سوال

یار  محمد کی بیوہ (طوطیہ )کا انتقال ہو گیا ہے، اس کے دو بیٹے اور ایک بیٹی زندہ ہے، جبکہ ایک بیٹے کا انتقال پہلے ہی ہو چکا تھا۔ طوطیہ  کے والدین حیات نہیں ہیں، دو بہنیں اور ایک بھائی تھا،ان سب  کا  پہلے ہی انتقال ہو گیا ہے۔

اَلجَوَابْ بِاسْمِ مُلْہِمِ الصَّوَابْ

مرحومہ نے انتقال کے وقت اپنی ملکیت میں  سونا، چاندی،نقدی، جائیداد، مکانات، کاروبار، غرض جو کچھ چھوٹا، بڑا ساز و سامان چھوڑا ہے، یا اگر کسی کے ذمہ ان کا قرض تھا، تو وہ سب ان کا ترکہ یعنی میراث ہے ۔اس سے متعلق حکم یہ ہے  کہ اگر ان  کے ذمے کسی کا قرض ہو تو وہ ترکہ میں سے سب سے پہلے ادا کیا جائے۔ اس کے بعد اگر انہوں  نے کسی غیر ِوارث کے حق میں کوئی جائز وصیت کی ہو تو ایک تہائی(1/3) ترکہ کی حد تک اس کو پورا کیا جائے۔ اس کے بعد جو بچ جائے اس کے پانچ حصے کر کے ، دو  دو حصے ہر بیٹے کو اور ایک حصہ بیٹی کو ملےگا۔

{لِلذَّكَرِ مِثْلُ حَظِّ الْأُنْثَيَيْن} [النساء: 11]

الاختيار لتعليل المختار (5/ 93)

(وعصبة بغيره وهم أربع من النساء يصرن عصبة بإخوتهن، فالبنات بالابن وبنات الابن بابن الابن) لقوله - تعالى -: {يوصيكم الله في أولادكم للذكر مثل حظ الأنثيين} [النساء: 11] .