سوال

میرے  والد صاحب کا انتقال ہو گیا، انہوں نے اپنے ورثاء میں ایک بیوہ، تین بیٹے اور دو بیٹیاں  اور ایک بہن چھوڑی ہے، ان کے والدین اور دادا، دادی اور نانی کا انتقال ان کی زندگی میں ہو چکا تھا۔ سوال یہ ہے کہ ان کا ترکہ کس طرح تقسیم ہو گا؟

اَلجَوَابْ بِاسْمِ مُلْہِمِ الصَّوَابْ

مرحوم نے بوقت ِانتقال اپنی ملکیت میں منقولہ وغیر منقولہ مال،جائیداد،سونا ،چاندی،نقدی اور ہر قسم کا چھوٹا بڑا جو کچھ ساز وسامان چھوڑا ہے اور مرحوم  کا  وہ قرض جو کسی کے ذمہ  واجب  الادء ہو، يہ  سب مرحوم کا ترکہ ہے، اس میں سے سب سے پہلے مرحوم کے کفن و دفن کے متوسط اخراجات نکالے جائیں، اگر یہ اخراجات کسی نے بطورِ تبرع ادا کر دیے ہوں تو پھر یہ ترکہ سے نکالنے کی ضرورت نہیں، اس کے بعد مرحوم کے ذمہ واجب الاداء قرض  ادا کیا جائے اور پھرترکہ کے ایک تہائی(1/3) کی حد تک   مرحوم کی طرف سے کی گئی جائز وصیت پر عمل کیا جائے گا، اس کے بعد جو تركہ باقی بچے اس میں آٹھواں حصہ مرحوم کی بیوہ کو دینے کے بعد باقی مال کو ان کے بیٹوں اور بیٹیوں کے درمیان اس طرح تقسیم کر دیا جائے کہ بیٹے کو بیٹی کی بنسبت دوگنا حصہ ملے۔ اس کے علاوہ مرحوم کی بہن کو کوئی حصہ نہیں ملے گا، کیونکہ نرینہ اولاد کی موجودگی میں شرعابہن بھائی وارث نہیں ہوتے۔ تقسیمِ میراث کا نقشہ ملاحظہ فرمائیں:

 القرآن الکریم: [النساء: 11]:

{يُوصِيكُمُ اللَّهُ فِي أَوْلَادِكُمْ لِلذَّكَرِ مِثْلُ حَظِّ الْأُنْثَيَيْنِ}

القرآن الکریم: [النساء: 12]:

{وَلَهُنَّ الرُّبُعُ مِمَّا تَرَكْتُمْ إِنْ لَمْ يَكُنْ لَكُمْ وَلَدٌ فَإِنْ كَانَ لَكُمْ وَلَدٌ فَلَهُنَّ الثُّمُنُ مِمَّا تَرَكْتُمْ مِنْ بَعْدِ وَصِيَّةٍ تُوصُونَ بِهَا أَوْ دَيْنٍ }