى حين عوده. “

وفی غنية الناسك(26):

الرابع: المحرم أو الزوج لامرأۃ بالغۃ ولو عجوزاً أو معہا غیرہا من النساء الثقات والرجال الصالحین وتجب علیھا النفقہ والراحلۃ لمحرمھا؛ لانہ محبوس علیھا ۔۔۔۔ ثم اختلفوا ان المحرم او الزوج شرط الوجوب او شرط الاداء کما اختلفوا فی امن الطریق؟ فقیل: الصحیح الاول،وقیل الصحیح الثانی۔۔۔۔۔۔۔۔