سوال

کیا فرماتے ہیں علماء کرام اس مسئلہ کے بارے میں کہ شرعی مسئلہ یہ ہے کہ مال مستفاد میں  زکوۃ واجب ہونے کے لیے چرنا اور سال گزرنا شرط ہے،یعنی اگر مال مستفاد سابقہ مال کی جنس سے ہے اور اس کا نما اور نفع بھی ہے مثلا پہلے بکریاں تھی ،پھر اس کے بچے پیدا ہوئے تو سابقہ مال کا سال پورا ہونے پر اس مال مستفاد کو شامل کرکے اتفاقا زکوۃ دینا واجب ہے۔

ایک آدمی کے پاس تیس بکریاں صحرا میں چرنے والی سال پورا ہونے پر یا درمیان سال  میں  بکریوں کے تیس بچے پیدا ہوئے  ،لیکن یہ شخص زکوۃ دینے سے انکاری ہے کہ میرے پاس کل تیس بکریاں ہیں، جبکہ چالیس بکریوں پر ایک بکری زکوۃ ہے، باقی چھوٹے بچوں کو شامل نہیں کرتا۔

نوٹ:سال پورا ہونے پر مال مستفاد کو بھی شامل کرکے زکوۃ دینا واجب ہے۔ یہاں واجب سے کیا مراد ہے؟ مستحب کے معنی میں ہے، اگر شمار نہ کریں تو ماخوذ ہوگا یا نہیں؟

اَلجَوَابْ بِاسْمِ مُلْہِمِ الصَّوَابْ

سال کےدرمیان حاصل شدہ مال مستفاد کو ہم جنس نصاب میں شامل کیا جائے گا،لہذا ایسی صورت میں بچوں کو بھی شامل کر کے ساٹھ بکریوں میں سے ایک بکری بطور زکوۃ کی ادائیگی لازم ہوگی اوریہ حکم وجوبی ہے،نہ کہ استحبابی۔

رد المحتار - (ج 7 / ص 40)

( والمستفاد ) ولو بهبة أو إرث ( وسط الحول يضم إلى نصاب من جنسه )

 ( قوله : والمستفاد ) السين والتاء زائدتان : أي المال المفاد ط ( قوله : ولو بهبة أو إرث ) أدخل فيه المفاد بشراء أو ميراث أو وصية وما كان حاصلا من الأصل كالأولاد والربح كما في النهر